| e-texts navigator |
| Wylie |
234b1 ཐམས་ཅད་ལས་ཤིན་ཏུ་འདས་པ་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །བྱང་ཆུབ་སེམས
234b2 དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་བསྡུ་བའི་དངོས་པོ་རྣམ་པ་བཞིས་སེམས་ཅན་ཡོངས་སུ་སྨིན་པར་བྱེད་དོ། །སྙིང་རྗེ་ཆེན་པོས་སེམས་ཅན་ཐམས་ཅད་ལ་བདེ་བའི་དོན་གྱི་ཕྱིར་སྦྱིན་པས་ཡོངས་སུ་སྡུད་པ་ནི་འདི་ལྟ་སྟེ། རིན་པོ་ཆེ་དང་། ནོར་དང་། དབྱིག
234b3 དང་། ཐེག་པ་དང་། བྲན་དང་། ལས་བྱེད་པའི་མི་དང་། ཡུལ་དང་། སྲིད་དང་། བུ་དང་། ཆུང་མ་དང་། ལུས་དང་། སྲོག་གི་བར་དུ་ཡོངས་སུ་གཏོང་བ་ལ་སེར་སྣ་མེད་དེ། མི་དམིགས་པའི་སྤྱོད་པ་ལ་སྦྱོར་བས་འདུལ་བའི་སེམས་ཅན་ཡོད་པར་མི་མཐོང་། སྦྱིན་པ་བྱེད་པར་མི་མཐོང་། ལེན
234b4 པར་མི་མཐོང་། ནོར་གྱི་དངོས་པོར་མི་མཐོང་། སྦྱིན་པ་སྤྱོད་པར་མི་མཐོང་། སྦྱིན་པ་བྱས་པའི་འབྲས་བུར་མི་མཐོང་བ་ནས་མི་དམིགས་པའི་བར་དུ་ཡང་མི་མཐོང་སྟེ། དེ་ལྟ་བུའི་སྙིང་རྗེ་ཆེན་པོ་སྐྱེད་དོ། །སེམས་ཅན་ཐམས་ཅད་ལ་ཕན་པ་དང་བདེ་བའི་དོན
234b5 གྱི་ཕྱིར་ངག་སྙན་པ་དང་། དོན་སྒྲུབ་པ་དང་། དོན་འཐུན་པས་ཅི་དང་ཅིས་འདུལ་བ་བཞིན་དུ་མི་དམིགས་པ་ཡང་མི་མཐོང་བའི་བར་དུ་དེ་དང་དེས་རྒྱས་པར་སྟོན་ཅིང་འཆད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྟག་ཏུ་མཆོག་དམ་པའི་དུལ་བའི་སེམས་དང་། རབ་ཏུ་ཞི་བའི
234b6 སེམས་དང་། ཚད་མེད་པའི་སེམས་དང་། ཕུང་པོ་དང་། ཁམས་དང་། སྐྱེ་མཆེད་ཐམས་ཅད་ལ་མངོན་པར་འདུ་མི་བྱེད་པའི་སེམས་ཀྱིས་གང་ནས་གང་དུ་སྐྱེས་ཀྱང་གཡོ་བ་མེད་པ་དང་། མི་གནས་པའི་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་འདིས་སྣོད་དུ་གྱུར་པའི་སེམས་ཅན་ཐམས
234b7 ཅད་ཡོངས་སུ་སྨིན་པར་བྱེད་པ་ལ་སྐྱོ་བ་མེད་དོ། །དེ་ལྟར་ན་བྱང་ཆུབ་སེམས་དཔའ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སྙིང་རྗེ་ཆེན་པོའི
iiif viewer powered by OpenSeadragon
