| e-texts navigator |
| Wylie |
231b1 གང་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་ཉན་ཐོས་དང་། རང་སངས་རྒྱས་ཀྱི་ཐེག་པའི་ཆོས་སྟོན་ཅིང་། ཉན་ཐོས་དང་། རང་སངས་རྒྱས་ཀྱི་ཐེག་པ་ལ་སློབ་ཅིང་ནན་ཏན་བྱེད་དུ་བཅུག་གོ། །གང་སངས་རྒྱས་ཀྱི་ཐེག་པའི་ཆོས་ཀྱི་སྣོད་དུ་གྱུར་པའི་སེམས་ཅན་ལ
231b2 ནི་ཉན་ཐོས་ཀྱི་ཐེག་པའི་ཆོས་སྟོན་ཅིང་། ཉན་ཐོས་ཀྱི་ཐེག་པ་ལ་སློབ་ཅིང་ནན་ཏན་བྱེད་དུ་བཅུག་གོ། །གང་ཉན་ཐོས་ཀྱི་ཐེག་པའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་འཁོར་བའི་ཆོས་ལ་བདེ་བ་དང་དགའ་བར་སྟོན་ཏེ། འཁོར་བའི་ཆོས་ལ་སྐྱོ་བ་སྐྱེད་པར་མི་སྟོན་ཏོ། །གཞན་ཡང
231b3 ཤིན་ཏུ་ཐབས་མཁས་པ་ལ་རྨོངས་པས་སེམས་ཅན་གང་སྲོག་གཅོད་པ་ལ་དགའ་བ་ནས་དེ་བཞིན་དུ་ལོག་པར་ལྟ་བའི་བར་དུ་མོས་པ་དག་ལ་ནི་ཤིན་ཏུ་ཟབ་པ་ཐེག་པ་ཆེན་པོའི་ཆོས་སྟོན་ཏེ། དེ་ལ་འཁོར་བ་འདི་ནས་ཤི་འཕོས་ནས་ཕ་རོལ་ཏུ་སྐྱེ་ཞིང་སྡུག་བསྔལ་གྱི་འབྲས་བུ་རྣམ་པར་སྨིན་པ
231b4 མྱོང་བ་ལ་སྐྱོ་ཞིང་འཇིགས་པ་དང་། སྡིག་པ་མི་དགེ་བའི་ཆོས་སྤོང་བ་མི་སྟོན་ཏོ། །གཞན་ཡང་ཤིན་ཏུ་ཐབས་མཁས་པ་ལ་རྨོངས་པས་སེམས་ཅན་གང་ཚུལ་ཁྲིམས་སྲུང་བར་མོས་པ་ལ་ནི་སྦྱིན་པ་སྤྱོད་དུ་འཇུག་གོ། །སེམས་ཅན་གང་བཟོད་པ་སྒོམ་པར་མོས་པ་ལ་ནི་བཟོད་པ་སྤོང་བ
231b5 སྟོན་ཅིང་ཚུལ་ཁྲིམས་སྲུང་དུ་འཇུག་གོ། །སེམས་ཅན་གང་བརྩོན་འགྲུས་སྒོམ་པར་མོས་པ་ལ་ནི་བརྩོན་འགྲུས་སྤོང་བ་སྟོན་ཅིང་བཟོད་པ་སྤྱོད་དུ་འཇུག་གོ། །སེམས་ཅན་གང་བསམ་གཏན་སྒོམ་པར་མོས་པ་ལ་ནི་བསམ་གཏན་སྤོང་བ་སྟོན་ཅིང་བརྩོན་འགྲུས་ལ་ནན་ཏན་བྱེད་དུ་བཅུག་གོ། །སེམས
231b6 ཅན་གང་ཤེས་རབ་སྒོམ་པར་མོས་པ་ལ་ནི་ཤེས་རབ་སྤོང་བ་སྟོན་ཅིང་བསམ་གཏན་སྒོམ་དུ་འཇུག་གོ། །དེ་ལྟར་བྱང་ཆུབ་སེམས་དཔའ་འཇིག་རྟེན་གྱི་ཐབས་མཁས་པ་ལ་རྨོངས་པས་ཡང་དག་པ་ཇི་ལྟ་བ་བཞིན་དུ་སེམས་ཅན་ལ་ཕན་པ་དང་བདེ་བའི་དོན་བྱེད་མི་ནུས་ཏེ། སེམས་ཅན་ཐམས་ཅད
231b7 ཀྱི་སྡིག་པའི་གྲོགས་པོར་གྱུར་ཏོ། །ཐབས་མཁས་པ་འདི་ནི་དམིགས་པ་དང་བཅས་པ་ཆགས་པ་དང་བཅས་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་གྱི་ཐབས་མཁས་པ་ཞེས་བྱའོ། །དེ་ལྟར་འཇིག་རྟེན་གྱི་ཐབས་མཁས་པ་འདི་ནི་ཉན་ཐོས་དང་། རང་སངས་རྒྱས་ཀྱི
iiif viewer powered by OpenSeadragon
