| e-texts navigator |
| Wylie |
231a1 མི་སྤྱོད་པ་ཅན་ལ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་དང་། དཀོན་མཆོག་གསུམ་ལ་དད་པ་དང་། དགེ་བསྙེན་པའི་སྡོམ་པ་ལ་བསླབ་པ་དང་། བསྙེན་གནས་པའི་སྡོམ་པ་བསླབས་པས་ཡོངས་སུ་སྨིན་པར་བྱེད་དོ། །གཞན་ཡང་བཟོ་དང་སྒྱུ་རྩལ་རྣམ་པ་སྣ་ཚོགས
231a2 ཀྱི་གནས་ལ་སློབ་ཅིང་སྤྱོད་དུ་བཙུད་པས་ཡོངས་སུ་སྨིན་པར་བྱེད་དོ། །དེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་པའི་ཤིན་ཏུ་ཐབས་མཁས་པའི་ཡེ་ཤེས་ཀྱི་རྣམ་པ་ནི་ཆུ་ཀླུང་གང་གཱའི་བྱེ་མ་སྙེད་པས་མང་ངོ་། །དེ་ལྟར་ཡི་གེ་དང་། གཙུག་ལག་དང་།
231a3 བཟོ་དང་། སྒྱུ་རྩལ་གྱི་ལས་ཀྱི་གནས་ཐམས་ཅད་ལ་ལྷག་པའི་སྤྱོད་པ་དང་། བརྩོན་འགྲུས་དང་། ཐབས་མཁས་པའི་ཡེ་ཤེས་ཀྱིས་མུ་སྟེགས་ཅན་དང་། སྟོན་པ་གཞན་ལ་ཞུགས་པ་ཐམས་ཅད་བཏུལ་བ་དེ་ནི་བྱང་ཆུབ་སེམས་དཔའི་འཇིག་རྟེན་པའི་ཐབས་མཁས་པའོ། །
231a4 ཐབས་མཁས་པ་འདི་ནི་ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་ཡིན་ཏེ། སངས་རྒྱས་ཀྱི་ཆོས་ཐམས་ཅད་གནས་པའི་རྒྱུར་གྱུར་པ། ཐབས་མཁས་པ་སྤྱོད་པའི་གནས་སུ་གྱུར་པ་ཤིན་ཏུ་ཐབས་མཁས་པ་ལྷུན་གྱིས་གྲུབ་པས་རྟོག་པ་མེད་པའི་ཕྱིར་ལྡོག་པ་མེད་པའི
231a5 ཆོས་སུ་གྱུར་པའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་གང་སྟོན་པ་མཁས་པ་ལའང་མི་རྟེན། དགེ་བའི་བཤེས་གཉེན་ལའང་མི་ལྟོས་པར་འཇིག་རྟེན་གྱི་ཐབས་མཁས་པ་ལ་ནན་ཏན་བྱེད་ན། བྱང་ཆུབ་སེམས་དཔའ་དེ་ནི་འཇིག་རྟེན་གྱི་ཐབས་མཁས་པས་རྨོངས་པ་ཡིན
231a6 ཏེ། ངན་སོང་དུ་ལྟུང་བར་འགྱུར་རོ། །དེ་ནི་འཇིག་རྟེན་ལས་འདས་པའི་ཤིན་ཏུ་ཐབས་མཁས་པའི་ཡེ་ཤེས་ལ་གཞོལ་ཞིང་གནས་པར་ཡང་མི་ནུས་ལ། ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །ཤིན་ཏུ་ཐབས་མི་མཁས་པས་སེམས་ཅན་གྱི་དབང་པོ་དང་། སྤྱོད་པའི
231a7 ཁྱད་པར་ཡང་མི་ཤེས་ལ། ཤིན་ཏུ་ཐབས་མཁས་པ་ལའང་རྨོངས་པར་གྱུར་པས་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོའི་སྣོད་མ་ཡིན་པ་དང་། ཐེག་པ་ཆེན་པོའི་དབང་པོར་མ་སྨིན་པ་དག་ལ་ཐེག་པ་ཆེན་པོ་སྟོན་པ་དང་། སློབ་ཅིང་ནན་ཏན་བྱེད་དུ་བཅུག་གོ། །
iiif viewer powered by OpenSeadragon
