| e-texts navigator |
| Wylie |
229b1 བ་དང་བཅས་པ། ཤེས་རབ་དང་བཅས་པའི་ཤེས་རབ་ལ་ནན་ཏན་བྱེད་དོ། །དེ་ལྟར་ལེན་པ་དང་བཅས་པ། ཆགས་པ་དང་བཅས་པའི་ཤེས་རབ་ནི་བྱང་ཆུབ་སེམས་དཔའི་འཇིག་རྟེན་གྱི་ཤེས་རབ་ཅེས་བྱའོ། །ཤེས་རབ་དེ་ནི་ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་ཡིན
229b2 ཏེ། གོ་ཆ་ཆེན་པོའི་འཁོར་ལོ་ཞེས་མི་བྱ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཤེས
229b3 རབ་ཅེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བྱང་ཆུབ་ཀྱི་ལམ་ལ་བརྩོན་འགྲུས་སུ་ནན་ཏན་བྱེད་པ་ནི་ཅི་ནུས་སུ་ཐེག་པ་གསུམ་གྱི་ཡང་དག་པའི་ཆོས་ལ་ཀློག་པ་དང་། འདོན་པ་དང་། ཉན་པ་དང་། གླེགས་བམ་དུ་འདྲི་བ་དང་། གཞན་དག་ལ་རྒྱས་པར་སྟོན་ཅིང་འཆད
229b4 ཀྱང་དེ་ལ་དམིགས་སུ་མེད་པའི་སྦྱོར་བ་ལ་གནས་ཏེ། མི་གཡོ་བ་དང་། མི་རྟོག་པ་དང་། ངོ་བོ་ཉིད་མེད་པ་དང་། ནམ་མཁའ་ལྟ་བུའི་སེམས་དང་། རབ་ཏུ་ཞི་བའི་སེམས་དང་། འཕེལ་བ་དང་། འགྲིབ་པ་མེད་པའི་ཤེས་རབ་དང་། ཆགས་པ་མེད་པའི་སེམས་དང་། སྐྱེ་བ
229b5 དང་འགོག་པ་མེད་པའི་སེམས་དང་། ཕྱིར་མི་ལྡོག་པའི་སེམས་དང་། ཆོས་མཉམ་པ་ཉིད་ཀྱི་སེམས་དང་། དེ་བཞིན་ཉིད་ཀྱི་སེམས་དང་། ཡང་དག་པའི་མཐའི་སེམས་དང་། ཆོས་ཀྱི་དབྱིངས་ཀྱི་སེམས་དང་། བདག་མེད་པའི་སེམས་དང་། རྣམ་པར་མི་རྟོག་པའི་སེམས
229b6 དང་། རབ་ཏུ་ཞི་བ་དང་། བཟོད་པ་དང་། རྟོག་པ་དང་བྲལ་བའི་སེམས་ཀྱིས་གྲུབ་པ་དང་། འཇིགས་པ་མེད་པའི་ས་ལ་ཤིན་ཏུ་ཐབས་མཁས་པས་བདེ་བར་གནས་པ་དང་། མི་གནས་པ་མི་ཆགས་པའི་མཆོག་དམ་པའི་བློ་གྲོས་ཀྱི་ས་ལ་ཐབས་མཁས་པས་བདེ་བར་གནས་པ་སྟེ།
229b7 ཤེས་རབ་འདི་ནི་ལེན་པ་མེད་པ་ཆགས་པ་མེད་པས་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ
iiif viewer powered by OpenSeadragon
