| e-texts navigator |
| Wylie |
228b1 བྱང་ཆུབ་སེམས་དཔའི་འཇིག་རྟེན་ལས་འདས་པའི་བསམ་གཏན་གྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་བསམ་གཏན་གྱི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ།
228b2 བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས
228b3 མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། བདག་གི་ཁུར་ལྕི་སྤོང་བའི་ཕྱིར་ནི། །དམིགས་དང་བཅས་པའི་ཏིང་འཛིན་བསྒོམས་ཏེ། །བདག
228b4 གི་ཀུན་ནས་ཉོན་མོངས་གཅོད་འདོད། །ཡང་དག་མཁས་པའི་མཚན་ཉིད་མ་ཡིན། །སྣོད་ལ་རྟེན་ཅིང་རྟོག་དང་བཅས་པ། །རྣམ་པར་གྲོལ་འདོད་ཏིང་འཛིན་སྒོམ་ཡང་། །ཚུ་རོལ་ཕ་རོལ་མུ་ལ་གནས་ན། །སེམས་ཅན་དག་ལ་ཕན་དོན་བྱེད་མིན། །སེམས་ཅན་ཀུན་ལ་ཕན་དང
228b5 བདེ་ཕྱིར། །ཏིང་འཛིན་སྒོམ་ཞིང་ཁུར་ལྕི་སྤངས་ཏེ། །ཀུན་ནས་ཉོན་མོངས་ཐམས་ཅད་སེལ་བ། །དེ་ནི་ཡང་དག་མཁས་པའི་མཚན་ཉིད། །སེམས་ཅན་ཐམས་ཅད་སིམ་པར་བྱེད་ཕྱིར། །མི་གནས་པ་ཡི་ཏིང་འཛིན་སྒོམ་སྟེ། །འདོད་པའི་སྲིད་པ་ཐམས་ཅད་ཆོད་པ། །དེ་ནི་བློ
228b6 གྲོས་ཆེན་པོ་ཞེས་བྱ། །སྲིད་པས་བཅིངས་པ་ཐམས་ཅད་བཀྲོལ་ཏེ། །འཇིགས་པ་མེད་པའི་གྲོང་དུ་བཟུང་ཕྱིར། །རབ་ཏུ་ཞི་བའི་ཏིང་འཛིན་སྒོམ་པ། །དེ་ནི་བྱང་ཆུབ་སེམས་དཔའ་ཆེན་པོའོ།། །།བམ་པོ་བཅུ་པ་སྟེ་ཐ་མ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ
228b7 སེམས་དཔའ་ཆེན་པོ་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན
iiif viewer powered by OpenSeadragon
