| e-texts navigator |
| Wylie |
225a1 སེམས་དཔའི་འཇིག་རྟེན་ལས་འདས་པའི་བཟོད་པ་གོ་ཆ་ཆེན་པོའི་འཁོར་ལོ་ཞེ་ན། ཟག་པ་མེད་པའི་བཟོད་པ་སྟེ། འཕགས་པ་ཐམས་ཅད་ཀྱི་ཆོས་ཆེན་པོའི་འོད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ཆགས་པ་མེད་པའི་བཟོད་པ་དང་། བྱ
225a2 བའི་དངོས་པོ་ཐམས་ཅད་དང་། ཚིག་ཏུ་སྨྲ་བ་དང་། རྒྱུ་དང་། མཚན་མ་དང་། ཡི་གེ་དང་། སྒྲ་སྐད་ཐམས་ཅད་ཡོངས་སུ་བཅད་པའི་སྐྱེ་མཆེད་ལ་བརྟེན་པའི་བཟོད་པ་སྤྱོད་དོ། །བཟོད་པ་འདི་བསྒོམས་པས་ཀུན་ནས་ཉོན་མོངས་པ་གསུམ་དང་། བསྐལ་པ་རྣམ་གསུམ་དང་། མཚན
225a3 ཉིད་གསུམ་དང་། དུས་གསུམ་དང་། སྲིད་པ་གསུམ་དང་། འདུ་བྱེད་རྣམ་གསུམ་དང་། མི་དགེ་བའི་རྩ་བ་གསུམ་དང་། ཆུ་བོ་བཞི་དང་། མདུད་པ་རྣམ་བཞི་དང་། ཉེ་བར་ལེན་པ་བཞི་དང་། ལུས་ཀྱི་མདུད་པ་རྣམ་བཞི་ལ་སོགས་པ་ཡོངས་སུ་བཅད་པས་བཟོད་པ་འདི་སྒོམ་པའི་ཚེ
225a4 སེམས་དང་ཡིད་རབ་ཏུ་ཞི་བས་འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་གོ་ཆ་ཆེན་པོའི་འཁོར་ལོའི་བཟོད་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོའི་འཁོར་ལོའི་བཟོད་པ་དེ་དང་ལྡན་པས་ཐོག་མ་སེམས་བསྐྱེད་པ་ནས
225a5 འདོད་པ་ལྔ་རྣམས་ཡོངས་སུ་བསལ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་ཉན་ཐོས་དང་།
225a6 རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། བཟོད་པ་ལ་ནི་རྣམ་པ་གཉིས་ཏེ། །མཚན་མར
225a7 བཅས་དང་མཚན་མ་མེད་པ། །མཚན་མར་བཅས་པའི་བཟོད་པ་ཆགས་ཡོད། །མཁས་པ་དག་ནི་དེ་ལ་མི་སྟོད། །འདུ་བྱེད་རྣམ་གསུམ་ཕུང་པོ་ཁམས་དང་། །སྐྱེ་མཆེད་ལ་རྟེན་བཟོད་པ་སྒོམ་པ། །དེ་ནི་ཟག་བཅས་བཟོད་པ་ཡིན་ཏེ། །བྱང་ཆུབ་སེམས་དཔའ་ཆེན་པོ
iiif viewer powered by OpenSeadragon
