| e-texts navigator |
| Wylie |
224a1 སེམས་ཅན་ཐམས་ཅད་ལ་ཞེ་སྡང་མེད་པ་དང་། ཁོང་ཁྲོ་བ་མེད་པ་དང་། ངན་པར་སྤྱོད་པ་མེད་པས་ཚུལ་ཁྲིམས་ཡོངས་སུ་སྲུང་ངོ་། །སྲིད་པ་གསུམ་གྱི་ཕུང་པོ་དང་། ཁམས་དང་། སྐྱེ་མཆེད་ལ་རྣམ་པར་རྟོག་པ་མེད་པས་ཚུལ་ཁྲིམས་ཡོངས་སུ་སྲུང་ངོ་། །འདོད
224a2 པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ་། །གཟུགས་ཡོད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ་། །གཟུགས་མེད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ་། །སྲིད་པའི་རྣམ་པར་སྨིན་པའི་འབྲས་བུ་ཐམས་ཅད་ལ་མི་གནས་པར་ཚུལ་ཁྲིམས
224a3 སྲུང་ངོ་། །རྙེད་པ་དང་མི་རྙེད་པ་ལ་མི་གནས་པར་ཚུལ་ཁྲིམས་སྲུང་ངོ་། །འདུ་བྱེད་རྣམས་ལ་མི་གནས་པར་ཚུལ་ཁྲིམས་སྲུང་སྟེ། འདི་དག་ནི་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཐུན་མོང་མ་ཡིན་པ་ཞེས་བྱའོ། །རིགས་ཀྱི་བུ་བྱང
224a4 ཆུབ་སེམས་དཔའ་སེམས་དཔའ་ཆེན་པོ་གང་ཚུལ་ཁྲིམས་རྣམ་པར་དག་པའི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས
224a5 ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །དེ་ནས་བཅོམ་ལྡན་འདས
224a6 ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཁྱིམ་ན་གནས་ཤིང་སྡོམ་པ་ལེན་པ། །རབ་བྱུང་སོ་སོར་ཐར་པའི་ཚུལ་ཁྲིམས། །ཐེག་པ་གཉིས་དང་ཐུན་མོང་ཡིན་ཏེ། །བྱང་ཆུབ་ཆེན་པོ་ཞེས་ནི་མི་བྱ། །མཁས་པ་སྟོང་པ་ཉིད་ཆོས་སྒོམ
224a7 པ། །འཇིག་རྟེན་ཀུན་ལ་མི་རྟེན་མི་གནས། །སྲིད་པ་ཀུན་ལ་གནས་མ་ཡིན་པར། །རྣམ་པར་དག་པའི་ཚུལ་ཁྲིམས་སྲུང་ངོ་། །མཚན་མ་སྤོང་བའི་ཚུལ་ཁྲིམས་དག་ནི། །ཆགས་པ་མེད་དེ་ཟག་པ་ཀུན་མེད། །ཚུལ་ཁྲིམས་འདི་ལྟ་སྲུང་བ་དག་ནི། །ཡང་དག་བསོད་ནམས
iiif viewer powered by OpenSeadragon
