| e-texts navigator |
| Wylie |
222b1 དང་། སེར་སྣ་མེད་པའི་སེམས་དང་། ང་རྒྱལ་མེད་པའི་སེམས་དང་། རྙེད་པར་མི་རེ་བའི་སེམས་དང་། གཞན་མི་སྨོད་པའི་སེམས་དང་། བདག་མི་སྟོད་པའི་སེམས་དང་། བསྟི་སྟང་དང་བཅས་པའི་སེམས་དང་། ཕན་པའི་སེམས་དང་། བྱམས་པ་ཆེན་པོའི་སེམས་དང་། སྙིང་རྗེ་ཆེན་པོའི
222b2 སེམས་སུ་བྱའོ། །ཉན་ཐོས་ཀྱི་ཐེག་པ་ཅན་གྱི་གང་ཟག་ལ་ནི་ཉན་ཐོས་ཀྱི་ཆོས་སྟོན་ཅིང་འཆད་ཀྱི། དེ་ལ་རང་སངས་རྒྱས་ཀྱི་ཆོས་སམ། ཐེག་པ་ཆེན་པོའི་ཆོས་ཀྱིས་མ་ཡིན་པ་དང་། རང་སངས་རྒྱས་ཀྱི་ཐེག་པ་ཅན་གྱི་གང་ཟག་ལ་ནི་རང་སངས་རྒྱས་ཀྱི་ཐེག་པའི་ཆོས་སྟོན་གྱི། ཉན་ཐོས
222b3 ཀྱི་ཐེག་པའི་ཆོས་སམ། ཐེག་པ་ཆེན་པོའི་ཆོས་ཀྱིས་མ་ཡིན་པ་དང་། ཐེག་པ་ཆེན་པོའི་གང་ཟག་ལ་ནི་ཐེག་པ་ཆེན་པོའི་ཆོས་སྟོན་གྱི། ཉན་ཐོས་དང་། རང་སངས་རྒྱས་ཀྱི་ཐེག་པ་པའི་ཆོས་ཀྱིས་མ་ཡིན་པ་དང་། སེམས་ཅན་གྱི་དབང་པོ་དང་། སྣོད་ཇི་ལྟ་བ་བཞིན་དུ་དམ་པའི་ཆོས
222b4 སྟོན་གྱི། དབང་པོ་དང་སྣོད་དུ་མ་གྱུར་པ་ལ་ཆོས་མི་སྟོན་ཏོ། །གང་ཐེག་པ་ཆེན་པོའི་སེམས་ཅན་ལ་རང་སངས་རྒྱས་ཀྱི་ཐེག་པ་སྤྱོད་ཅིག་པར་རམ། ཉན་ཐོས་ཀྱི་ཐེག་པ་སྤྱོད་ཅིག་པར་མི་སྐུལ་ལོ། །རང་སངས་རྒྱས་ཀྱི་ཐེག་པ་ཅན་གྱི་སེམས་ཅན་ལ་སྐབས་ཁ་ཅིག་ཏུ་ཐེག་པ་ཆེན་པོའི་སྤྱོད
222b5 པ་ལ་ནན་ཏན་བྱོས་ཤིག་ཅེས་སྐུལ་བའི་སྐབས་ནི་ཡོད་དེ། ཉན་ཐོས་ཀྱི་ཐེག་པ་ཅན་གྱི་སེམས་ཅན་ལ་སྐབས་ཁ་ཅིག་ཏུ་རང་སངས་རྒྱས་ཀྱི་ཐེག་པའི་སྤྱོད་པ་དང་། ཐེག་པ་ཆེན་པོའི་སྤྱོད་པ་ལ་ནན་ཏན་གྱིས་ཤིག་ཅེས་སྐུལ་བའི་སྐབས་ཀྱང་ཡོད་དེ། དེ་བཞིན་གཤེགས་པའི་བསྟན་པའི
222b6 དམ་པའི་ཆོས་ཆུང་ངུ་ན་ཚིགས་སུ་བཅད་པ་གཅིག་གམ་ཚིགས་སུ་བཅད་པ་ཕྱེད་ཙམ་ལ་ཡང་ཤིན་ཏུ་དད་ཅིང་བཀུར་སྟི་བྱེད་ཀྱི། དེ་ལ་འཕྱ་བའམ་སྐུར་པའམ། བགེགས་སམ། བར་ཆད་མི་བྱེད་དེ། ཆོས་སྟོན་པ་ལ་སངས་རྒྱས་དང་འདྲ་བར་འདུ་ཤེས་པ་དང་། ཆོས་ཉན་པའི
222b7 འཁོར་རྣམས་ལ་ནད་པ་དང་འདྲ་བར་འདུ་ཤེས་པ་དང་། གང་འཆད་པའི་ཆོས་ལ་སྨན་བཟང་པོ་དང་འདྲ་བར་འདུ་ཤེས་ཤིང་འདོད་པ་རྣམ་པ་ལྔ་ཡོངས་སུ་བཅད་དེ་རེ་བ་མེད་པས་དམ་པའི་ཆོས་སྟོན་ཏོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཀྱི
iiif viewer powered by OpenSeadragon
