| e-texts navigator |
| Wylie |
219a1 མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡང་ཡོད་པར་འགྱུར་ཏེ། དེ་དག་ཀུན་ཀྱང་དགེ་བ་བཅུའི་ལས་ཀྱི་ལམ་ལ་ཤིན་ཏུ་ནན་ཏན་བྱེད་པའི་ཁྱད་པར་དང་བྱེ་བྲག་ལས་གྱུར་ཏོ། །དེ་བས་ན་རིགས་ཀྱི་བུ་གང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ
219a2 པར་འདོད་ན་དགེ་བ་བཅུའི་ལས་ཀྱི་ལམ་ལ་ནན་ཏན་གྱི་རྒྱན་གྱིས་བརྒྱན་ཏེ། མི་དགེ་བ་བཅུའི་སྡོམ་པ་ལ་མི་གནས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །གང་མྱུར་དུ་ཐེག་པ་ཆེན་པོའི་སྤྱོད་ཡུལ་དུ་ཆུད་པར་འདོད་དམ། མྱུར་དུ་བླ་ན་མེད་པ
219a3 ཡང་དག་པར་རྫོགས་པའི་བྱང་ཆུབ་ཐོབ་པར་འདོད་དམ། མྱུར་དུ་དགེ་བའི་ཆོས་ཐམས་ཅད་ཡོངས་སུ་རྫོགས་པར་འདོད་ན་སྔར་དགེ་བ་བཅུའི་ལས་ཀྱི་ལམ་ཤིན་ཏུ་བསྲུང་བར་བྱའོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་གྱིས་ནི་དགེ་བའི་ཆོས་ཐམས་ཅད་དང་། ཡོན་ཏན་རྣམ
219a4 པར་གཞག་པའི་གཞི་དང་། འཇིག་རྟེན་དང་། འཇིག་རྟེན་ལས་འདའ་བའི་འབྲས་བུའི་མཆོག་ཐོབ་པར་བྱེད་པའི་རྒྱུ་ཡིན་ནོ། །དེ་བས་ན་དགེ་བ་བཅུའི་ལས་ཀྱི་ལམ་ལ་ཤིན་ཏུ་ནན་ཏན་བྱའོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད
219a5 དེ་གསུངས་པ། སྲིད་པའི་སྡུག་བསྔལ་ཀུན་གཅོད་ཅིང་། །བྱང་ཆུབ་ཆེན་པོ་འཐོབ་འདོད་པ། །དགེ་བཅུའི་འཁོར་ལོའི་ནན་ཏན་ལ། །ལེ་ལོ་མ་བྱེད་བརྩོན་པར་གྱིས། །ཐེག་པ་གསུམ་གྱི་དམ་ཆོས་དང་། །ཐེག་པ་རྣམ་གསུམ་གང་ཟག་དང་། །རབ་ཏུ་བྱུང་བ་ཐམས
219a6 ཅད་ལ། །འཁྲུལ་པ་མེད་པར་འཐོབ་པར་འགྱུར། །ཐེག་ཆེན་སྤྱོད་ལ་དད་མོས་ཤིང་། །ཐམས་ཅད་འཁོར་གྱི་དབུགས་འབྱིན་པའི། །ཆོས་མཆོག་རྟོགས་ནས་ཞིང་དག་དེར། །བྱང་ཆུབ་ཆེན་པོ་མྱུར་དུ་འཐོབ། །གལ་ཏེ་སྲོག་གཅོད་ཡོངས་སྤངས་ན། །ཀུན་གྱིས་བཀུར་ཞིང་བླ
219a7 མར་བྱེད། །རྟག་ཏུ་ནད་མེད་ཚེ་ཡང་རིང་། །བདེ་ཞིང་སྐྱིད་ལ་གནོད་པ་མེད། །སྐྱེ་བའི་གནས་ནི་ཐམས་ཅད་དུ། །སངས་རྒྱས་སྤྱོད་ཡུལ་ལམ་ལ་མོས། །སངས་རྒྱས་ཆོས་དང་དགེ་འདུན་མཐོང་། །མྱུར་དུ་བླ་མེད་བྱང་ཆུབ་འཐོབ། །མ་བྱིན་ལེན་པ་ཡོངས་སྤངས་ན། །མཁས
iiif viewer powered by OpenSeadragon
