| e-texts navigator |
| Wylie |
141b1 ཅན་རྣམས་ནི་ངན་འགྲོར་མཆི། །མ་འཚལ་བ་ནི་ཀྱེ་རེ་མཚར། །བདག་གིས་ཡུན་རིང་འཁོར་བར་བགྱིས། །ཡོངས་སུ་མྱ་ངན་འདའ་སྙམ་མཛད། །སེམས་ཅན་མར་མེའི་ནང་དག་ཏུ། །ཕྱེ་མ་ལེབ་ནི་མཆོང་བ་བཞིན། །བཅོམ་ལྡན་དམ་ཆོས་དེ་བཞིན་དུ། །ཡོངས་སུ་མྱ་ངན་འདའ་འགྱུར
141b2 སྙམ། །དེ་ལྟར་སེམས་པར་བགྱིད་པ་ཡི། །ལྷར་བཅས་འཇིག་རྟེན་འཁོར་བར་འགྱུར། །དེང་བདག་ཡང་དག་མཚན་མཐོང་བ། །ཀྱེ་མ་རྙེད་ཆེན་ལེགས་པར་རྙེད། །ཁྱོད་ཀྱི་ཞབས་མཆོག་གཟི་བརྗིད་ཀྱིས། །དམ་ཆོས་ཚིག་སྨོས་རྒྱ་མཚོ་ཐོས། །སྨོན་ལམ་བཏབ་ཅིང་བསྒྲུབས་པ
141b3 དེས། །དེ་རིང་བདག་གིས་བདུད་རྩི་འཚལ། །བགྱི་བ་ཆེན་པོའི་སོ་སོའི་ལས། །དེ་རིང་བདག་གིས་བསྟེན་པར་བགྱིས། །བདག་གི་དེ་རིང་ནད་ཞི་ཞིང་། །ནད་མེད་གནོད་པ་མ་མཆིས་ལ། །དེ་རིང་བདག་གིས་གདུང་བ་བསྲབས། །མཆོག་ཏུ་ཡང་ནི་བདེ་བར་འགྱུར། །འཇིག
141b4 རྟེན་ཀུན་ལ་ཐུགས་བརྩེ་བ། །བཅོམ་ལྡན་སངས་རྒྱས་བཤད་དུ་གསོལ། །སེམས་ཅན་ཀུན་གྱི་བདེ་བ་སྒྲུབ་པ། །སངས་རྒྱས་བཅོམ་ལྡན་འདས་པ་ཡིས། །ནད་རྣམས་མ་ལུས་མཛད་པར་གསོལ། །དམ་ཆོས་བརྟན་པའི་ཚུལ་གྱི་གཏེར། །སེམས་ཅན་དབུལ་པོ་རྣམས་ཀྱི་ནི། །མི་ཟད
141b5 པ་ཡི་བདུད་རྩི་གཏེར། །བཅོམ་ལྡན་སངས་རྒྱས་བཤད་དུ་གསོལ། །རྣམ་པར་སྦྱོང་བའི་ཆོ་ག་ཡི། །ལས་ཀྱི་ཚིག་ནི་སྨོས་པ་རྣམས། །བཅོམ་ལྡན་སངས་རྒྱས་རྒྱས་པར་མཛོད། །རྟག་ཅིང་བརྟན་པའི་འདུ་སྟོན་ལ། །སེམས་ཅན་མང་པོ་དགོད་པར་གསོལ། །སྤྲིན་ཆེན་པོའི་མདོ་ལས
141b6 ལྷ་ཐམས་ཅད་འདུས་པ་ཞེས་བྱ་བ་སྟེ་ཕུང་པོ་དང་པོའི་ལེའུ་རྫོགས་སོ། ། །།འཕགས་པ་སྤྲིན་ཆེན་པོའི་མདོ། བམ་པོ་བཞི་པ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་ཆེན་སྙིང་པོས་འདི་སྐད་ཅེས་གསོལ་ཏོ། །
141b7 དམ་པའི་ཆོས་བརྟན་པ་སྤྲིན་ཆེན་པོའི་མདོའི་ཚིག་སྨོས་པ། བཅོམ་ལྡན་འདས་དེ་བཞིན་གཤེགས་པས་གསུངས་པ་ནི་ཨ་ལ་ལ་ངོ་མཚར་རྨད་དུ་བྱུང་བ་ལགས་སོ། །བཅོམ་ལྡན་འདས་ཨ་ལ་ལ་སྤྲིན་ཆེན་པོའི་མདོའི་ཡུལ་བསམ་གྱིས་མི་ཁྱབ་སྟེ། ཆོ་འཕྲུལ་ཆེན་པོའི་རྣམ་པར་འཕྲུལ
iiif viewer powered by OpenSeadragon
