| e-texts navigator |
| Wylie |
264a1 དག་གིས་ནི་འདོར་བར་བྱེད། །བྱེ་མའི་ཕུང་པོ་ཇི་སྙེད་དེ། །གང་དག་ང་ཡིས་སྔར་བསྟན་པ། །དེ་བཞིན་ཕྱོགས་བཞི་དག་ཏུ་ཡང་། །མི་ཡིས་བྱེ་མ་འདོར་བར་བྱེད། །སྔར་ནི་ཇི་སྙེད་བསྟན་པ་ཡི། །དེ་སྙེད་བྱེ་མར་གྱུར་པ་དང་། །ཇི་སྙེད་བསྟན་པའི་བྱེ་མ་སྙེད། །དེ་སྙེད་འཇིག་རྟེན་ཁམས
264a2 དེ་དག་། འདིར་ནི་དེ་དག་ཐམས་ཅད་ཀྱང་། །གྲོང་ཁྱེར་གྲུ་བཞི་གཅིག་གྱུར་ལ། །སྐྱེས་བུ་ལ་ལ་བྱུང་བས་ནི། །གྲོང་ཁྱེར་བརྩིགས་པ་དེ་དག་ཏུ། །རིན་པོ་ཆེ་ཡིས་བཀང་བྱས་ཏེ། །སྐྱོབ་པ་སངས་རྒྱས་རྣམས་ལ་ཕུལ། །སྦྱིན་དེ་དེ་དག་ལ་ཕུལ་བས། །འཇིག་རྟེན་མགོན་པོ་བསམ་མི་ཁྱབ། །རྐང
264a3 གཉིས་གཙོ་བོར་གྱུར་ཅིག་ཅེས། །བྱང་ཆུབ་མཆོག་ཏུ་སྨོན་པར་བྱེད། །དེ་ནི་བྱང་ཆུབ་ཉིད་ཚོལ་ལ། །མདོ་འདི་དག་ནི་མི་ཚོལ་ཏེ། །ངས་བཤད་པ་ཡི་བགྲོ་བ་དག་།མདོ་འདི་དག་ནི་རྙེད་མི་འགྱུར། །གང་ཞིག་མདོ་འདི་ཚོལ་བྱེད་པ། །དེ་སྙེད་བསོད་ནམས་འཕེལ་བར་འགྱུར། །མང་དུ་ཐོས་པ
264a4 ཀུན་དགའ་བོ། །འདི་ལས་བྱང་ཆུབ་ལྷག་པར་ནི། །བགྲོ་མཛད་དེ་བཞིན་དགེ་སློང་དང་། །དགེ་སློང་མ་དག་ངས་ལུང་བསྟན། །ངས་བཤད་པ་ཡི་བགྲོ་བ་འདི། །གང་དག་ཚོལ་བྱེད་དེ་དག་གིས། །ང་སྔོན་བྲམ་ཟེ་ཁྱེའུ་དེའི་ཚེ། །གང་གིས་བྱང་ཆུབ་ཕྱིར་ལུང་བསྟན། །དེ་ཚེ་ཐོག་མར་བྱང་ཆུབ
264a5 ཕྱིར། །གང་ལ་བསོད་ནམས་ངས་བསྐྲུན་པ། །མར་མེ་ཞེས་བྱ་བསམ་མི་ཁྱབ། །ཡེ་ཤེས་ལྡན་ཆེན་མཐོང་བ་ཡིན། །གང་དག་འདི་ལུང་ནོད་དེ་དག་།རྫོགས་པའི་སངས་རྒྱས་དེ་མཐོང་ངོ་། །རྟག་པར་སེམས་ཅན་ཀུན་བདེ་ཕྱིར། །གྲངས་མེད་བདུན་བརྒྱ་རྫོགས་པ་སྟེ། །གཅིག་ཀྱང་མ
264a6 ཚང་མེད་པར་ནི། །བྱང་ཆུབ་ཆེད་དུ་ངས་བཙལ་ལོ། །མང་ཐོས་ང་དང་ལྷན་ཅིག་ཏུ། །དེ་དག་གིས་ཀྱང་བསོད་ནམས་བསྐྱེད། །གང་དག་འདི་ནི་ལུང་ནོད་ཅིང་། །བྱང་ཆུབ་མཆོག་མར་སྨོན་བྱེད་པ། །དེ་དག་བྱང་ཆུབ་མི་ཉམས་ཤིང་། །དེ་དག་བྱང་ཆུབ་དཀོན་པ་མེད། །གང་དག་ངས་བཤད
264a7 པ་ཡི་མདོ། །འདི་ནི་གང་དག་ལུང་ནོད་པ། །དེ་དག་སངས་རྒྱས་བྱང་ཆུབ་རྒྱུ། །ང་ཡིན་ཏེ་ནི་ཐེ་ཚོམ་མེད། །གང་དག་ཕྱི་མའི་དུས་དེ་ཚེ། །མི་རྣམས་ཀྱིས་ནི་ཚུལ་འདི་མཐོང་། །ཕྱི་མའི་དུས་ན་དགེ་སློང་དག་།སངས་རྒྱས་བྱ་བ་བྱེད་པར་འགྱུར། །ངས་བསྟན་པ་ཡི་བགྲོ་བ་དག་།འདི་ནི་གང་དག
iiif viewer powered by OpenSeadragon
