| e-texts navigator |
| Wylie |
107a1 ཁྲིམས་མཆོག་། ཆོས་རྣམས་ཐ་དད་བྱ་བ་མེད། །ཁྱད་པར་མེད་ཅིང་མཚན་མེད་པར། །གང་གིས་མཐོང་ཞིང་ཤེས་པ་དག་།དེ་དག་ང་ཡི་བསྟན་པ་འཛིན། །གང་གིས་སེམས་ནི་ནམ་མཁའ་ལྟར། །མ་ཆགས་བཞིན་དུ་ཕྱོགས་སུ་འགྲོ། དེ་ལྟར་ཡེ་ཤེས་ཆགས
107a2 མེད་པ། །དེ་ཡི་དགེ་སྦྱོང་ཡང་དག་ཉིད། །གང་གིས་མ་བརྟགས་ཤིང་། །ཐམས་ཅད་དུ་ཡང་སེམས་པ་མེད། །སེམས་ཅན་མེད་ཅིང་ཆོས་མེད་པ། །དེ་དག་བྱང་ཆུབ་རྙེད་མི་དཀའ། །འདོད་ཆགས་མཐའ་ལ་གང་མི་གནས། །འདོད་ཆགས་དང་ཡང་བྲལ་མ་གྱུར། །འདོད་ཆགས
107a3 ལས་ཀྱང་རྒྱལ་མི་བྱེད། །དེ་ནི་བྱང་ཆུབ་མི་དཀོན་ནོ། །གང་དག་བསྐལ་པར་མི་སྐྱོ་ཞིང་། །མཐས་ཀྱང་འཇིག་པར་མི་འགྱུར་ལ། །འཁོར་བས་སྐྲག་པར་མི་འགྱུར་བ། དེས་ནི་བྱང་ཆུབ་རྙེད་མི་དཀའ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་ནས་འཇམ
107a4 དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གང་ཆོས་ཀྱི་རྣམ་གྲངས་འདི་ལ་མོས་པར་བྱེད། ཐེ་ཙོམ་དུ་མི་བྱེད། ནེམ་ནུར་དུ་མི་བྱེད། ལུང་སྦྱིན་པར་བྱེད། འཛིན་པར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལ་ཡང་རྒྱ་ཆེར་ཡང
107a5 དག་པར་སྟོན་པ་དེའི་ཕན་ཡོན་བསྔགས་པ་ཉི་ཤུ་ཡོད་པར་རེ་བར་བྱའོ། །ཉི་ཤུ་གང་ཞེ་ན། ལྷས་བསྲུངས་པར་འགྱུར། ཀླུས་བསྲུངས་པར་འགྱུར། གནོད་སྦྱིན་གྱིས་བསྲུངས་པར་འགྱུར། སེམས་གཡེངས་པར་མི་འགྱུར། ཚེ་བརྗེས་ནས་ཀྱང་ཚེ་རབས་དྲན་པར་འགྱུར། མངོན་པར
107a6 ཤེས་པ་ལྔ་ཐོབ་པར་འགྱུར། ཚེ་བརྗེས་མ་ཐག་ཏུ་བྱང་ཆུབ་སེམས་དཔའ་བྱམས་པ་མཐོང་བར་འགྱུར། དེ་སྟེ་ཆོས་ཀྱི་རྣམ་གྲངས་འདི་སེམས་མི་གཡེང་བར་ཡིད་ལ་བྱེད་ཅིང་གཉིད་ཀྱི་སྙོམ་པ་སེལ་ན། དེའི་རྨི་ལམ་དུ་སངས་རྒྱས་མཐོང་བར་འགྱུར་ཏེ། བྱང་ཆུབ་སེམས་དཔའ་མཐོང
107a7 བ་ཡང་རེ་བར་བྱའོ། །དེ་ཆོས་ཀྱི་རྣམ་གྲངས་འདི་ལ་མོས་ན་རྗེས་སུ་འཐུན་པའི་ཆོས་རྣམས་ལ་བཟོད་པ་རེ་བར་བྱའོ། །ཆོས་ཀྱི་རྣམ་གྲངས་འདི་སེམས་ན་ཚེ་འདི་ཉིད་ལ་གནོད་སེམས་མེད་པར་རེ་བར་བྱའོ། །དུག་མྱུར་བའི་ནང་ན་འདུག་ན་ཡང་ཆོས་ཀྱི་རྣམ་གྲངས་འདི་ཡིད་ལ་བྱེད་ན་འཇིགས་པ
iiif viewer powered by OpenSeadragon
