| e-texts navigator |
| Wylie |
210b1 དགེ་བསྙེན་སྟོང་ཕྲག་དཔག་ཏུ་མེད་པ་དག་དང་། ཉན་ཐོས་ཆེན་པོ་དག་དང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་བརྒྱ་ཕྲག་གྲངས་མེད་པ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར
210b2 བསྟོད་དོ། །འཕགས་པ་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས
210b3 ཀྱང་བཅོས་ནས་གཏན་ལ་ཕབ་པ། ། །། @##། །རྒྱ་གར་སྐད་དུ། ཨཱརྱ་མཱ་ཡོ་པ་མ་ས་མཱ་དྷི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྒྱུ་མ་ལྟ་བུའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི
210b4 མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་བཱ་རཱ་ཎ་སཱི་ན་དྲང་སྲོང་ལྷུང་བ་ཀྱི་ནགས་ན། དགྲ་བཅོམ་པ་ཉི་ཁྲིའི་དགེ་སློང་གི
210b5 དགེ་འདུན་ཆེན་པོ་དང་། བྱང་ཆུབ་སེམས་དཔའ་ཁྲི་ཉིས་སྟོང་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་སེང་གེ་དང་། སེང་གེའི་བློ་གྲོས་དང་། ལེགས་པར་གནས་པའི་བློ་གྲོས་དང་། དཔེ་མེད་བློ་གྲོས་དང་། ས་འཛིན་དང་། མེས་བྱིན་དང་། ཆུ
210b6 ལྷ་དང་། དཀོན་མཆོག་འབྱུང་གནས་དང་། ཕུག་སྦས་དང་བཟང་སྐྱོང་དང་གློག་ལྷ་དང་། རྣམ་པར་སྣང་བྱེད་དང་། འཇམ་དཔལ་གཞོན་ནུར་གྱུར་པ་དང་། ཡེ་ཤེས་འབྱུང་གནས་དང་། བརྩོན་པ་མི་གཏོང་དང་། མཐོང་བ་དོན་ཡོད་དང་། བྱང་ཆུབ་སེམས་དཔའ
210b7 སེམས་དཔའ་ཆེན་པོ་བྱམས་པ་ལ་སོགས་པ་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །ལྷའི་བུ་མཚམས་བཟང་དང་ལེགས་པར་གནས་པའི་བློ་གྲོས་ལ་སོགས་པ་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཉི་ཁྲི་དང་ཡང་ཐབས་ཅིག་གོ། །དེ་ནས་བཅོམ
iiif viewer powered by OpenSeadragon
