| e-texts navigator |
| Wylie |
75b1 པའོ། །རྒྱགས་པ་འདུལ་བ་རྒྱགས་པ་འདུལ་བ་ཞེས་བྱ་བ་ནི་གང་ལ་འཁྲིག་པའི་འདུན་པའི་མིང་ཡང་མེད་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མ་རིག་པ་འདུལ་བ་མ་རིག་པ་འདུལ་བ་ཞེས་བྱ་བ་ནི་ཇི་ལྟར་འོ་མ་ལས་གཅིག་ནས་གཅིག་ཏུ་བརྒྱུད་དེ་དྲི་མའི་ཉེས་པ
75b2 གང་དང་གང་ཟད་པར་གྱུར་པ་དེ་དང་དེ་ལས་མར་གྱི་སྙིང་ཁུ་འབའ་ཞིག་འབྱུང་བར་འགྱུར་བ་དེ་བཞིན་དུ་མ་རིག་པ་ལས་རིག་པ་འབའ་ཞིག་འབྱུང་བར་འགྱུར་ཏེ། མ་རིག་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དབེན་པ་དབེན་པ་ཞེས་བྱ་བ་ནི་གང
75b3 ལ་ཟླའི་ཆོས་གཞན་མེད་པ་སྟེ། གླང་པོ་ཆེའི་དགོན་པ་ན་གླང་པོ་ཆེ་གཅིག་པུ་རྒྱུ་ཞིང་གཅིག་པུ་གནས་པ་བཞིན་དུ་ཐར་པ་ཡང་དེ་དང་འདྲའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །རྣམ་པར་སྤོང་བ་རྣམ་པར་སྤོང་བ་ཞེས་བྱ་བ་ནི་བདག་མེད་པ་གཟུང་བར་བསྟན་ཏེ། དེ་ནི་དེ
75b4 བཞིན་གཤེགས་པའི་སྙིང་པོ་ལ་འཇུག་པའོ། །ཇི་ལྟར་ཨེ་རཎྜ་དང་། འདམ་བུའི་སྡོང་བུ་ནི་འབྲས་བུ་མ་གཏོགས་པར་ཐོག་ཐག་ཏུ་སྙིང་པོ་མེད་པ་དེ་བཞིན་དུ་ལྷ་དང་མི་དང་ལྷ་མ་ཡིན་གྱི་ལུས་ཐམས་ཅད་ནི་དེ་བཞིན་གཤེགས་པའི་སྙིང་པོ་མ་གཏོགས་པ་ཐམས་ཅད་ཨེ་རཎྜ་དང་འདམ་བུ
75b5 བཞིན་དུ་སྙིང་པོ་མེད་དོ། །སྲིད་པ་སྙིང་པོ་མེད་པ་ཐམས་ཅད་རྣམ་པར་སྤངས་པ་ནི་ཐར་པའོ། །ཐར་པ་ནི་རང་ལ་བརྡ་སྤྲོད་པ་ཡིན་ཏེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྤོང་བ་སྤོང་བ་ཞེས་བྱ་བ་ནི་ཁ་ཟས་མ་ཞུ་བས་ཁ་ཟས་མ་ཚོས་པ་སྤོང་བ་བཞིན་དུ་སྲིད་པ་ཐམས
75b6 ཅད་བཅད་པ་དང་སྤངས་པ་སྟེ། དེ་ལྟར་ན་ཐར་པ་ནི་མཁས་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །རང་སངས་རྒྱས་ཀྱི་ཆོས་རང་སངས་རྒྱས་ཀྱི་ཆོས་ཞེས་བྱ་བ་ནི་ཇི་ལྟར་ཀླུ་ཤིང་གི་མེ་ཏོག་པ་མཁལ་གྱི་མེ་ཏོག་མ་ཡིན་པ་བཞིན་དུ་ཐར་པ་ཡང་དེ་དང་འདྲ་སྟེ། ཐར་པ་གང
75b7 ཡིན་པ་དེ་ནི་དེ་བཞིན་གཤེགས་པའོ། །ཁམས་ཁམས་ཞེས་བྱ་བ་ལ་ཁམས་དེ་ནི་སེམས་ཅན་ཐམས་ཅད་ཀྱི་ཁམས་སོ། །སྲོག་དེ་ནི་སེམས་ཅན་ཐམས་ཅད་ཀྱི་སྲོག་གོ། །ཐར་པ་ཡང་དེ་དང་འདྲ་སྟེ། ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སྐྱེ་མཆེད་སྐྱེ་མཆེད་ཅེས་བྱ་བ་ནི་གང
iiif viewer powered by OpenSeadragon
