| e-texts navigator |
| Wylie |
44b1 གཉིས་སྒོམ་པ་དེ་དག་ནི་རིང་པོ་མི་ཐོགས་པ་ཁོ་ནར་ངའི་གོ་འཕང་དང་ལྷག་ཆད་མེད་པ་ཐོབ་པར་འགྱུར་རོ། །རིགས་ཀྱི་བུ་གང་གི་ཚེ་རྟག་གོ་ཞེས་བྱ་བའི་ཡི་གེ་གཉིས་སྒོམ་པ་ནུབ་པར་འགྱུར་བ་དེའི་ཚེ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ
44b2 བར་འགྱུར་ཏེ། དེ་ནི་སངས་རྒྱས་རྣམས་ཀྱི་ཆོས་ཉིད་དོ། །གསོལ་པ། བཅོམ་ལྡན་འདས་སངས་རྒྱས་རྣམས་ཀྱི་ཆོས་ཉིད་ཅེས་བཀའ་སྩལ་པ་དེའི་དོན་ཅི་ལགས། བཅོམ་ལྡན་འདས་བདག་ནི་ཆོས་གླེངས་པ་འདི་རྟོགས་པར་འཚལ་ན། བཅོམ
44b3 ལྡན་འདས་ཀྱིས་ཚིག་འདི་ཇི་ལྟ་བུ་ལགས་པ་རྒྱས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཆོས་ཉིད་ཅེས་བྱ་བ་ནི་ལུས་ཡོངས་སུ་འདོར་བ་སྟེ། ལུས་ཡོངས་སུ་འདོར་བ་ཞེས་བྱ་བ་དེ་ནི་སྨད་པའི་ཚིག་ཡིན་པར་ཤེས་པར་གྱིས་ཤིག་།
44b4 གསོལ་པ། དེ་བཞིན་གཤེགས་པས་སྐུ་བོར་ནས་སླར་ཡང་སྐུ་ལེན་ཏམ་མི་ལེན་པ་བདག་ཞུ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག་།འདི་ནི་ཆོས་ཉིད་དཔྱོད་པ་ཡིན་ཏེ། རིགས་ཀྱི་བུ་དཔེར་ན་འདུ
44b5 ཤེས་མེད་པ་རྣམས་ལ་གཟུགས་ཀྱི་ཕུང་པོ་དང་། འདུ་ཤེས་ཀྱི་ཕུང་པོ་གཉིས་མེད་ན་སེམས་ཅན་དེ་དག་ཇི་ལྟར་གནས། ཇི་ལྟར་གདའ། ཇི་ལྟར་སྣང་། དེ་དག་གི་འདུ་ཤེས་ཇི་ལྟར་འཇུག་ཅེས་འདྲི་བ་འདི་ནི་སངས་རྒྱས་ཀྱི་ཡུལ་ཡིན་ནོ། །རིགས་ཀྱི་བུ
44b6 འདུ་ཤེས་མེད་པའི་ལྷ་རྣམས་ཀྱི་གཟུགས་དང་། གནས་དང་། སྤྱོད་ལམ་དང་། བདེ་བ་རྣམས་ཇི་ལྟར་བསྟན་པར་བྱ་ཞེས་ཕྱིན་ཆད་དེ་སྐད་མ་འདྲི་ཤིག་།འདི་ནི་ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ཏེ། འདི་ནི་སངས་རྒྱས་ཀྱི་སྤྱོད་ཡུལ་ཡིན་ནོ། །
44b7 རིགས་ཀྱི་བུ་དེ་ལྟར་ན་དེ་བཞིན་གཤེགས་པའི་སྐུ་ནི་སངས་རྒྱས་འབའ་ཞིག་གི་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ནོ། །དེ་བཞིན་གཤེགས་པ་གང་ན་གནས་པ་དང་། གང་ན་སྣང་བ་ནི་ཁྱོད་ཀྱི་ཡུལ་ཡང་མ་ཡིན་གྱིས། སངས
iiif viewer powered by OpenSeadragon
