| e-texts navigator |
| Wylie |
26b1 ལྟ་བུའི་བྱམས་པ་དང་ལྡན་པ་མ་ཡིན་གྱི། སེམས་ཅན་ཐམས་ཅད་ལ་ཡང་སྒྲ་གཅན་ཟིན་དང་འདྲ་བར་གཟིགས་ཏེ། སངས་རྒྱས་ཀྱི་ཤེས་རབ་ཀྱི་ཡུལ་ནི་དེ་ལྟ་བུ་ཡིན་ནོ། །བཙུན་པ་འཇམ་དཔལ་དཔེར་ན་རྟ་ཅང་ཤེས་དང་སྦྱར་བའི་ཤིང་རྟ་རྒྱུག་པའི་ཟླ
26b2 ལ་བོང་བུའི་ཤིང་རྟ་རྒྱུག་པ་མི་སྲིད་པ་དེ་བཞིན་དུ། འུ་བུ་ཅག་བོང་བུའི་ཤིང་རྟ་དང་འདྲ་བ་དག་གིས་དེ་བཞིན་གཤེགས་པའི་ཤེས་རབ་དང་འདྲ་བ་དང་། དགོངས་པའི་ཚིག་དང་མཉམ་དུ་འགྲོ་བར་ནུས་རེ་སྐན། དཔེར་ན་ནམ་མཁའ་ལྡིང་དཔག་ཚད་དུ་མར་འགྲོ
26b3 བ་ནམ་མཁའ་ལ་གནས་པས་ཆུའི་ནང་ན་ཉ་དང་རུ་སྦལ་འཁོད་པ་རྣམས་མེ་ལོང་གི་ངོས་ལ་རང་གི་གཟུགས་བརྙན་སྣང་བ་བཞིན་དུ་གསལ་བར་མཐོང་ཡང་། བྱིས་པ་རྣམས་ཀྱིས་ནི་མིག་མི་གསལ་བའི་ཕྱིར་དེའི་མིག་གི་རྩལ་བརྗོད་པར་མི་ནུས་པ་དེ་བཞིན་དུ
26b4 དེ་བཞིན་གཤེགས་པའི་ཡང་དེ་རང་འདྲའོ། །འཇམ་དཔལ་གྱིས་སྨྲས་པ། སྐུལ་བྱེད་དེ་ནི་དེ་བཞིན་ཏེ། བདག་གིས་ནི་བྱང་ཆུབ་སེམས་དཔའ་རྣམས་ཀྱི་ཆེ་བ་ཉིད་གླེང་བའི་ཕྱིར་དེ་སྐད་དུ་བརྒལ་བར་ཟད་དོ། །དེ་ནས་དེའི་ཚེ་བཅོམ་ལྡན་འདས་ཀྱི་ཞལ
26b5 ནས་འོད་ཟེར་རྣམ་པ་སྣ་ཚོགས་བཀྱེ་ནས། དེ་དག་གིས་འཇམ་དཔལ་གཞོན་ནུར་གྱུར་པའི་ལུས་ལ་ཕོག་གོ་།དེ་ནས་འཇམ་དཔལ་གྱིས་དེ་རྟོགས་ནས་མགར་བའི་བུ་སྐུལ་བྱེད་ལ་སྨྲས་པ། སྐུལ་བྱེད། དེ་བཞིན་གཤེགས་པ་ཡོངས་སུ་མྱ་ངན་ལས
26b6 འདའ་བར་། དུས་སུ་བཅོམ་ལྡན་འདས་ལ་བཤོས་འདྲིམ་དུ་ཆུག་ཤིག་།མ་ཐོགས་ཤིག་།རྒྱུ་མེད་པར་བཅོམ་ལྡན་འདས་ཀྱི་ཞལ་ནས་འོད་ཟེར་རྣམས་འབྱུང་བར་མི་འགྱུར་རོ། །དེ་ནས་སྐུལ་བྱེད་ཅང་མི་ཟེར་བར་འདུག་གོ། །དེ་ནས་བཅོམ་ལྡན
26b7 འདས་ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད་ང་ཡོངས་སུ་མྱ་ངན་ལས་འདའ་བར་འགྲོར་ངེས། དགེ་སློང་གི་དགེ་འདུན་ལ་དུས་སུ་ཟས་འདྲིམ་དུ་ཆུག་ཤིག་ཅེས་ལན་གཉིས་ལན་གསུམ་དུ་བཀའ་སྩལ་ཏོ། །དེ་ནས་སྐུལ་བྱེད་ཀྱིས་འདི་སྐད
iiif viewer powered by OpenSeadragon
