| e-texts navigator |
| Wylie |
152a1 མཆོད་རྟེན་གྱི་ནོར་ཁྱིམ་ན་གནས་པ་དང་། རྒྱལ་པོའི་ཕོ་བྲང་དུ་བསྡུ་བ་བྱས་ནས་རྣམ་པར་འཇིག་པར་བྱེད་པར་འབྱུང་བར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ཕྲག་དགུ་པ་ལ་ནི་བསྟན་པ་ལས་སྙིང་པོར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང
152a2 ཁྱིམ་གྱི་བྱ་བའི་ལས་བྱེད་པ་ལ་བརྩོན་པར་འགྱུར་རོ། །ཞིང་གི་ལས་ཀྱི་མཐའ་ལ་དགའ་བ་དང་། ཉོ་ཚོང་ལ་མངོན་པར་དགའ་བ་དང་། འདོད་པ་ལ་རབ་ཏུ་འཇུག་ཅིང་ཕོ་ཉར་གཏོང་བས་འཚོ་བ་བསྒྲུབ་པར་འགྱུར་བ་དང་། ལེ་ལོ་ཅན་དུ་འགྱུར་བ་དང་། དེ་བཞིན་གཤེགས་པས་ལེགས་པར་བཅས་པའི་བསླབ་པ
152a3 རྣམས་བསྲུང་བར་མི་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་ལོ་སྟོང་གི་ནི་བསྟན་པ་ལ་གཏམ་གྱི་སྙིང་པོར་བྱེད་པར་འགྱུར་རོ། །ངའི་ཉན་ཐོས་རྣམས་ཀྱང་གཏམ་སྣ་ཚོགས་ལ་མངོན་པར་དགའ་བ་དང་ལྡན་པར་འགྱུར་ཞིང་གང་གི་འཇིག་རྟེན་ལས་འདས་པའི་སངས་རྒྱས་ཀྱི་གསུང་འདི་ལྟ་སྟེ།
152a4 མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་སྡེ་དང་། ཆོས་རྣམ
152a5 པར་གཏན་ལ་དབབ་པར་བསྟན་པའི་སྡེ་རྣམས་སྤངས་ནས་སྦྱོར་བ་གཞན་དང་ལྡན་པར་གནས་པར་འགྱུར་ཏེ། འདི་ལྟ་སྟེ་རྒྱལ་པོའི་གཏམ་དང་། རྐུན་པོའི་གཏམ་དང་། ཐབ་མོའི་གཏམ་དང་། ཟས་ཀྱི་གཏམ་དང་། བཏུང་བའི་གཏམ་དང་། གྲོགས་ཀྱི་གཏམ་དང་། བདག་གི་གཏམ་དང་། ཁྱད་པར་གྱི་གཏམ་དང་། གཞོན་ནུའི
152a6 གཏམ་དང་། གཞོན་ནུ་མའི་གཏམ་དང་། གྲོང་ཁྱེར་གྱི་གཏམ་དང་། རྒྱ་མཚོའི་གཏམ་སྟེ། དེ་ལྟ་བུ་ལ་སོགས་པའི་གཏམ་རྣམས་ལ་ངེས་པར་དགའ་བར་འགྱུར་རོ། །དགེ་སྦྱོང་དང་བྲམ་ཟེ་རྣམས་ཀྱང་ངའི་དམ་པའི་ཆོས་སྤོང་བར་བྱེད་པར་འགྱུར་རོ། །ཆོས་འདུལ་བ་འདི་ལ་བཏང་སྙོམས་སུ་བྱེད་པར་འགྱུར་རོ། །གང་དགེ་སློང
152a7 རྣམས་དང་། དགེ་སློང་མ་རྣམས་དང་། དགེ་བསྙེན་དང་། དགེ་བསྙེན་མ་རྣམས་ཏེ། དེ་དག་ཀྱང་ལུས་མ་བསྒོམས་པ་དང་། ཚུལ་ཁྲིམས་མ་བསྒོམས་པ་དང་། ཤེས་རབ་མ་བསྒོམས་པ་དང་། འཐབ་པར་བྱེད་པ་དང་། མཚང་འདྲུ་ཞིང་རྩོད་པར་སྨྲ་བ་ལ་བརྩོན་པར་བྱེད་པར་འགྱུར་རོ། །ལྷུང་བཟེད་བཟང་པོ་དང་ཆོས་གོས་བཟང
iiif viewer powered by OpenSeadragon
