| e-texts navigator |
| Wylie |
145b1 འདོད་ཆེན་པ་དེ་ལྟ་བུ་ལ་ནི། ཐམས་ཅད་དུ་སྦྱིན་པ་འབྲས་བུ་ཆེ་བ་མ་ཡིན་ནོ། །དགྲ་བཅོམ་པ་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །རང་སངས་རྒྱས་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །དེ་བཞིན་གཤེགས་པ་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །དེ་བས
145b2 ན་ཐམས་ཅད་དུ་སྦྱིན་པའི་འབྲས་བུ་ཆེ་བ་མ་ཡིན་ནོ། །གསོལ་པ། ཅིའི་སླད་དུ། བཅོམ་ལྡན་འདས་ཀྱིས་ཚིགས་སུ་བཅད་པ་འདིའི་དོན་རྣམ་པ་གཉིས་སུ་བཀའ་སྩལ་ལགས། བཀའ་སྩལ་པ། རྒྱུ་ལས་འགྱུར་ཏེ་སྔོན་རྒྱལ་པོའི་ཁབ་ཀྱི་དགེ་བསྙེན་དད་པ་མེད་པ་གཅེར་བུ་པ་ལ་དགའ་བ
145b3 ཞིག་ཡོད་པ་དེས། ང་ལ་སྦྱིན་པ་བྱས་པ་ཅིར་འགྱུར་བ་དྲིས་པ་དེའི་ཚེ། དེ་དྲང་བའི་ཕྱིར་སྦྱིན་པ་ཀུན་ཏུ་བསྔགས་པ་ཡིན་ཞེས་བྱ་བའི་ཚིགས་སུ་བཅད་པ་དེ་དེ་ལ་བསྟན་ཏོ། །དེ་ནི་བྱང་ཆུབ་སེམས་དཔའ་རྣམས་ཀྱི་དོན་དུ་ཚིགས་སུ་བཅད་པའི་དོན་དགོངས་པའི་ཚིག་ཏུ་བསྟན་ཏེ། དུས་ཐམས
145b4 ཅད་དུ་ཚིགས་སུ་བཅད་པའི་དོན་འདྲ་བར་བསྟན་པ་མ་ཡིན་ནོ། །ཐམས་ཅད་ཅེས་བྱ་བ་ནི་སྐབས་དང་སྦྱར་ཏེ་ཚིག་གི་ལྷག་མ་ཡོད་པར་རིག་པར་བྱའོ། །བྱང་ཆུབ་སེམས་དཔའ་མི་མཆོག་གིས་ནི། ཚུལ་ཁྲིམས་འཆལ་བ་རྣམས་ཞིང་གི་ངོ་བཞིན་དུ་ཚར་གཅད་པར་བྱའོ། །རིགས་ཀྱི་བུ་གཞན
145b5 ཡང་ངས་སྔོན་ཚིགས་སུ་བཅད་པ་འདི་བསྟན་ཏེ། འདི་ལྟ་སྟེ། ཆུ་ཀླུང་ཆུ་ཀུན་གྱ་གྱུར་འབབ། །ནགས་ཚལ་ཀུན་ནི་ཤིང་ཉིད་ཡིན། །བུད་མེད་ཀུན་ལ་གཡོ་སྒྱུ་ཡོད། །དབང་ཕྱུག་ཐམས་ཅད་བདེ་བ་ཡིན། །བུད་མེད་རྣམས་ཀྱི་སེམས་ནི་གཡོ་སྒྱུ་ཅན་དང་འཇིགས་སུ་རུང་བ་ཡིན་ནོ། །
145b6 དེ་བས་ན་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་སླར་ཚིགས་སུ་བཅད་དེ་གསོལ་པ། ཆུ་ཀུན་གྱ་གྱུར་འབབ་མ་ལགས། །ནགས་ཚལ་ཀུན་ཀྱང་ཤིང་མ་ལགས། །བུད་མེད་ཀུན་ལའང
145b7 གཡོ་མ་མཆིས། །དབང་ཕྱུག་ཀུན་ཀྱང་བདེ་མ་ལགས། །དེ་བས་ན་བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་དེ་ནི་ལེགས་པར་བཀའ་སྩལ་པ་མ་ལགས་ཏེ། འདི་ལ་རྒྱུ་ཅི་མཆིས་པ་བཀའ་སྩལ་འཚལ་ལགས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས
iiif viewer powered by OpenSeadragon
