| e-texts navigator |
| Wylie |
90a1 དམ་པ་མ་ཡིན་ནོ། །ཚིག་གིས་གང་བརྗོད་པར་བྱ་བའང་དོན་དམ་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟ་སྟེ། འཕགས་པའི་ཡེ་ཤེས་དོན་དམ་པའི་བདེན་པ་བརྗོད་པས་དོན་དམ་པ་ལ་འཇུག་པའི་ཕྱིར་ཚིག་ཉིད་ནི་དོན་དམ་པ་མ་ཡིན་ནོ། །བློ་གྲོས་ཆེན་པོ་དོན་དམ་པ་ནི
90a2 འཕགས་པ་སོ་སོ་རང་གིས་རིག་པའི་ཡེ་ཤེས་ཀྱིས་རྟོགས་པར་བྱ་བ་ཡིན་ཏེ། ཚིག་གི་རྣམ་པར་རྟོག་པའི་བློའི་སྤྱོད་ཡུལ་མ་ཡིན་ནོ། །དེ་བས་ན་རྣམ་པར་རྟོག་པ་ནི་དོན་དམ་པ་རྗོད་པར་མི་བྱེད་དོ། །བློ་གྲོས་ཆེན་པོ་ཚིག་ནི་སྐྱེས་ནས་འཇིག་ཅིང་མི་བརྟན་པ། ཕན་ཚུན་གྱི་རྒྱུ་དང་རྐྱེན་ལས་བྱུང་ངོ་། །
90a3 བློ་གྲོས་ཆེན་པོ་གང་ཕན་ཚུན་གྱི་རྒྱུ་དང་རྐྱེན་ལས་བྱུང་བ་དེ་ནི་དོན་དམ་པར་རྗོད་པར་མི་བྱེད་དོ། །བློ་གྲོས་ཆེན་པོ་བདག་དང་གཞན་གྱི་མཚན་ཉིད་མེད་པའི་ཕྱིར་ཚིག་ནི་མཚན་ཉིད་རྗོད་པར་མི་བྱེད་དོ། །བློ་གྲོས་ཆེན་པོ་གཞན་ཡང་རང་གི་སེམས་སྣང་བ་ཙམ་གྱི་རྗེས་སུ་འབྲང་བ་དང་། ཕྱི་རོལ་གྱི་དངོས
90a4 པོ་རྣམ་པ་ཐ་དད་པ་སྣ་ཚོགས་ཀྱི་མཚན་ཉིད་མེད་པས་རྣམ་པར་རྟོག་པ་ནི་དོན་དམ་པ་ལ་མི་རྟོག་གོ། །དེ་བས་ན་བློ་གྲོས་ཆེན་པོ་ཁྱོད་ཀྱིས་ཚིག་རྣམ་པ་སྣ་ཚོགས་ཀྱི་རྣམ་པར་རྟོག་པ་དང་བྲལ་བར་བྱའོ། །དེ་ལ་འདི་སྐད་ཅེས་བྱ་སྟེ། དངོས་པོ་ཀུན་གྱི་རང་བཞིན་མེད། །ཚིག་ཀྱང་དེ་བཞིན་མེད་པ་སྟེ། །
90a5 སྟོང་པ་ཉིད་དམ་སྟོང་ཉིད་དོན། །བྱིས་པས་མ་མཐོང་རྣམ་པར་རྒྱུག་།དངོས་པོ་ཐམས་ཅད་རང་བཞིན་མེད། །མི་ཡི་ཚིག་ཀྱང་བརྟགས་པ་སྟེ། །དེ་ཡང་ཡོད་པ་མ་ཡིན་ནོ། །སྙིང་པོ་རྨི་ལམ་སྤྲུལ་འདྲ་བར། །ཡོངས་སུ་བརྟགས་པར་བྱས་པ་ནི། །མི་འཁོར་མྱ་ངན་འདའ་མི་བྱ། །ཇི་ལྟར
90a6 རྒྱལ་པོ་ཚོང་དཔོན་དག་། འཇི་བའི་སྣ་ཚོགས་ཀྱིས། །བུ་རྣམས་བྲིད་དེ་རྩེར་བཅུག་ཅིང་། །དེ་ནས་དངོས་བྱིན་པ། །དེ་བཞིན་ངས་ཀྱང་ཆོས་རྣམས་ཀྱི། མཚན་ཉིད་སྣ་ཚོགས་གཟུགས་བརྙན་གྱིས། །སོ་སོ་རང་རིག་ཡང་དག་མཐའ། །བུ་རྣམས་ལ་ནི་ངས་བཤད
90a7 དོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ཀྱི་རང་གི་སེམས་སྣང་བའི་སྤྱོད་ཡུལ་རྟོགས་པ། རྣམ་པར་ཕྱེ་བའི་མཚན་ཉིད་མཆིས་པ་དང་། མ་མཆིས་པ་དང་། གཅིག་པ
iiif viewer powered by OpenSeadragon
