| e-texts navigator |
| Wylie |
71a1 མྱུ་གུའི་བྱ་བ་མི་བྱེད་དེ། བློ་གྲོས་ཆེན་པོ་དེ་བཞིན་དུ་ཕུང་པོ་དང་ཁམས་དང་། སྐྱེ་མཆེད་ཀྱི་དངོས་པོ་དེ་དག་འགགས་པ་དང་། འགག་པ་དང་། འགག་པར་འགྱུར་བ་ནི་བདག་ནི་སེམས་སྣང་བ་རྣམ་པར་རྟོག་པ་མཐོང་བའི་རྒྱུ་ལས་བྱུང་བས་དེ་དག་ནི་རྒྱུན་མི་ཆད་པར་འབྱུང་བ
71a2 མེད་དོ། །བློ་གྲོས་ཆེན་པོ་གལ་ཏེ་མ་བྱུང་བའམ། ཡོད་པ་ལས་རྣམ་པར་ཤེས་པ་རྣམ་གསུམ་ཕྲད་པའི་རྐྱེན་གྱི་བྱེད་པ་ལྡན་པ་ལས་འབྱུང་དུ་ཟིན་ན་ནི་བློ་གྲོས་ཆེན་པོ་རུ་སྦལ་གྱི་སྤུ་ལྟ་བུ་མེད་པ་རྣམས་དང་། བྱེ་མ་ལས་ཀྱང་འབྲུ་མར་འབྱུང་བར་འགྱུར་རོ། །བློ་གྲོས་ཆེན་པོ་ཡོད་པ་དང་མེད་པ
71a3 ལས་འབྱུང་བར་སྨྲ་བ་ལས་དམ་བཅས་པ་ཉམས་པ་དང་། ངེས་པ་ལས་འགལ་བ་དང་། བྱ་བ་དང་ལས་དང་བྱེད་པ་དོན་མེད་པར་ཡང་འགྱུར་རོ། །བློ་གྲོས་ཆེན་པོ་དེ་དག་ལ་ཡང་གསུམ་ཕྲད་པའི་རྐྱེན་གྱི་བྱེད་པ་དང་ལྡན་པས་རྒྱུ་དང་འབྲས་བུ་དང་། རང་གི་མཚན་ཉིད་དུ་སྟོན་པ་ཡོད་དེ། འདས
71a4 པ་དང་། མ་འོངས་པ་དང་། ད་ལྟར་བྱུང་བའི་ཡོད་པ་དང་། མེད་པའི་མཚན་ཉིད་ཡོད་པར་རིག་པ་དང་། གཞུང་གིས་བརྟགས་པའི་ས་ལ་གནས་ཤིང་རང་གི་ལྟ་བ་ཉེས་པའི་བག་ཆགས་ཀྱིས་སྟོན་ཏེ། བློ་གྲོས་ཆེན་པོ་དེ་ལྟར་བྱིས་པ་སོ་སོའི་སྐྱེ་བོ་རྣམས་ཉེས་པའི་ལྟ་བས་ཟིན་པ་མི་མཉམ་པའི
71a5 བློ་ཅན་རྣམས་མི་ཤེས་པས་བསྟན་པ་ལ་ཐམས་ཅད་མཁྱེན་པས་བསྟན་ཏོ་ཞེས་ཟེར་རོ། །བློ་གྲོས་ཆེན་པོ་དགེ་སྦྱོང་ངམ་བྲམ་ཟེ་གང་ལ་ལ་རང་བཞིན་མེད་པ་སྤྲིན་དང་མགལ་མེ་བསྐོར་བ་དང་། དྲི་ཟའི་གྲོང་ཁྱེར་དང་། མ་སྐྱེས་པ་དང་། སྒྱུ་མ་དང་། སྨིག་རྒྱུ་བ་དང་། ཆུའི་ཟླ་བ་དང་། རྨི
71a6 ལམ་དང་། ཕྱི་རོལ་དུ་སེམས་ཀྱི་སྣང་བ་རྣམ་པར་རྟོག་པ་དང་ཐོག་མ་མེད་པའི་དུས་ཀྱི་སྤྲོས་པ་མཐོང་བས་རང་གི་སེམས་སྣང་བ། རྣམ་པར་རྟོག་པའི་རྐྱེན་ཕྱིར་ལྡོག་པ་མེད་པ། ཡོངས་སུ་བརྟགས་པའི་བརྗོད་པ་དང་། མཚན་དང་མཚན་གྱི་གཞི་དང་། བརྗོད་པར་བྱ་བ་དང་བྲལ་བ། ལུས་དང
71a7 ལོངས་སྤྱོད་དང་། གནས་སུ་སྣང་བའི་ཀུན་གཞི་རྣམ་པར་ཤེས་པ་དང་། ཡུལ་དང་། གཟུང་བ་དང་། འཛིན་པ་དང་རྣམ་པར་བྲལ་བ། སྣང་བ་མེད་པའི་སྤྱོད་ཡུལ། སྐྱེ་བ་དང་གནས་པ་དང་འཇིག་པ་སྤངས་པ། བདག་གི་སེམས་སྐྱེ་བ་དང་ལྡན་པ་རྣམ་པར་བསྒོམ་པར་འགྱུར་ཏེ། བློ་གྲོས་ཆེན
iiif viewer powered by OpenSeadragon
