| e-texts navigator |
| Wylie |
61b1 རྣམ་པ་མང་པོར་རྣམ་པར་འགྱུར་བ། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་དང་། ཚངས་པ་དང་། དབང་པོ་དང་། ཉེ་བའི་དབང་པོ་རྣམས་ཀྱིས་སྔོན་མ་མཐོང་བ་དེའང་ཐོབ་པར་འགྱུར་བར་ཁྱོད་ཀྱི་སེམས་རངས་པར་བྱའོ། །དེ་ནས་ལང་ཀའི་བདག་པོ་ལྷ་མོ་དང
61b2 བཅས་པའི་ཚོགས་ཀྱིས་ཡོངས་སུ་བསྐོར་བ། བཅོམ་ལྡན་འདས་ཀྱིས་སྐབས་ཕྱེ་བས་རིན་པོ་ཆེའི་པད་མོའི་འོད་ཟེར་གྱིས་དྲི་མ་མེད་པའི་འོད་རིན་པོ་ཆེའི་པད་མོ་དང་འདྲ་བའི་རིན་པོ་ཆེའི་རྩེ་མོ་དེ་ནས་ལངས་ནས་མེ་ཏོག་དང་། ཕྲེང་བ་དང་། སྤོས་དང་། བདུག་པ་དང་། བྱུག་པ་དང་།
61b3 གདུགས་དང་། རྒྱལ་མཚན་དང་། ལྷའི་བ་དན་དང་། སེ་མོ་དོ་དང་། དོ་ཤལ་དང་། ཅོད་པན་དང་། ཐོར་ཚུགས་རྣམ་པ་དུ་མ་རྣམ་པ་ཐ་དད་པ་སྣ་ཚོགས་དང་། སྔོན་མ་མཐོང་མ་ཐོས་པའི་རྒྱན་གྱི་ཁྱད་པར་རྣམ་པར་འཕགས་པ་གཞན་དག་དང་། ལྷ་དང་། ཀླུ་དང་། གནོད་སྦྱིན
61b4 དང་། སྲིན་པོ་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་ལས་ལྷག་པ་ལས་ཀྱང་འདས་པའི་རྔ་དང་། སིལ་སྙན་རྣམས་དང་། འདོད་པའི་ཁམས་སུ་གཏོགས་པའི་རོལ་མོའི་ཆ་བྱད་ཐམས་ཅད་ཀྱང་རྣམ་པར་སྤྲུལ། གང་ཡང་སངས་རྒྱས་ཀྱི་ཞིང་གཞན་གྱི་རོལ་མོའི
61b5 ཁྱད་པར་མཐོང་བ་དེ་དག་ཀྱང་མངོན་པར་སྤྲུལ། བཅོམ་ལྡན་འདས་དང་བྱང་ཆུབ་སེམས་དཔའ་རྣམས་ལ་རིན་པོ་ཆེའི་དྲ་བས་ནི་མངོན་པར་བཀབ། གོས་སྣ་ཚོགས་ཀྱི་ལྷའི་བ་དན་ནི་རབ་ཏུ་བསྒྲེང་། ཏ་ལ་བདུན་ཙམ་དུ་ནི་ནམ་མཁའ་ལ་མངོན་པར་འཕགས། མཆོད་པའི་སྤྲིན་ཆེན་པོའི་ཆར་ནི
61b6 མངོན་པར་ཕབ། རྔ་དང་སིལ་སྙན་རྣམས་ཀྱི་སྒྲ་ནི་རབ་ཏུ་ཕྱུང་སྟེ། ནམ་མཁའ་དེ་ལས་བབས་ནས་ཉི་མ་དང་། གློག་གི་འོད་ལྟ་བུ་རིན་པོ་ཆེའི་པད་མོ་ཆེན་པོས་བརྒྱན་པའི་རིན་པོ་ཆེའི་རྩེ་མོ་གཉིས་པ་ལ་འདུག་གོ། །འདུག་ནས་ཞེ་སར་འཛུམ་པ་སྔོན་དུ་བྱས་ཏེ། བཅོམ་ལྡན་འདས་ཀྱིས་གོ
61b7 སྐབས་ཕྱེ་བས། བཅོམ་ལྡན་འདས་ལ་དྲི་བ་གཉིས་དྲིས་སོ། །སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལའང་བདག་གིས་ཞུས་ནས། དེ་རྣམས་ཀྱིས་ཀྱང་ལན་བླན་ཏེ། བཅོམ་ལྡན་འདས་ལའང་ད་ཞུའོ། །བསྟན་པ་བརྗོད་པ་ལས་ཀྱང
iiif viewer powered by OpenSeadragon
