| e-texts navigator |
| Wylie |
61a1 པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དྲི་བ་གཉིས་དྲིས་སོ། །ད་ང་ལ་ཡང་གང་ཉན་ཐོས་དང་། རང་སངས་རྒྱས་དང་། མུ་སྟེགས་ཅན་གྱི་རྣལ་འབྱོར་ལ་རྣལ་འབྱོར་པ་རྣམས་ཀྱིས་མ་མྱོང་བའི་དྲི་བ་གཉིས་ཀྱི་བྱེ་བྲག་ཁོང་དུ་ཆུད་པའི་མཚན་ཉིད་རྣམ་པར
61a2 བསྒོམ་པའི་ཕྱིར་དྲི་བར་འདོད་དོ། །འདི་ལྟར་འདྲི་བར་འདོད་པའི་མགྲིན་བཅུ་འདི་ནི་མ་འོངས་པའི་རྒྱལ་བ་རྣམས་ལའང་འདྲི་བར་འགྱུར་རོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ། ལང་ཀའི་བདག་པོ་ལ་འདི་སྐད་ཅེས་བཀའ་སྩལ་ཏོ། །ལང་ཀའི་བདག་པོ་ཁྱོད་ལ་དེ་བཞིན
61a3 གཤེགས་པས་སྐབས་ཕྱེས། ཅོད་པན་རབ་ཏུ་གཡོ་བ་མ་སྡོང་བར་ཅི་དང་ཅི་འདོད་པ་ང་ལ་དྲིས་ཤིག་དང་། ངས་དྲི་བ་དེ་དང་དེའི་ལུང་བསྟན་པས་ཇི་ལྟར་ཁྱོད་རྣམ་པར་རྟོག་པའི་གནས་ཤིན་ཏུ་གྱུར་ནས། སའི་མི་འཐུན་པའི་ཕྱོགས་ལ་མཁས་ཤིང་རབ་ཏུ་འབྱེད་པའི་བློས་སོ་སོ་རང་གི་རིག་པའི
61a4 ཚུལ་གྱིས་མཚན་ཉིད་ཀྱི་ཏིང་ངེ་འཛིན་གྱི་བདེ་བར་གནས་པ་ལ་རྣམ་པར་དཔྱོད་ཅིང་ཏིང་ངེ་འཛིན་གྱི་སངས་རྒྱས་རྣམས་ཀྱིས་ནི་ཡོངས་སུ་བཟུང་། ཞི་བའི་བདེ་བ་ལ་ནི་རྣམ་པར་གནས་ཏེ། ཉན་ཐོས་དང་རང་སངས་རྒྱས་ཀྱི་ཏིང་ངེ་འཛིན་གྱི་ཉེས་པ་ལས་འདས་ནས་མི་གཡོ་བ་དང་། དགེ་བའི
61a5 བློ་གྲོས་དང་། ཆོས་ཀྱི་སྤྲིན་གྱི་ས་ལ་ནི་རྣམ་པར་གནས། ཆོས་ལ་བདག་མེད་པའི་ཡང་དག་པ་ཇི་ལྟ་བ་བཞིན་ལ་ནི་རབ་ཏུ་མཁས་པས་རིན་པོ་ཆེའི་པད་མོ་ཆེན་པོ་བཏིང་བ་ལ་ཏིང་ངེ་འཛིན་གྱི་རྒྱལ་བས་དབང་བསྐུར་བ་ཐོབ་པར་འགྱུར་ཞིང་། དེ་དང་རྗེས་སུ་འཐུན་པའི་པད་མོ་དག་ལ་བདག་གི
61a6 ལུས་རྣམ་པ་སྣ་ཚོགས་སུ་བྱིན་གྱི་རླབས་ཀྱིས་བྱིན་དུ་བརླབས་ཏེ། པད་མོ་དེ་དག་ལ་བདག་གི་ལུས་འདུག་པ་མཐོང་བར་འགྱུར་བ་དང་། གཅིག་གིས་གདོང་ལ་གཅིག་ལྟ་བར་ཡང་བྱེད་པར་འགྱུར་བ་དང་། དེ་ལྟར་གང་གི་ཕྱིར་བསམ་གྱིས་མི་ཁྱབ་པའི་ཡུལ་དེ་ནི་མངོན་པར་སྒྲུབ་པ་ལ
61a7 མཁས་པ། གཅིག་གིས་མངོན་པར་བསྒྲུབ་པ་ཡིན་ཏེ། སྤྱོད་པའི་ས་ལ་གནས་ཤིང་ཐབས་མཁས་པས་ཡོངས་སུ་བཟུང་བའི་མངོན་པར་བསྒྲུབ་པ་མངོན་པར་བསྒྲུབས་པས། བསམ་གྱིས་མི་ཁྱབ་པའི་ཡུལ་དེའང་རྗེས་སུ་འཐོབ་པར་འགྱུར་བ་དང་། དེ་བཞིན་གཤེགས་པའི་ས་གཟུགས
iiif viewer powered by OpenSeadragon
