| e-texts navigator |
| Wylie |
60b1 དོ། །དེ་ནས་བྱང་ཆུབ་སེམས་དཔའི་འཁོར་དེ་དང་། བརྒྱ་བྱིན་དང་། ཚངས་པ་ལ་སོགས་པ་དེ་དག་འདི་སྙམ་དུ་སེམས་ཏེ། རྒྱུ་གང་དང་རྐྱེན་གང་གིས་དེ་ལྟར་བཅོམ་ལྡན་འདས་ཆོས་ཐམས་ཅད་ལ་མངའ་མཛད་པ་སྔོན་དུ་འཛུམ་པས་བཞད་མོ་ཆེར་བཞད་ཅིང་རང་གི་སྐུ་ལས་འོད་ཟེར་རབ
60b2 ཏུ་འབྱིན། ཕྱུང་ནས་ཀྱང་བདག་གི་སོ་སོ་རང་གིས་རིག་པའི་འཕགས་པའི་ཡེ་ཤེས་མཐོང་བའི་སྤྱོད་ཡུལ་ཏིང་ངེ་འཛིན་གྱི་བདེ་བ་ལ་དགོངས་པ་རབ་ཏུ་བཞག་སྟེ། གཟིགས་མོ་མེད་པར་སེང་གེའི་ལྟ་བས་ཕྱོགས་སུ་གཟིགས་ནས་འབོད་འགྲོགས་ཀྱི་རྣལ་འབྱོར་རྟོགས་པ་རྒྱུ་བ་ལ་རྗེས་སུ་དགོངས
60b3 ཤིང་ཅང་མི་གསུང་བར་གྱུར་སྙམ་མོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་སྔར་གསོལ་བ་བཏབ་པས་འབོད་འགྲོགས་ལ་སྙིང་བརྩེ་བ་དང་། བྱང་ཆུབ་སེམས་དཔའི་འཁོར་དེ་དག་གི་སེམས་དང་། བསམ་པ་དང་། རྣམ་པར་སྤྱོད་པ་ཡང་ཤེས་ཤིང་མ་འོངས
60b4 པའི་སྐྱེ་བོའི་ཚོགས་ལའང་བལྟས་ནས་བཤད་པ་བརྗོད་པ་ལ་མངོན་པར་དགའ་བའི་སེམས་ཅན་རྣམས་དང་། སྒྲ་ཇི་བཞིན་དུ་མངོན་པར་ཞེན་པ་རྣམས་དང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་གྱི་རྣལ་འབྱོར་གྱི་སྟོབས་ལ་མངོན་པར་ཞེན་པ་ཐམས་ཅད་འདི་ལྟར་བཅོམ
60b5 ལྡན་འདས་དེ་བཞིན་གཤེགས་པ་རྣམ་པར་ཤེས་པའི་ཡུལ་ལས་ཕྱིར་ལོག་པ་རྣམས་ཀྱང་བཞད་མོ་ཆེར་བཞད་དོ་སྙམ་དུ་སེམས་ཤིང་སེམས་རྣམ་པར་མྱོས་པར་གྱུར་ན་མི་རུང་ངོ་སྙམ་ནས། དེ་དག་གི་ངོ་མཚར་རྣམ་པར་བཟློག་པའི་ཕྱིར། བཅོམ་ལྡན་འདས་ལ་ཞུས་པ། བཅོམ་ལྡན
60b6 འདས་རྒྱུ་གང་དང་རྐྱེན་གང་གིས་འདི་ལྟར་འཛུམ་པ་མཛད། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །ཡང་བློ་གྲོས་ཆེན་པོ་གང་ཁྱོད་ཀྱིས་འཇིག་རྟེན་གྱི་རང་བཞིན་དང་། འཇིག་རྟེན་རྣམས་ཀྱི་ལྟ་བ་ངན་པ་ལ་བལྟས་ཏེ། དུས་གསུམ་གྱི་སེམས་ཁོང
60b7 དུ་ཆུད་པས། ང་ལ་དྲི་བར་བརྩམས་པ་ནི་བློ་གྲོས་ཆེན་པོ་ཁྱོད་ལེགས་སོ། །དེ་ལྟར་མཁས་པ་རྣམས་ཀྱིས་བདག་དང་གཞན་གྱི་དོན་དང་། གཉིས་ཀའི་དོན་དུ་ཡོངས་སུ་འདྲི་བའི་རང་བཞིན་ཅན་དུ་བྱའོ། །བློ་གྲོས་ཆེན་པོ་ལང་ཀའི་བདག་པོ་འབོད་འགྲོགས་འདིས་ནི་སྔོན་གྱི་དེ་བཞིན་གཤེགས
iiif viewer powered by OpenSeadragon
