| e-texts navigator |
| Wylie |
60a1 པ། ཐམས་ཅད་མཁྱེན་པ་ལ་བྱེད་པའི་མཚན་ཉིད་རྣམ་པར་ལོག་པའི་རྫུ་འཕྲུལ་གྱིས་དེ་ལྟར་བལྟའོ། །དེ་མཐོང་བས་ནི་ཁོང་དུ་མ་ཆུད་པ་ཁོང་དུ་ཆུད་པར་བྱའོ། །རྣམ་པར་མི་རྟོག་པ་ལ་སྤྱོད་པ་བདེ་བའི་ཏིང་ངེ་འཛིན་དང་། སྙོམས་པར་འཇུག་པས་གནས་པ་དེ
60a2 བཞིན་གཤེགས་པས་ཐུགས་སུ་ཆུད་པའི་ས་ཐོབ་པར་བྱེད་པ་བདག་གིས་ཁོང་དུ་ཆུད་པར་ཡང་རྣམ་པར་འཕེལ་བར་འགྱུར་རོ་སྙམ་མོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལང་ཀའི་བདག་པོ་མ་སྐྱེས་པའི་ཆོས་ལ་བཟོད་པ་ཐོབ་པར་ཐུགས་སུ་ཆུད་ནས་མགྲིན་བཅུ་ལ་ཐུགས་བརྩེ་བའི
60a3 ཕྱིར་རིན་པོ་ཆེ་མང་པོས་བརྒྱན་པ། རིན་པོ་ཆེའི་དྲ་བས་བྲེས་པའི་བདག་གི་རིའི་རྩེ་མོ་ལ་མཛེས་པ་དེ་ལྟ་བུ་ཉིད་དུ་བདག་ཉིད་བསྟན་ནས། ཡང་ལང་ཀའི་བདག་པོ་མགྲིན་བཅུས་མཐོང་བ་དང་། མྱོང་བའི་མཛེས་པ་དང་། རྩེ་མོ་ལ་དེ་བཞིན་གཤེགས་པ་དགྲ་བཅོམ་པ་ཡང་དག
60a4 པར་རྫོགས་པའི་སངས་རྒྱས་མཚན་རབ་སུམ་ཅུ་རྩ་གཉིས་ཀྱིས་བརྒྱན་པའི་སྐུ་དང་། རི་བོ་རེ་རེ་ལ་བདག་གི་ལུས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྤྱན་སྔ་ན་འདུག་པ་དང་། དེ་བཞིན་གཤེགས་པ་བློ་གྲོས་ཆེན་པོ་དང་ཐབས
60a5 ཅིག་སོ་སོ་རང་གིས་རིག་པའི་སྤྱོད་ཡུལ་གྱི་གཏམ་མཛད་པ་དང་། གནོད་སྦྱིན་གྱིས་བསྐོར་ཅིང་བཤད་པ་བརྗོད་པའི་གཏམ་གསུང་བ་དང་། མགོན་པོ་དང་བཅས་པའི་ཞིང་དེ་དག་ཀྱང་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་སངས་རྒྱས་ཀྱི་ཤའི་སྤྱན་གྱིས་འཁོར་ལ
60a6 གཟིགས་ནས། སེང་གེའི་རྒྱལ་པོ་ལྟར་རྣམ་པར་བསྒྱིངས་ཏེ། བཞད་མོ་ཆེར་བཞད་ནས། མཛོད་སྤུ་དང་། རྩིབ་ལོགས་དང་། བརླ་དང་། སྐེད་པའི་ཕྱོགས་དང་། དཔལ་གྱི་བེའུ་དང་། སྤུའི་ཁུང་བུ་ཐམས་ཅད་ནས་ནི་འོད་ཟེར་རབ་ཏུ་འབྱིན། དུས་ཀྱི་མཐའི་མེ་བཞིན
60a7 དུ་ནི་འབར། གཟི་བརྗིད་ནི་འཇའ་ལྟ་བུ། འོད་ཀྱི་དཀྱིལ་འཁོར་ནི་ཉི་མ་ཤར་བ་དང་འདྲ་བར་ཤིན་ཏུ་འབར། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱིས་ནི་ནམ་མཁའི་དབྱིངས་ནས་ལྟ་ཞིང་རི་རབ་ཀྱི་རྩེ་མོ་ལ་འགྲན་པའི་ཟོམ་ལ་བཞུགས་ནས་བཞད་མོ་ཆེར་བཞད
iiif viewer powered by OpenSeadragon
