| e-texts navigator |
| Wylie |
191b1 མིག་ལ་སོགས་ལས་བྱུང་། །ཐོག་མ་མེད་ནས་རྣམ་པར་འབྲེལ། །དོན་སྣང་བག་ཆགས་རྣམས་ལས་བྱུང་། །ཇི་ལྟར་སྣང་བ་སེམས་སྣང་སྟེ། །མུ་སྟེགས་ལྟ་བ་བཟློག་པ་ཡི། །དེ་ཡི་རྒྱུས་བྱུང་གཞན་ཉིད་ཀྱང་། །དེ་ལ་དམིགས་ནས་འཇུག་པར་འགྱུར། །དེ་ལས་ལྟ་བ་ཤེས་པ་དག་།
191b2 འཁོར་བར་རབ་ཏུ་འཇུག་པར་འགྱུར། །དངོས་པོ་རྨི་ལམ་སྒྱུ་མ་འདྲ། །དྲི་ཟའི་གྲོང་ཁྱེར་རྣམས་བཞིན་ཏེ། །སྨིག་རྒྱུ་བ་དང་ཆུ་ཟླ་ལྟར། །རང་གི་རྣམ་རྟོག་རྣམ་པར་སྒོམས། །འཇུག་པའི་རྣམ་པས་དེ་བཞིན་ཉིད། །ཡང་དག་ཡེ་ཤེས་དེ་ཡི་གནས། །སྒྱུ་མ་དཔའ་བར་འགྲོ་ལ་སོགས། །
191b3 ཏིང་ངེ་འཛིན་ནི་གཞན་རྣམས་དང་། །མངོན་པར་ཤེས་དང་དབང་རྣམས་དང་། །ཡེ་ཤེས་སྒྱུ་མ་ལྟ་བུ་དང་། །དེ་བཞིན་གཤེགས་པས་དབང་བསྐུར་བ། །ས་ལ་ཞུགས་ནས་ཐོབ་པར་འགྱུར། །གང་ཚེ་འགྲོ་བ་རྣམ་རྟོག་མཐོང་། །དེ་ཚེ་སེམས་ནི་ལྡོག་པར་འགྱུར། །ས་ནི་རབ་ཏུ་དགའ་བ
191b4 དང་། །སངས་རྒྱས་ས་དང་ས་རྣམས་འཐོབ། །གནས་ནི་རབ་ཏུ་གྱུར་པའི་ཕྱིར། །ཇི་ལྟར་སྣ་ཚོགས་ནོར་བུ་བཞིན། །སེམས་ཅན་རྣམས་ཀྱི་དོན་བྱེད་དེ། །ཆུ་ལ་གཟུགས་བརྙན་ཇི་བཞིན་ནོ། །ཡོད་དང་མེད་པའི་ཕྱོགས་རྣམས་དང་། །གཉིས་དང་གཉིས་མེད་པ་དང་བྲལ། །ཉན་ཐོས་རང
191b5 རྒྱལ་འདས་གྱུར་ན། །ས་བདུན་པོར་ནི་འགྱུར་བ་ཡིན། །སོ་སོ་རང་ཆོས་མཐོང་བས་ནི། །ཡང་དག་པ་ཡི་ས་སྦྱངས་ཏེ། །ཕྱི་རོལ་མུ་སྟེགས་རྣམས་སྤངས་པའི། །ཐེག་པ་ཆེན་པོ་བཤད་པར་བྱ། །རྣམ་པར་རྟོག་པར་རབ་གྱུར་ན། །ཤི་འཕོས་འཇིག་པ་རྣམས་སྤངས་པ། །རི་བོང་སྤུ་ཡི་ནོར་བུ
191b6 བཞིན། །གྲོལ་བ་རྣམས་ལ་ཚུལ་ཡང་བཤད། །ཇི་ལྟར་ཚིག་ལ་ཚིག་གནས་པ། །གལ་ཏེ་རིགས་ལ་རིགས་དེ་བཞིན། །དེ་ཕྱིར་རིགས་པའི་རིགས་པ་ཡིན། །དེ་ལས་གཞན་དུ་མ་རྟོག་ཅིག་།མིག་དང་ལས་དང་སྲེད་པ་དང་། །མ་རིག་དེ་བཞིན་ཚུལ་བཞིན་མིན། །མིང་དང་གཟུགས་དང་ཡིད་རྣམས
191b7 དང་། །རྙོག་པའི་ཡིད་ཀྱང་དེ་བཞིན་ནོ། །འཕགས་པ་ལང་ཀར་གཤེགས་པ་ཞེས་བྱ་བ་ཐེག་པ་ཆེན་པོའི་མདོ་ཇི་སྙེད་པ་རྫོགས་སོ།། །།བཅོམ་ལྡན་འདས་ཀྱི་རིང་ལུགས་པ་འགོས་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཏེ་གཏན་ལ་ཕབ་པའོ།། །།
iiif viewer powered by OpenSeadragon
