| e-texts navigator |
| Wylie |
179b1 སྤངས། །སྒྱུ་མ་རྨི་ལམ་འདྲ་བ་ཡི། །འཇིག་རྟེན་རྒྱུ་དང་རྐྱེན་སྤངས་པ། །རྟག་ཏུ་རྒྱུ་མེད་པར་མཐོང་ན། །རྣམ་པར་རྟོག་པ་མི་འཇུག་གོ། །དྲི་ཟའི་གྲོང་ཁྱེར་སྨིག་རྒྱུ་འདྲ། །རྟག་པར་སྐྲ་ཤད་འཛིངས་པ་བཞིན། །ཡོད་དང་མེད་པའི་ཕྱོགས་བྲལ་ཞིང་། །རྒྱུ་དང་རྐྱེན་གྱིས་སྤངས་པ་ཡི། །སྲིད
179b2 པ་རྒྱུ་མེད་པར་མཐོང་ན། །སེམས་ཀྱི་རྒྱུ་ནི་རྣམ་པར་འདག་།གང་གི་དངོས་པོ་མེད་པ་དང་། །སེམས་ཙམ་པོ་ཡང་མེད་འགྱུར་ན། །དངོས་པོ་མེད་པར་ཇི་ལྟར་སེམས། །སེམས་ཙམ་དུ་ཡང་མི་རུང་ངོ་། །དངོས་པོ་ལ་ནི་དམིགས་བྱས་ཤིང་། །མི་རྣམས་སེམས་ཀྱང་སྐྱེ་བར་འགྱུར། །རྒྱུ་མེད་པར་ནི
179b3 ཇི་ལྟར་སེམས། །སེམས་ཙམ་དུ་ནི་མི་རུང་ངོ་། །འཕགས་པའི་དངོས་པོའི་ཚུལ་ལ་ནི། །དེ་བཞིན་ཉིད་དང་སེམས་ཙམ་ཡོད། །ཡོད་པའང་མིན་པ་དེ་དག་ནི། །ང་ཡི་ཚུལ་ལ་མི་མཁས་པའོ། །གཟུང་དང་འཛིན་པའི་དངོས་པོར་ནི། །གལ་ཏེ་སེམས་ནི་འཇུག་འགྱུར་ན། །དེ་ནི་འཇིག་རྟེན་པ
179b4 ཡི་སེམས། །སེམས་ཙམ་དུ་ཡང་མི་རུང་ངོ་། །ལུས་དང་ལོངས་སྤྱོད་གནས་འདྲ་དང་། །གལ་ཏེ་རྨི་ལམ་འདྲ་སྐྱེ་ན། །སེམས་ནི་རྣམ་པ་གཉིས་སུ་འགྱུར། །སེམས་ལ་གཉིས་ཀྱི་མཚན་ཉིད་མེད། །ཇི་ལྟར་རལ་གྲི་རང་སོ་དང་། །ཇི་ལྟར་མཛུབ་མོ་རང་རྩེ་ལ། །མི་གཅོད་རེག་པར་མི
179b5 འགྱུར་བ། །དེ་བཞིན་སེམས་ཀྱིས་རང་བལྟའོ། །གཞན་དག་མེད་ཅིང་དབང་ཡང་མེད། །བརྟགས་པ་ཡི་ནི་དངོས་པོ་མེད། །ཆོས་ལྔ་རྣམས་དང་སེམས་གཉིས་ཀྱང་། །སྣང་བ་མེད་ལ་མེད་པའོ། །སྐྱེ་བར་བྱ་དང་སྐྱེ་བྱེད་དང་། །དངོས་པོའི་མཚན་ཉིད་རྣམ་གཉིས་ཏེ། །སྐྱེ་བར་བྱེད་ལས་དགོངས
179b6 བྱས་ནས། །རང་བཞིན་མེད་པར་ངས་བཤད་དོ། །རྣམ་པ་སྣ་ཚོགས་དོན་དབྱིབས་སུ། །གལ་ཏེ་རྣམ་པར་རྟོག་སྐྱེ་ན། །རི་བོང་རྭ་དང་ནམ་མཁའ་ཡང་། །དོན་དུ་སྣང་བ་འབྱུང་བར་འགྱུར། །གལ་ཏེ་མ་བརྟགས་དོན་ཡོད་ན། །སེམས་ཀྱང་དོན་དུ་སྣང་བར་འགྱུར། །སེམས་དང་ཐ་དད་བརྟགས
179b7 པ་ཡི། །དོན་ནི་ཤིན་ཏུ་མི་དམིགས་སོ། །ཐོག་མ་མེད་ལྡན་འཁོར་བ་ན། །དོན་ནི་གང་ནའང་མེད་པ་སྟེ། །སེམས་ནི་རྒྱས་པར་མ་གྱུར་ན། །ཇི་ལྟར་དོན་དུ་སྣང་བར་འཇུག་།གལ་ཏེ་མེད་པས་རྒྱས་འགྱུར་ན། །རི་བོང་རྭ་ཡང་དེར་འགྱུར་རོ། །དངོས་པོ་མེད་པས་རྒྱས་གྱུར་པའི། །རྣམ
iiif viewer powered by OpenSeadragon
