| e-texts navigator |
| Wylie |
179a1 མེད་སྨྲ་བ། །མ་འོངས་པ་ཡི་དུས་ན་འབྱུང་། །དངོས་པོ་མེད་དེ་རྐྱེན་རྣམས་ཀྱིས། །ཡོད་པ་འཕགས་པའི་སྤྱོད་ཡུལ་ལོ། །བརྟགས་པའི་དངོས་པོ་ཤིན་ཏུ་མེད། །རྟོག་གེ་པ་རྣམས་རྟོག་པར་བྱེད། །མ་འོངས་པ་ཡི་དུས་ན་ནི། །བྱིས་པའི་རང་བཞིན་གཟེགས་ཟན་འབྱུང་། །
179a2 འབྲས་བུ་མེད་སྨྲའི་ལྟ་ངན་པས། །སྐྱེ་བོ་མང་པོ་རླག་པར་བྱེད། །རྡུལ་ཕྲན་ལས་ནི་འགྲོ་བ་འབྱུང་། །རྡུལ་ཕྲན་རྣམས་ནི་རྒྱུ་མེད་དེ། །རྫས་དགུ་རྣམས་ཀྱང་རྟག་པའོ་ཞེས། །ལྟ་བ་ངན་པས་སྟོན་པར་འགྱུར། །རྫས་རྣམས་ཀྱིས་ནི་རྫས་བརྩམས་ཏེ། །ཡོན་ཏན་གྱིས་ཀྱང་ཡོན་ཏན་ནོ། །དངོས་པོ
179a3 དག་གི་དངོས་ཉིད་གཞན། །ཡོད་པ་དག་ནི་འཇིག་པར་བྱེད། །གལ་ཏེ་མ་བྱུང་འབྱུང་འགྱུར་ན། །འཇིག་རྟེན་ཐོག་མ་ཡོད་པར་འགྱུར། །འཁོར་བ་སྔོན་གྱི་མཐའ་མ་ནི། །ངས་ནི་མེད་པར་བཤད་པ་ཡིན། །སྲིད་གསུམ་ཐམས་ཅད་བགྲང་བ་དག་།དེ་སྟེ་མ་བྱུང་འབྱུང་ན་ནི། །ཁྱི་དང་རྔ
179a4 མོ་བོང་བུ་ལའང་། །རྭ་སྐྱེར་འགྱུར་བ་ཐེ་ཙོམ་མེད། །གལ་ཏེ་གཟུགས་དང་རྣམ་ཤེས་དང་། །མིག་ནི་མ་སྐྱེས་སྐྱེ་འགྱུར་ན། །ཅོད་པན་རེ་ལྡེ་རས་ལ་སོགས། །འཇིམ་པ་བསྒོངས་ལས་འབྱུང་བར་འགྱུར། །རས་ལ་རེ་ལྡེ་ཡོད་པ་མིན། །རྩི་སྐྱང་ལ་ཡང་རས་མེད་དོ། །གཅིག་པོ་ལས་ནི
179a5 གཅིག་འབྱུང་ན། །རྐྱེན་རྣམས་ཀྱིས་ཀྱང་ཅིར་མི་འབྱུང་། །འཚོ་བ་དེ་དང་ལུས་དེ་དང་། །གང་ཡང་མ་བྱུང་སྐྱེ་བ་ནི། །དེ་དག་ཐམས་ཅད་གཞན་སྨྲ་བ། །ངས་ཀྱང་དེ་དག་ཤིན་ཏུ་བཤད། །སྔ་མའི་ཕྱོགས་ནི་བརྗོད་བྱ་སྟེ། །དེ་དག་བློ་ནི་བཟློག་པར་བྱ། །དེ་དག་བློ་ནི་བཟློག་བྱས་ནས། །བདག་གི
179a6 ཕྱོགས་ནི་ངས་བཤད་དོ། །ང་ཡི་སློབ་མ་རྨོངས་པའི་སྡེ། །ཡོད་མེད་ཕྱོགས་ལ་གནས་འོང་ཞེས། །དེ་ཕྱིར་མུ་སྟེགས་སྨྲ་བ་དག་།ངས་ནི་བརྗོད་པར་བྱས་པ་ཡིན། །ཡན་ལག་སེར་སྐྱ་བློ་ངན་པའང་། །འགྲོ་བ་གཙོ་ལས་སྐྱེས་པ་དང་། །ཡོན་ཏན་རྣམ་པར་འགྱུར་བ་ཡང་། །སློབ་མ་རྣམས་ལ
179a7 རབ་ཏུ་སྟོན། །རྐྱེན་གྱིས་བྱུང་དང་མ་བྱུང་མིན། །རྐྱེན་རྣམས་ཡོད་པ་མ་ཡིན་ཏེ། །རྐྱེན་རྣམས་དངོས་པོ་མེད་པའི་ཕྱིར། །མ་བྱུང་བ་ནི་མི་འབྱུང་ངོ་། །ཡོད་དང་མེད་པའི་ཕྱོགས་བྲལ་ཞིང་། །རྒྱུ་དང་རྐྱེན་རྣམས་སྤངས་པ་དང་། །སྐྱེ་དང་འཇིག་པ་མེད་པ་དང་། །རང་གི་ཕྱོགས་ཏེ་མཚན་གཞི
iiif viewer powered by OpenSeadragon
