| e-texts navigator |
| Wylie |
177b1 དངོས་པོ་དངོས་ཉིད་སུ་ཞིག་གིས། །འཁོར་བྱས་ཐུབ་ཆེན་བདག་ལ་གསུངས། །དངོས་པོ་དངོས་ཉིད་མེད་པ་སྟེ། །སེམས་ཙམ་པོ་ནི་སྣང་བ་ཡིན། །རང་གི་སེམས་ནི་མ་མཐོང་བས། །རྣམ་པར་རྟོག་པ་རབ་ཏུ་འཇུག་།ཇི་ལྟར་བྱིས་པས་བརྟགས་པ་ཡི། །བརྟགས་པ་གལ་ཏེ་ཡོད་མེད་ཅིང་། །
177b2 དེ་ལས་རྣམ་པ་གཞན་ཡོད་ན། །བློས་ཀྱང་རྟོག་པར་མི་རུང་ངོ་། །འཕགས་ལ་གལ་ཏེ་དེ་ཡོད་ན། །དེ་ནི་བྱིས་པས་བརྟགས་མ་ཡིན། །གལ་ཏེ་འཕགས་ལས་དེ་ལོག་ན། །འཕགས་དང་བྱིས་པ་མཉམ་པར་གྱུར། །གང་ཕྱིར་སེམས་ནི་རྣམ་སྦྱངས་པས། །འཕགས་པ་རྣམས་ལ་ནོར་པ་མེད། །
177b3 སེམས་ཀྱི་རྒྱུད་ནི་མ་དག་པའི། །བྱིས་པ་བརྟགས་ལ་རྟོག་པར་བྱེད། །ཇི་ལྟར་བུ་ལ་མ་ཞིག་ནི། །མཁའ་ལ་ཤིང་ཐོག་ལེན་བྱེད་ཅིང་། །འདི་རེ་བུ་གཅིག་མ་ངུ་བར། །ཤིང་ཐོག་སྣ་ཚོགས་འདི་ཡང་ལོང་། །དེ་བཞིན་སེམས་ཅན་ཀུན་ལ་ངས། །བརྟགས་པའི་འབྲས་བུ་སྣ་ཚོགས་ཀྱིས། །བྲིས
177b4 ནས་ཡོད་དང་མེད་པ་ཡི། །ཕྱོགས་སྤངས་ཚུལ་ནི་རབ་ཏུ་བཤད། །གང་གི་མ་བྱུང་རྐྱེན་རྣམས་ཀྱིས། །འབྱུང་སྟེ་འབྲེལ་ལས་མ་ཡིན་ན། །སྔོན་མ་སྐྱེས་པ་ད་སྐྱེས་ཏེ། །བདག་ཉིད་དུ་ཡང་རེད་པ་མེད། །བདག་ཉིད་མ་རེད་སྐྱེས་པ་མེད། །རྐྱེན་མེད་པར་ཡང་གང་ནའང་མེད། །སྐྱེས་པའི་དངོས
177b5 པོ་དེ་དག་ཀྱང་། །རྐྱེན་མེད་པར་ཡང་གང་ནའང་མེད། །དེ་ལྟ་བུ་ཡི་མདོར་མཐོང་ན། །གང་ནའང་མེད་མིན་ཡོད་མིན་མིན། །དངོས་པོ་རྐྱེན་ལས་སྐྱེ་བར་ནི། །མཁས་པ་རྣམས་ཀྱིས་མི་བརྟག་གོ། །མུ་སྟེགས་ཅན་རྣམས་བྱིས་པ་ལ། །རྐྱེན་གྱིས་གཅིག་དང་ཐ་དད་གཏམ། །ཟེར་ཡང་འགྲོ
177b6 བ་རྨི་ལམ་དང་། །སྒྱུ་མ་འདྲ་བར་མི་ཤེས་སོ། །བརྗོད་པའི་ཡུལ་གྱི་ཐེག་པ་ནི། །ཐེག་པ་ཆེན་པོ་བླ་ན་མེད། །ངས་ནི་དོན་ཀྱང་ལེགས་པར་བསྟན། །བྱིས་པ་རྣམས་ཀྱིས་མི་ཤེས་སོ། །གང་དག་འཇུངས་པའི་ཉན་ཐོས་དང་། །མུ་སྟེགས་ཅན་གྱིས་བྱས་པ་ནི། །གང་ཕྱིར་རྟོག་གིས་བཤད་པས
177b7 ན། །དེ་དག་དོན་ལ་འཁྲུལ་པའོ། །མཚན་ཉིད་དང་ནི་དངོས་དབྱིབས་དང་། །མིང་ནི་རྣམ་པ་བཞི་པོ་ཡང་། །དེ་དག་ལ་ནི་དམིགས་བྱས་ཤིང་། །རྣམ་པར་རྟོག་པ་རབ་ཏུ་འཇུག་།གང་རྣམས་གཅིག་དང་དུ་མ་དང་། །ཚངས་པའི་རིས་ལ་དབང་སྒྱུར་ཞིང་། །ཉི་མ་ཟླ་བའི་འོད་དག་ཀྱང་། །
iiif viewer powered by OpenSeadragon
