| e-texts navigator |
| Wylie |
177a1 ཤེས་པས། །མཐའ་བཞིན་སྦྱར་བའི་གཏན་ཚིགས་ཀྱིས། །བླུན་པོ་དག་གིས་ཟློག་པར་བྱེད། །གཏན་ཚིགས་མེད་དེ་མཐའ་ཡང་མེད། །དཔེ་དང་ཡན་ལག་རྣམས་ཀྱང་མེད། །རང་གི་སེམས་ནི་དོན་རྒྱུད་དེ། །གལ་ཏེ་ཤེས་ན་མཁས་པ་ཡིན། །གང་ཞིག་རྟོག
177a2 པས་བརྟག་བྱ་བ། །དེ་ནི་བརྟགས་པའི་མཚན་ཉིད་དེ། །བརྟག་པ་ལ་ནི་རྟེན་བཅས་ཏེ། །རྣམ་པར་རྟོག་པ་རབ་ཏུ་འཇུག་།ཕན་ཚུན་མ་གྱེས་འབྲེལ་པ་ཡི། །བག་ཆགས་གཅིག་གི་རྒྱུ་ལས་བྱུང་། །གཉིས་པོ་བློ་བུར་བྱུང་བའི་ཕྱིར། །མི་རྣམས་ཀྱི་ནི་སེམས་མི་སྐྱེ། །སྲིད་པ་གསུམ་ན་གནས་པ
177a3 ཡི། །སེམས་དང་སེམས་བྱུང་རྣམ་རྟོག་ཡིན། །གང་ཞིག་དོན་སྣང་འཇུག་པ་ནི། །བརྟགས་པའི་རང་བཞིན་དེ་ཡིན་ཏེ། །སྣང་བའི་ས་བོན་ལྡན་པའི་ཕྱིར། །སྐྱེ་མཆེད་རྣམས་ནི་བཅུ་གཉིས་སོ། །གནས་དང་དམིགས་བྱ་ལྡན་པའི་ཕྱིར། །ལོ་རྒྱུས་སུ་ནི་ངས་བཤད་དོ། །ཇི་ལྟར་མེ་ལོང་གཟུགས
177a4 བརྙན་དང་། །རབ་རིབ་ཅན་ལ་སྐྲ་འཛིངས་པ། །དེ་བཞིན་བག་ཆགས་ཀྱིས་གཡོགས་སེམས། །བྱིས་པ་རྣམས་ཀྱིས་མཐོང་བ་ཡིན། །བདག་གིས་རྟོག་པས་བརྟགས་དོན་ལ། །རྣམ་པར་རྟོག་པ་རབ་ཏུ་འཇུག་།མུ་སྟེགས་ཅན་གྱིས་བརྟགས་པ་ལྟར། །ཕྱི་རོལ་གྱི་ནི་དོན་མེད་དེ། །ཇི་ལྟར་ཐག་པར་མ
177a5 ཤེས་ནས། །བྱིས་པ་སྦྲུལ་དུ་འཛིན་པ་བཞིན། །རང་གི་སེམས་དོན་མ་ཤེས་པས། །ཕྱི་རོལ་གྱི་ནི་དོན་དུ་རྟོག་།དེ་ལྟར་ཐག་པ་ཐག་ཉིད་དུ། །གཅིག་དང་ཐ་དད་སྤངས་མོད་ཀྱི། །གང་གིས་ཐག་པར་རྣམ་རྟོག་པ། །དེ་ནི་རང་སེམས་ཉེས་པ་ཡིན། །གང་ལ་གང་གི་དངོས་པོར་ཡང་། །བརྟགས་ན
177a6 མི་དམིགས་མ་ཡིན་པ། །དེ་ནི་མེད་པར་ཤེས་མི་བྱ། །ཆོས་ཀྱི་ཆོས་ཉིད་དེ་ཡིན་ནོ། །ཡོད་པའི་ཟླ་དྲངས་མེད་པ་སྟེ། །མེད་པའི་ཟླ་དྲངས་ཡོད་པ་ཡིན། །དེ་ཕྱིར་མེད་པར་ཤེས་མི་བྱ། །ཡོད་པ་ཉིད་དུའང་མི་བརྟག་གོ། །གང་འདི་ཀུན་ཏུ་བརྟགས་པ་ལ། །བརྟགས་ན་དེ་ཡི་བདག་ཉིད
177a7 མིན། །དེ་ཡི་བདག་ཉིད་མིན་མཐོང་ཞིང་། །ཇི་ལྟར་རྣམ་པར་རྟོག་པ་འཇུག་།གཟུགས་ནི་གཟུགས་ཀྱི་བདག་ཉིད་མེད། །དེ་བཞིན་བུམ་པ་རས་ལ་སོགས། །སྣང་བ་ཡོད་པ་མ་ཡིན་པས། །ཁྱོད་ཀྱི་རྣམ་རྟོག་མི་འབྱུང་ངོ་། །ཐོག་མ་མེད་ལྡན་འདུས་བྱས་ལ། །གལ་ཏེ་ཁྱོད་ཀྱི་རྟོག་ནོར་ན། །
iiif viewer powered by OpenSeadragon
