| e-texts navigator |
| Wylie |
176b1 སེམས་ལྡོག་སྟེ། །བདག་མེད་པ་ཡང་རྟོགས་པར་འགྱུར། །གང་ཕྱིར་རྐྱེན་ལས་བྱུང་བས་ན། །དངོས་པོ་ཐམས་ཅད་མ་སྐྱེས་པས། །རྐྱེན་རྣམས་ཐམས་ཅད་འབྲས་བུ་སྟེ། །འབྲས་བུ་ལ་ནི་སྲེད་མི་འབྱུང་། །འབྲས་བུ་ལས་ནི་གཉིས་འགྱུར་ཕྱིར། །འབྲས་བུ་ལས་ནི་འབྲས་མི་འབྱུང་། །གཉིས་སུ
176b2 འགྱུར་བའི་སྐྱོན་གྱི་ཕྱིར། །འབྲས་བུ་ལས་ནི་དངོས་མི་དམིགས། །གང་གི་ཚེ་ན་འདུས་བྱས་རྣམས། །དམིགས་དང་དམིགས་པར་བྱེ་བྲལ་ཞིང་། །སེམས་མེད་སེམས་ཙམ་མཐོང་བ་ལ། །སེམས་ཙམ་དུ་ནི་ངས་བཤད་དོ། །སེམས་ནི་ངོ་བོ་ཉིད་ཀྱི་དབྱིབས། །རྐྱེན་དང་དངོས་པོ་སྤངས་པ་སྟེ། །
176b3 མཐར་ཕྱིན་ངོ་བོ་ཚངས་པའི་མཆོག་།དེ་ལ་ངས་ནི་ཙམ་ཞེས་བཤད། །བདག་ནི་བརྟགས་པའི་བདེན་པ་སྟེ། །རྫས་སུ་ཡོད་པ་མ་ཡིན་ནོ། །ཕུང་པོ་ཕུང་པོ་ཉིད་དེ་བཞིན། །བརྟགས་པས་ཡིན་གྱི་རྫས་སུ་མེད། །མཉམ་པ་ཉིད་ནི་རྣམ་བཞི་སྟེ། །མཚན་ཉིད་རྒྱུ་དང་དངོས་ལས་སྐྱེས། །
176b4 བདག་མེད་པ་ཡི་མཉམ་ཉིད་དེ། །རྣལ་འབྱོར་ཞུགས་པའི་བཞི་པའོ། །ལྟ་བ་ཐམས་ཅད་རྣམ་བཟློག་པ། །བརྟག་པར་བྱ་དང་རྟོག་པ་སྤངས། །དམིགས་པ་མེད་ཅིང་སྐྱེ་མེད་ལ། །སེམས་ཙམ་དུ་ནི་ངས་བཤད་དོ། །དངོས་མིན་དངོས་པོ་མེད་པའང་མིན། །དངོས་དང་དངོས་མེད་སྤངས་པ
176b5 ཡི། །དེ་བཞིན་ཉིད་ནི་སེམས་བྲལ་བ། །སེམས་ཙམ་དུ་ནི་ངས་བཤད་དོ། །སྟོང་པ་མཐའ་དང་དེ་བཞིན་ཉིད། །མྱ་ངན་འདས་དང་ཆོས་ཀྱི་དབྱིངས། །ཡིད་ཀྱི་ལུས་ནི་སྣ་ཚོགས་པ། །སེམས་ཙམ་དུ་ནི་ངས་བཤད་དོ། །རྣམ་པར་རྟོག་པའི་བག་ཆགས་འབྲེལ། །སེམས་ལས་བྱུང་བ་སྣ
176b6 ཚོགས་པ། །མི་ལ་ཕྱི་རོལ་སྣང་བ་ནི། །འཇིག་རྟེན་པ་ཡི་སེམས་ཙམ་མོ། །ཕྱི་རོལ་གྱི་ནི་སྣང་བ་མེད། །ལུས་དང་ལོངས་སྤྱོད་གནས་ལྟ་བུར། །སེམས་ནི་སྣ་ཚོགས་པར་སྣང་བ། །སེམས་ཙམ་དུ་ནི་ངས་བཤད་དོ། །ཉན་ཐོས་ཟད་པའི་ཡེ་ཤེས་དང་། །སངས་རྒྱས་རྣམས་ཀྱི་སྐྱེ་འབྱུང
176b7 དང་། །རང་རྒྱལ་སངས་རྒྱས་རྣམས་ཀྱི་ནི། །ཉོན་མོངས་མེད་པས་ཤིན་ཏུ་འབྱུང་། །ཕྱི་རོལ་གྱི་ནི་གཟུགས་མེད་དེ། །རང་གི་སེམས་ནི་ཕྱི་རོལ་སྣང་། །སེམས་ནི་ཁོང་དུ་མི་ཆུད་ཕྱིར། །བྱིས་པ་རྣམས་ནི་འདུས་བྱས་རྟོག་།རང་སེམས་སྣ་ཚོགས་སྣང་བ་ཡི། །ཕྱི་རོལ་དོན་རྣམས་མི
iiif viewer powered by OpenSeadragon
