| e-texts navigator |
| Wylie |
175b1 གཡེངས། །མཐར་ཕྱིན་པ་ནི་དེ་ལ་མེད། །ཕྱིར་ཡང་ལྡོག་པར་མི་འགྱུར་ཏེ། །ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་མི་སད་དོ། །བག་ཆགས་ཉོན་མོངས་པ་དང་འབྲེལ། །ཀུན་ནས་ལྡང་དང་རྣམ་པར་བྲལ། །དེ་དག་ཏིང་འཛིན་མྱོས་པས་མྱོས། །ཟག་མེད་པ་ཡི་དབྱིངས་ན་འཁོད། །
175b2 ཇི་ལྟར་སྐྱེས་བུ་ར་རོ་བ། །ཆང་མེད་ནས་ནི་སངས་འགྱུར་ལྟར། །ང་ཡི་སངས་རྒྱས་ཆོས་ཀྱི་སྐུ། །དེ་དག་དེ་ཚེ་འཐོབ་པར་འགྱུར། །ཇི་ལྟར་གླང་པོ་འདམ་བྱིང་བ། །ཕན་ཚུན་དུ་ནི་མི་རྒྱུག་ལྟར། །ཏིང་ངེ་འཛིན་གྱི་འདམ་བྱིང་བའི། །ཉན་ཐོས་རྣམས་ནི་དེ་བཞིན་འཁོད། །མི་ཡི་དབང་པོ
175b3 བྱིན་རླབས་ལས། །དབང་བསྐུར་ཏིང་འཛིན་དག་ལ་སོགས། །སྨོན་ལམ་དག་གིས་རྣམ་སྦྱངས་པ། །དང་པོ་དང་ནི་བཅུ་པོར་འབྱུང་། །རི་བོང་རྭ་དང་ནམ་མཁའ་དང་། །མོ་ཤམ་བུ་ཡང་དེ་བཞིན་ཏེ། །མེད་བཞིན་ཚིག་ཏུ་བརྗོད་པ་ལྟར། །དངོས་ལ་རྟོག་པའང་དེ་བཞིན་ནོ། །འཇིག་རྟེན
175b4 བག་ཆགས་རྒྱུ་ལས་བྱུང་། །གང་ནའང་མེད་མིན་ཡོད་མེད་མིན། །བདག་མེད་ཆོས་མཁས་གང་དག་གིས། །མཐོང་ན་རྣམ་པར་གྲོལ་བར་འགྱུར། །མིང་ནི་བཏགས་པའི་རང་བཞིན་ཏེ། །གཞན་ལས་བྱུང་བ་དབང་ལས་སྐྱེས། །དེ་བཞིན་ཉིད་ནི་གྲུབ་པར་ངས། །མདོ་དང་མདོ་ལས་རྟག་ཏུ་བཤད། །
175b5 ཚིག་དང་ཡི་གེ་མང་པོ་དང་། །མིང་དག་ལ་ཡང་བྱེ་བྲག་ཏུ། །བྱིས་པ་བློ་ངན་ཆགས་པ་ནི། །ཇི་ལྟར་འདམ་ལ་གླང་ཆེན་བཞིན། །ལྷ་ཡི་ཐེག་པ་ཚངས་ཐེག་དང་། །ཉན་ཐོས་ཀྱི་ཡང་དེ་བཞིན་དུ། །རང་རྒྱལ་དེ་བཞིན་གཤེགས་པའི་སྟེ། །ཐེག་པ་དེ་རྣམས་ངས་བཤད་དོ། །ཇི་སྲིད
175b6 སེམས་འཇུག་བར་དུ་ནི། །ཐེག་པ་རྣམས་ལ་ཐུག་པ་མེད། །སེམས་ནི་རབ་ཏུ་གྱུར་པ་ནི། །ཐེག་པ་མེད་ཅིང་འགྲོ་བའང་མེད། །སེམས་དང་རྣམ་རྟོག་རྣམ་རིག་དང་། །ཡིད་དང་རྣམ་ཤེས་ཉིད་ཀྱང་སྟེ། །ཀུན་གཞི་སྲིད་གསུམ་གཡོ་བ་རྣམས། །དེ་དག་སེམས་ཀྱི་རྣམ་གྲངས་ཡིན། །ཚེ་དང
175b7 དྲོད་དང་རྣམ་ཤེས་དང་། །ཀུན་གཞི་སྲོག་གི་དབང་པོ་དང་། །ཡིད་དང་ཡིད་ཀྱི་རྣམ་ཤེས་པ། །རྣམ་པར་རྟོག་པའི་བྱེ་བྲག་གོ། །སེམས་ཀྱིས་སུ་ནི་ལུས་འཛིན་ཏེ། །ཡིད་ནི་རྟག་ཏུ་རློམ་སེམས་བྱེད། །རྣམ་པར་ཤེས་པ་སེམས་ཡུལ་ལ། །རྣམ་ཤེས་བཅས་པས་བྱེ་བྲག་འབྱེད། །སྲེད
iiif viewer powered by OpenSeadragon
