| e-texts navigator |
| Wylie |
174b1 གཤེགས་རིགས་དག་པ་སྟེ། །ཀུན་ཏུ་རྒྱུ་བ་སྤངས་པའོ། །མངོན་པར་ཤེས་དང་དབང་གིས་དག་།ཏིང་ངེ་འཛིན་དང་སྟོབས་ཀྱིས་བརྒྱན། །ཡིད་ཀྱི་ལུས་ནི་སྣ་ཚོགས་པ། །དེ་བཞིན་གཤེགས་པའི་དགེ་བའི་རིགས། །སོ་སོ་རང་རིག་དྲི་མ་མེད། །རྒྱུ་ཡི་མཚན་ཉིད་སྤངས་པ་སྟེ། །ས
174b2 བརྒྱད་པ་དང་སངས་རྒྱས་ས། །དེ་བཞིན་གཤེགས་པའི་རིགས་ཡིན་ནོ། །ལེགས་པའི་བློ་གྲོས་རིང་དུ་སོང་། །ཆོས་སྤྲིན་དེ་བཞིན་གཤེགས་པ་ཡང་། །དེ་དག་སངས་རྒྱས་རྣམས་ཀྱི་རིགས། །ལྷག་མ་ཐེག་པ་གཉིས་འཐོབ་བྱེད། །སེམས་ཅན་རྒྱུད་ཀྱི་བྱེ་བྲག་དང་། །མཚན་ཉིད
174b3 ཕྱིར་ཡང་བྱིས་པ་ལ། །སེམས་ཀྱི་དབང་དུ་འགྲོ་བའི་ས། །བདུན་པོ་སངས་རྒྱས་རྣམས་ཀྱིས་བཤད། །ངག་ལུས་སེམས་ཀྱི་གནས་ངན་ལེན། །ས་བདུན་ལ་ནི་མི་འཇུག་སྟེ། །ས་བརྒྱད་ལ་ནི་དེ་ཡི་གནས། །རྨི་ལམ་ཆུ་བོ་མཚུངས་ཤིང་འདྲ། །ས་བརྒྱད་དང་ནི་ལྔ་པ་ལ། །བཟོ་དང་རིག་དང་སྒྱུ་རྩལ
174b4 རྣམས། །རྒྱལ་སྲས་རྣམས་ནི་ཤེས་བྱེད་ཅིང་། །སྲིད་པའི་གནས་ན་རྒྱལ་པོའང་བྱེད། །སྐྱེ་དང་མི་སྐྱེ་སྟོང་མི་སྟོང་། །བློ་ལྡན་གྱིས་ནི་བརྟག་མི་བྱ། །རང་བཞིན་ཉིད་དང་རང་བཞིན་མེད། །སེམས་ཙམ་ལ་ནི་ཡོད་པ་མིན། །ཡང་དག་འདི་འོ་ཡང་དག་འདི། །འདི་ནི་ལོག་ཅེས་བརྟག་བྱ་བ། །
174b5 རང་རྒྱལ་ཉན་ཐོས་རྣམས་ལ་བཤད། །རྒྱལ་བའི་སྲས་ལ་མ་ཡིན་ནོ། །སེམས་ཙམ་ལ་ནི་ཡོད་མིན་ཏེ། །ཡོད་དང་མེད་པ་ཡོད་ལས་མིན། །སྐད་ཅིག་པ་དང་མཚན་ཉིད་མེད། །བརྟགས་པ་དང་ནི་རྫས་ཀྱང་མེད། །ཀུན་རྫོབ་ཏུ་ནི་དངོས་རྣམས་ཡོད། །དོན་དམ་དུ་ནི་རང་བཞིན་མེད། །
174b6 རང་བཞིན་མེད་ལ་གང་ནོར་བ། །དེ་ནི་ཀུན་རྫོབ་བདེན་པ་ཡིན། །ཆོས་རྣམས་ཐམས་ཅད་མེད་པ་ལ། །ང་ཡིས་རབ་ཏུ་གདགས་པ་བྱས། །བྱིས་པ་རྣམས་ཀྱི་བརྗོད་སྤྱོད་ནི། །ཡང་དག་རྣམ་པར་སྤངས་པ་ཡིན། །བརྗོད་པ་ལས་བྱུང་དངོས་པོ་ཡི། །དོན་གྱི་སྤྱོད་ཡུལ་ཡོད་པའོ། །བརྗོད
174b7 པ་ལས་བྱུང་དངོས་པོ་དག་། ལྟ་བས་ཡོད་པ་མ་ཡིན་ནོ། །རྩིག་པ་མེད་པར་རི་མོ་དང་། །སྡོང་དུམ་ལ་སོགས་སྤངས་གྲིབ་ལྟར། །དེ་བཞིན་ཀུན་གཞི་དག་པ་ནི། །རླབས་ཀྱིས་རྣམ་པར་མི་མཛེས་སོ། །སེམས་ནི་གར་མཁན་བཞིན་དུ་གནས། །ཡིད་ནི་བཞད་གད་པ་འདྲ་སྟེ། །
iiif viewer powered by OpenSeadragon
