| e-texts navigator |
| Wylie |
173a1 འཕགས་པ་ལང་ཀར་གཤེགས་པ། བམ་པོ་དགུ་པ་སྟེ་ཐ་མ། ཞིང་དང་སངས་རྒྱས་སྤྲུལ་པ་དང་། །ཐེག་པ་གཅིག་དང་དེ་བཞིན་གསུམ། །མྱ་ངན་འདས་དང་ང་མེད་དེ། །ཐམས་ཅད་སྟོང་པ་སྐྱེ་སྤངས་པའོ། །སངས་རྒྱས་བྱེ་བྲག་སུམ་ཅུ་དྲུག་།བྱེ་བྲག་དག་ནི་བཅུ་པོ་དང་། །
173a2 སེམས་ཅན་སོ་སོའི་སེམས་རྒྱུད་རྣམས། །དེ་དག་ཞིང་གི་སྣོད་ཡིན་ནོ། །ཇི་ལྟར་བརྟགས་པའི་དངོས་པོ་ནི། །སྣ་ཚོགས་བལྟ་བར་སྣང་མོད་ཀྱི། །སྣ་ཚོགས་ཉིད་ནི་དེ་ལ་མེད། །འགྲོ་བ་དེ་བཞིན་ཆོས་སངས་རྒྱས། །ཆོས་ཀྱི་སངས་རྒྱས་སངས་རྒྱས་ཡིན། །ལྷག་མ་དེ་ཡི་སྤྲུལ་པའོ། །སེམས་ཅན
173a3 རང་གི་ས་བོན་རྒྱུད། །སངས་རྒྱས་སྣང་བར་མཐོང་བའོ། །མཚན་མ་འབྲེལ་ལས་ནོར་བ་ཡི། །རྣམ་པར་རྟོག་པ་རབ་ཏུ་འཇུག་། རྟོག་ལས་དེ་བཞིན་ཉིད་གཞན་མིན། །མཚན་མ་ལས་ཀྱང་རྣམ་རྟོག་མིན། །རང་བཞིན་གྱི་དང་རྫོགས་ལོངས་སྤྱོད། །འཕྲུལ་པ་དང་ནི་སྤྲུལ་པ་གང་། །སངས་རྒྱས
173a4 མང་པོ་སུམ་ཅུ་དྲུག་། རང་བཞིན་གྱི་ནི་སངས་རྒྱས་ཡིན། །སྔོན་པོ་དམར་པོ་ལན་ཚྭ་དང་། །དུང་དང་འོ་མ་ཁ་ར་དང་། །བསྐ་བའི་འབྲས་བུ་མེ་ཏོག་སོགས། །ཇི་ལྟར་ཉི་ལས་འོད་ཟེར་དང་། །རྒྱ་མཚོ་རླབས་དང་ལྡན་པ་ནི། །མི་གཅིག་ཐ་དད་མ་ཡིན་ཏེ། །སེམས་དང་ལྷན་ཅིག་ལྡན་པ་ཡི། །རྣམ
173a5 ཤེས་བདུན་པོ་དེ་བཞིན་ནོ། །རྒྱ་མཚོ་ཡོངས་སུ་གྱུར་པ་ནི། །དབའ་རླབས་སྣ་ཚོགས་དེ་དག་སྟེ། །རྣམ་པར་ཤེས་ཞེས་བྱ་བ་སྟེ། །ཀུན་གཞི་དེ་བཞིན་སྣ་ཚོགས་འབྱུང་། །སེམས་དང་ཡིད་དང་རྣམ་ཤེས་པ། །མཚན་ཉིད་དོན་དུ་རབ་ཏུ་བརྟག་།བརྒྱད་པོ་ཐ་དད་མ་ཡིན་མཚན། །མཚན་གྱི་གཞི་མེད
173a6 མཚན་ཉིད་མེད། །རྒྱ་མཚོ་དང་ནི་དབའ་རླབས་རྣམས། །ཇི་ལྟར་ཁྱད་པར་མེད་པ་ལྟར། །དེ་བཞིན་སེམས་ལ་རྣམ་ཤེས་དག་།ཡོངས་སུ་གྱུར་པ་མི་རྙེད་དོ། །སེམས་ཀྱིས་ལས་རྣམས་སོགས་པར་བྱེད། །ཡིད་ཀྱིས་ཀྱང་ནི་རྣམ་པར་སོགས། །རྣམ་པར་ཤེས་པས་རྣམ་པར་རིག་།ལྔ་པ
173a7 སྣང་ལ་རྟག་པར་བྱེད། །སྔོན་པོ་དམར་པོའི་རྣམ་པར་ནི། །མི་ཡི་རྣམ་པར་ཤེས་པར་གདའ། །དབའ་རླབས་སེམས་དང་ཆོས་འཐུན་པ། །ཇི་སྲིད་ཐུབ་ཆེན་བཤད་དུ་གསོལ། །སྔོན་པོ་དམར་པོའི་རྣམ་པ་རྣམས། །དབའ་རླབས་དག་ལ་མ་མཆིས་ལ། །མཚན་ཉིད་དོན་དུ་བྱིས་པ་ལ། །
iiif viewer powered by OpenSeadragon
