| e-texts navigator |
| Wylie |
171a1 གཏན་ཐ་དད་རྣམ་པ་དྲུག་། རང་རྒྱལ་སྲས་པོ་རྣམས་ཀྱིས་ནི། །འབྱུང་བ་རྣམ་པ་བདུན་དུ་འགྱུར། །དུས་གསུམ་པོ་ཡང་ཡོད་མ་ཡིན། །རྟག་པ་དང་ནི་མི་རྟག་མེད། །བྱེད་དང་ལས་དང་འབྲས་བུ་རྣམས། །རྨི་ལམ་གྱི་ནི་བྱ་བ་བཞིན། །སངས་རྒྱས་ཉན་ཐོས་རྒྱལ་བའི་སྲས། །ཐོག་མ་ཐ་མར་འབྱུང་བ
171a2 མེད། །སེམས་ཀྱི་སྣང་དང་བྲལ་བ་སྟེ། །རྟག་ཏུ་སྒྱུ་མའི་ཆོས་དང་འདྲ། །རུམ་དང་འཁོར་ལོ་སྐྱེ་དེ་བཞིན། །འབྱུང་དང་དགའ་ལྡན་གྱི་གནས་དང་། །ཞིང་ཀུན་ཏུ་ནི་གཤེགས་པར་ཡང་། །སྣང་ཡང་མངལ་ནས་སྐྱེ་བ་མིན། །འཕོ་དང་རྒྱུ་དང་སེམས་ཅན་དང་། །དེ་བཞིན་སྟོན་དང་མྱ་ངན་འདས། །བདེན་པ
171a3 དང་ནི་ཞིང་རྟོགས་པ། །རྐྱེན་རྣམས་ཀྱིས་ནི་འཕངས་པ་ཡིན། །འཇིག་རྟེན་དང་ནི་ནགས་ཚལ་གླིང་། །མུ་སྟེགས་འཕོ་དང་བདག་མེད་དང་། །བསམ་གཏན་ཐེག་གནས་ཐོབ་པ་དང་། །འབྲས་བུའི་སྤྱོད་ཡུལ་བསམ་མི་ཁྱབ། །ཟླ་བ་སྐར་མའི་རིགས་རྣམས་དང་། །རྒྱལ་པོའི་རིགས་དང་ལྷ་ཡི་རྣམས། །
171a4 གནོད་སྦྱིན་དྲི་ཟའི་རིགས་རྣམས་ནི། །ལས་ལས་སྐྱེས་ཤིང་སྲིད་ལས་བྱུང་། །བསམ་གྱིས་མི་ཁྱབ་འགྱུར་བ་ན། །ཤི་འཕོ་བག་ཆགས་ལྡན་པ་སྟེ། །ཤི་འཕོར་སྣང་བ་ཆད་ན་ནི། །ཉོན་མོངས་དྲ་བ་འགག་པར་འགྱུར། །བ་ལང་ལུག་དང་བྲན་རྣམས་དང་། །དེ་བཞིན་གླང་པོ་རྟ་ལ་སོགས། །ནོར་དང་འབྲུ
171a5 དང་གསེར་རྣམས་དང་། །ཞིང་གི་དངོས་པོར་རྣམ་པར་རྟོག་།ཁྲི་དག་ལ་ཡང་ཉལ་མི་བྱ། །ས་ལ་ཡང་ནི་མི་བསྐུའོ། །གསེར་དང་དངུལ་དང་ཁར་བ་དང་། །ཟངས་ཀྱི་ལྷུང་བཟེད་མི་བཅང་ངོ་། །སྣམ་བུ་སྔོན་པོར་བཙོས་པ་དང་། །བ་ལང་ལྕི་བ་ངུར་སྨྲིག་དང་། །ས་དང་འབྲས་བུ་ལོ་མ་ཡིས། །རྣལ་འབྱོར
171a6 རྟག་ཏུ་དཀར་པོ་བསྒྱུར། །ལྕགས་དང་རྡོ་དང་ཁམ་པ་དང་། །དུང་དང་ཤེལ་ལས་བྱས་པ་ཡི། །མ་ག་དྷཱ་ཡི་བྲེ་གང་ཚད། །ལྷུང་བཟེད་རྣལ་འབྱོར་ཅན་གྱིས་བཅང་། །དགུ་པོ་གོས་དྲའི་གྲི་ཡང་ནི། །སོར་བཞི་པ་ཡི་ཚད་དུ་བྱ། །རྣལ་འབྱོར་གཞོལ་བའི་རྣལ་འབྱོར་པས། །བཟོ་ཡི་རིག་པ་མི་བསླབ་བོ། །
171a7 རྣལ་འབྱོར་ཞུགས་པའི་རྣལ་འབྱོར་པས། །ཉོ་དང་བཙོང་བར་མི་བྱའོ། །ཀུན་དགའི་ཁྱིམ་པས་དེ་བྱས་ཏེ། །དེ་ནི་ཆོས་སུ་ངས་བཤད་དོ། །དབང་པོ་བསྡམས་ཤིང་དོན་ཤེས་པས། །མདོ་དང་འདུལ་ལ་དེ་བཞིན་ཏེ། །ཁྱིམ་པ་དང་ནི་མ་འདྲེས་པར། །རྣལ་འབྱོར་ཅན་ལ་དེ་ངས་བཤད། །སྟོང་པའི་ཁྱིམ་འམ
iiif viewer powered by OpenSeadragon
