| e-texts navigator |
| Wylie |
170b1 བརྟགས་ན་འཇིག་པར་འགྱུར། །གལ་ཏེ་བརྟགས་པའི་དངོས་མེད་ལ། །གཞན་གྱི་དབང་གི་དངོས་ཡོད་ན། །དངོས་པོ་མེད་པར་དངོས་པོར་འགྱུར། །དངོས་པོ་དངོས་མེད་ལས་བྱུང་འགྱུར། །ཀུན་ཏུ་བརྟགས་ལ་གནས་བཅས་ཏེ། །གཞན་གྱི་དབང་ནི་དམིགས་པར་འགྱུར། །མིང་དང་མཚན་མ་འབྲེལ་པ་ལས། །
170b2 ཀུན་ཏུ་བརྟགས་པ་འབྱུང་བར་འགྱུར། །བརྟགས་པ་ཤིན་ཏུ་མ་གྲུབ་ན། །གཞན་ལས་བྱུང་བ་མ་ཡིན་ནོ། །དམ་པའི་དོན་གྱི་ངོ་བོ་ཉིད། །དག་པ་དེ་ཚེ་ཤེས་པར་འགྱུར། །ཀུན་ཏུ་རྟོག་པ་རྣམ་པ་བཅུ། །གཞན་གྱི་དབང་ནི་རྣམ་པ་དྲུག་།སོ་སོ་རང་རིག་དེ་བཞིན་ཉིད། །དེ་ཡི་ཕྱིར་ན་ཁྱད་མེད་དོ། །ཆོས་ལྔ་དེ་བཞིན་ཉིད
170b3 ཡིན་ཏེ། །རང་བཞིན་གསུམ་ཡང་དེ་བཞིན་ནོ། །རྣལ་འབྱོར་ཅན་གྱིས་དེ་བསྒོམས་ན། །དེ་བཞིན་ཉིད་ལས་མི་འདའོ། །སྐར་མ་དང་ནི་སྤྲིན་ལྟ་བུར། །ཉི་མ་ཟླ་བ་འདྲ་བ་དང་། །བག་ཆགས་ལས་བྱུང་སྣང་འདྲ་བ། །མི་རྣམས་ཀྱི་ནི་སེམས་སྣང་ངོ་། །འབྱུང་བ་འདི་དག་ལུས་མ་རེད། །མཚན་ཉིད་མེད་ཅིང་མཚན
170b4 གཞི་མེད། །ཇི་སྟེ་འབྱུང་བའི་འབྱུང་ཡིན་ལ། །གཟུགས་ནི་འབྱུང་ལས་གྱུར་ཡིན་ན། །འབྱུང་བ་ཆེན་པོ་ཡང་དག་མིན། །འབྱུང་བ་འབྱུང་ལས་གྱུར་པ་མེད། །འབྱུང་བ་ཆེན་པོ་རྒྱུ་ཡིན་ཏེ། །འབྲས་བུ་ས་དང་ཆུ་ལ་སོགས། །རྫས་དང་བཏགས་དང་གཟུགས་རྣམས་དང་། །སྒྱུ་མའི་རྣམ་བྱས་དེ་བཞིན་ཏེ། །རྨི་ལམ་དྲི་ཟའི
170b5 གྲོང་གི་གཟུགས། །སྨིག་རྒྱུ་བ་དང་ལྔ་ཡིན་ནོ། །འདོད་པ་ཅན་ནི་རྣམ་ལྔ་དང་། །རིགས་ཀྱང་དེ་བཞིན་ལྔ་ཡིན་ཏེ། །ཐེག་པ་ལྔ་དང་ཐེག་པ་མེད། །མྱ་ངན་འདས་པ་རྣམ་དྲུག་ཡིན། །ཕུང་པོ་ཐ་དད་ཉི་ཤུ་བཞི། །གཟུགས་ཀྱང་རྣམ་པ་བརྒྱད་དུ་འགྱུར། །སངས་རྒྱས་ཉི་ཤུ་རྩ་བཞི་ཡིན། །རྒྱལ་བའི་སྲས་ནི་རྣམ
170b6 པ་གཉིས། །ཚུལ་ཡང་བརྒྱ་པོ་རྩ་བརྒྱད་དེ། །དེ་བཞིན་ཉན་ཐོས་རྣམ་གསུམ་མོ། །སངས་རྒྱས་རྣམས་ཀྱི་ཞིང་གཅིག་སྟེ། །དེ་བཞིན་སངས་རྒྱས་གཅིག་ཏུ་འགྱུར། །རྣམ་པར་གྲོལ་བ་དེ་བཞིན་གསུམ། །སེམས་ཀྱི་རྒྱུད་ནི་རྣམ་པ་བཞི། །ང་ཡི་བདག་མེད་རྣམ་པ་དྲུག་།ཤེས་པར་བྱ་བའང་རྣམ་པ་བཞི། །རྒྱུ་རྣམས
170b7 དང་ནི་བྲལ་གྱུར་པ། །ལྟ་བའི་ཉེས་པ་རྣམ་པར་སྤངས། །སོ་སོ་རང་རིག་མི་གཡོ་བ། །ཐེག་པ་ཆེན་པོ་བླ་ན་མེད། །སྐྱེ་བ་དང་ནི་མི་སྐྱེ་བ། །རྣམ་པ་བརྒྱད་དང་རྣམ་དགུར་འགྱུར། །གཅིག་དང་རིམ་གྱིས་རྟོགས་པ་སྟེ། །གྲུབ་པའི་མཐའ་ཡང་གཅིག་ཉིད་དོ། །གཟུགས་མེད་ཁམས་ནི་རྣམ་པ་བརྒྱད། །བསམ
iiif viewer powered by OpenSeadragon
