| e-texts navigator |
| Wylie |
169a1 ཆོས་རྣམས་ཐམས་ཅད་རྟོགས་པའི་ཕྱིར། །སངས་རྒྱས་ཡེ་ཤེས་རྣམ་དག་འགྱུར། །མིག་དང་གཟུགས་དང་སྣང་བ་དང་། །ཡིད་དང་ནམ་མཁའ་དེ་བཞིན་ཏེ། །དེ་དག་གིས་ནི་མི་རྣམས་ཀྱི། །ཀུན་གཞི་ལས་བྱུང་རྣམ་ཤེས་ཏེ། །གཟུང་དང་འཛིན་དང་འཛིན་བྱེད་པ། །
169a2 མིང་དང་དངོས་མིན་མེད་པ་དང་། །རྣམ་པར་རྟོག་པ་རྒྱུ་མེད་པར། །གང་སེམས་དེ་དག་མཁས་མ་ཡིན། །དོན་ལས་མིང་ནི་མ་བྱུང་སྟེ། །མིང་ལས་དོན་ཀྱང་དེ་བཞིན་ནོ། །རྒྱུ་དང་རྒྱུ་མེད་ལས་བྱུང་བའི། །རྣམ་པར་རྟོག་པ་མ་རྟོག་ཅིག་།དངོས་པོ་ཐམས་ཅད་རང་བཞིན་མེད། །
169a3 ཚིག་ཀྱང་དེ་བཞིན་མེད་པ་ཡིན། །སྟོང་པ་དང་ནི་སྟོང་པའི་དོན། །བྱིས་པ་མ་མཐོང་རྣམ་པར་རྒྱུག་།རློམ་སེམས་བདེན་དགོད་མཐོང་བས་ནི། །བཏགས་པ་ཡི་ནི་བཤད་པའོ། །གཅིག་པོ་རྣམ་པ་ལྔར་གྲུབ་པས། །བདེན་པ་པོ་འདི་སྤོང་བར་འགྱུར། །སྤྲོས་པ་བདུད་ཀྱིས་བཟུང་བ་ཡིན། །
169a4 ཡོད་དང་མེད་ལས་འདའ་བར་བྱ། །ལོག་པའི་འདུ་ཤེས་བདག་མེད་པར། །མཐོང་བས་སྲིད་ལ་འདུན་མི་བྱ། །བརྟག་པ་བྱེད་དང་བཅས་པ་ནི། །རྩོད་པ་ཙམ་ཞིག་འཇུག་པ་སྟེ། །བདེན་པའི་མཆོག་ནི་སྨྲར་མེད་པ། །འགགས་ན་ཆོས་ནི་མཐོང་བ་ཡིན། །ཀུན་གཞི་ལ་ནི་རྟེན་བཅས་ནས། །ཡིད
169a5 ཀྱང་ཤིན་ཏུ་འཇུག་པར་འགྱུར། །སེམས་དང་ཡིད་ལ་རྟེན་བཅས་ནས། །རྣམ་པར་ཤེས་པ་འཇུག་པར་འགྱུར། །སྒྲོ་བཏགས་པ་དང་སྒྲོ་འདོགས་པ། །སེམས་ཀྱི་ཆོས་ཉིད་དེ་བཞིན་ཉིད། །རྣལ་འབྱོར་པས་ནི་དེ་བསྒོམས་ན། །སེམས་ཙམ་ཤེས་པ་ཐོབ་པར་འགྱུར། །ཡིད་དང་མཚན
169a6 ཉིད་དངོས་པོ་ལ། །རྟག་དང་མི་རྟག་རློམ་སེམས་མེད། །སྐྱེ་དང་མི་སྐྱེར་རྣལ་འབྱོར་ལ། །རྣལ་འབྱོར་པ་ནི་རློམ་སེམས་མེད། །ཀུན་གཞི་ལས་བྱུང་རྣམ་ཤེས་ནི། །དོན་གཉིས་ལ་ནི་རྟོག་པར་བྱེད། །དེ་ལས་བྱུང་བའི་དོན་གཅིག་ལ། །སེམས་གཉིས་ཀྱིས་ནི་མི་ཤེས་འགྱུར། །སྨྲ་བ་མེད
169a7 ཅིང་ཚིག་མེད་དེ། །སེམས་མཐོང་ཕྱིར་ནི་སྟོང་མ་ཡིན། །རང་གི་སེམས་ནི་མ་མཐོང་ཕྱིར། །ལྟ་བའི་དྲ་བ་འཇུག་པར་འགྱུར། །རྐྱེན་རྣམས་འོང་བ་མེད་པ་སྟེ། །དངོས་པོ་དག་ནི་གང་ཡང་མེད། །ཁམས་རྣམས་མེད་ཅིང་ཕུང་པོ་མེད། །འདོད་ཆགས་མེད་ཅིང་འདུས་བྱས་མེད། །ལས་དང
iiif viewer powered by OpenSeadragon
