| e-texts navigator |
| Wylie |
163b1 སྟོང་པར་རྟོག་། ས་བོན་འབབ་ཆུ་མར་མེ་དཔེས། །སྐད་ཅིག་པ་ཡི་དོན་དུ་རྟོག་།བྱེད་པ་མེད་ཅིང་སྐད་ཅིག་པ། །དབེན་པར་བྱ་བ་སྤངས་པ་དང་། །ཆོས་རྣམས་ཀྱིས་ནི་མི་སྐྱེ་བ། །སྐད་ཅིག་དོན་དུ་ངས་བཤད་དོ། །ཡོད་དང་མེད་ལས་སྐྱེས་པར་ནི། །ཁྱད་པར་པ་དང་གྲངས་ཅན་ཤེས། །
163b2 ལུང་དུ་མ་བསྟན་ཐམས་ཅད་ཀྱང་། །དེ་དག་ཉིད་ཀྱིས་བཤད་པའོ། །ལུང་བསྟན་པ་ནི་རྣམ་བཞི་སྟེ། །མགོ་གཅིག་དང་ནི་དྲི་བ་དང་། །རྣམ་པར་དབྱེ་དང་གཞག་པ་རྣམས། །མུ་སྟེགས་སྨྲ་བ་བཟློག་པའོ། །ཀུན་རྫོབ་ཏུ་ནི་ཐམས་ཅད་ཡོད། །དམ་པའི་དོན་དུ་ཡོད་མ་ཡིན། །ཆོས་རྣམས
163b3 རང་བཞིན་མེད་པ་ལ། །དམ་པའི་དོན་དུ་འདོད་ན་ནི། །དམིགས་པ་རང་བཞིན་མེད་པ་ལ། །དེ་ཕྱིར་ཀུན་རྫོབ་བསྟན་པ་ཡིན། །དངོས་པོ་བརྗོད་པའི་རྒྱུས་བྱུང་བ། །གལ་ཏེ་རང་བཞིན་ཡོད་ན་ནི། །བརྗོད་པ་དག་ལས་བྱུང་བ་ཡི། །དངོས་པོ་མེད་ཅེས་བྱ་བ་མེད། །བརྗོད་པ་འདི་ན་དངོས་མེད་དེ། །
163b4 ཀུན་རྫོབ་ཏུ་ཡང་ཡོད་མ་ཡིན། །ཕྱིན་ཅི་ལོག་ནི་ཡོད་མིན་པས། །དམིགས་པ་ཡོད་པ་མ་ཡིན་ནོ། །གལ་ཏེ་ཕྱིན་ཅི་ལོག་ཡོད་ན། །ངོ་བོ་ཉིད་མེད་མེད་པར་འགྱུར། །ཕྱིན་ཅི་ལོག་ནི་བཞི་ཡི་ཕྱིར། །གང་དང་གང་དག་དམིགས་གྱུར་པ། །དེ་ནི་རང་བཞིན་མེད་པར་འགྱུར། །ཐམས་ཅད་དུ་ཡང་མེད་པ
163b5 ཡིན། །གང་འདི་སྣ་ཚོགས་སྣང་བ་ནི། །གནས་ངན་ལེན་གྱིས་བསྒོས་པའི་སེམས། །གཟུགས་སུ་སྣང་བ་འཛིན་པ་སྟེ། །ཕྱི་རོལ་དག་ནི་སེམས་འཁྲུལ་བ། །རྟོག་པ་དང་ནི་མི་རྟོག་པས། །རྣམ་རྟོག་རབ་ཏུ་སྤོང་འགྱུར་ཏེ། །མི་རྟོག་རྣམ་པར་རྟོག་པའི་ས། །སྟོང་པ་ཉིད་ནི་ཡང་དག་མཐོང་། །སྒྱུ་མ
163b6 གླང་པོ་སྣ་ཚོགས་ལྟར། །ལོ་མ་རྣམས་དང་གསེར་བཞིན་དུ། །མི་ཤེས་པས་ནི་སེམས་བསྒོས་པས། །དེ་བཞིན་མི་ལ་སྣང་བ་མངོན། །འཕགས་པས་ནོར་བ་མི་མཐོང་སྟེ། །ཡང་དག་ཉིད་ཀྱང་སྐབས་དེར་མིན། །གང་ཕྱིར་སྐབས་དེར་ཡང་དག་ན། །ནོར་པ་ཡང་དག་ཉིད་དུ་འགྱུར། །
163b7 ནོར་བ་ཐམས་ཅད་སྤངས་ནས་ཀྱང་། །གལ་ཏེ་མཚན་མ་སྐྱེར་ཟིན་ན། །དེ་ཉིད་དེ་ཡི་ནོར་བ་སྟེ། །རབ་རིབ་ཡོངས་སུ་མ་དག་བཞིན། །རབ་རིབ་ཅན་རྣམས་བསླད་པ་ཡིས། །སྐྲ་ཤད་མཐོང་བ་ཇི་བཞིན་དུ། །དེ་བཞིན་བྱིས་པ་རྣམས་ཀྱི་ཡང་། །འཛིན་པ་ཡུལ་ལ་ཤིན་ཏུ་འཇུག་།
iiif viewer powered by OpenSeadragon
