| e-texts navigator |
| Wylie |
161b1 གང་ནའང་སུས་ཀྱང་མ་མཐོང་སྟེ། །གང་ན་སུས་གང་མ་མཐོང་བ། །དེ་ལ་ཇི་ལྟར་རྣམ་པར་བསྒོམ། །རྐྱེན་དང་གཏན་ཚིགས་དཔེ་རྣམས་དང་། །དམ་འཆའ་བ་དང་རྒྱུ་རྣམས་ཀྱིས། །རྨི་ལམ་དྲི་ཟའི་འཁོར་ལོ་དང་། །སྨིག་རྒྱུ་ཉི་མ་ཟླ་བ་དང་། །གུ་འོད་སོགས་དཔེ་རྣམས་ཀྱིས། །
161b2 སྐྱེ་བ་དེ་དག་ངས་བཟློག་གོ། །འགྲོ་བ་རྨི་ལམ་སྒྱུ་མ་འདྲ། །སྟོང་པ་དང་ནི་བརྟགས་པ་སྟེ། །འཇིག་རྟེན་གསུམ་ལ་མི་གནས་ཤིང་། །ཕྱི་ནང་དུ་ཡང་དེ་བཞིན་ཏེ། །སྲིད་པ་མ་སྐྱེས་མཐོང་བས་ན། །མི་སྐྱེ་བཟོད་པ་འབྱུང་བར་འགྱུར། །སྒྱུ་མ་ལྟ་བུའི་ཏིང་ངེ་འཛིན། །ལུས་ཀྱང་སྒྱུ
161b3 མ་ལྟ་བུ་སྟེ། །མངོན་ཤེས་དབང་དང་སྟོབས་རྣམས་ཀྱང་། །དེ་ཡི་སེམས་ལ་སྣ་ཚོགས་འགྱུར། །གང་གི་དངོས་པོ་མ་སྐྱེས་པ། །སྟོང་པ་ཤིན་ཏུ་རང་བཞིན་མེད། །དེ་དག་ལ་ནི་རྐྱེན་རྣམས་ཀྱིས། །ནོར་བ་སྐྱེ་ཞིང་འགག་པར་འགྱུར། །ཕྱི་རོལ་སྣང་བའི་གཟུགས་ཅན་གྱིས། །སེམས
161b4 དང་སེམས་ནི་སྣང་བར་འགྱུར། །ཇི་ལྟར་བྱིས་པས་བརྟགས་པ་ལྟར། །མཐོང་བར་བྱ་བ་གཞན་མེད་དོ། །འབྲེལ་བ་རྣམས་དང་སངས་རྒྱས་གཟུགས། །འབྱུང་བ་རྣམས་ནི་འཇིག་པ་དང་། །ཤིན་ཏུ་བསླབས་པས་རྣམ་རིག་གིས། །འགྲོ་བ་སྣ་ཚོགས་བྱིན་གྱིས་རློབ། །ལུས་དང་གནས
161b5 དང་ལོངས་སྤྱོད་རྣམས། །གཟུང་བ་རྣམ་རིག་གསུམ་པོ་སྟེ། །ཡིད་དང་འཛིན་པའི་རྣམ་རིག་དང་། །རྣམ་པར་རྟོག་ནི་འཛིན་པ་གསུམ། །རྣམ་པར་རྟོག་དང་རྣམ་བརྟག་པ། །ཇི་སྲིད་ཡི་གེའི་སྤྱོད་ཡུལ་བ། །རྟོག་ཅན་རྟོག་གེས་ནོར་པའི་ཕྱིར། །དེ་སྲིད་ཡང་དག་མི་མཐོང་ངོ་། །གང
161b6 གི་ཚེ་ན་ཤེས་རབ་ཀྱིས། །དངོས་པོ་རང་བཞིན་མེད་པར་ཤེས། །དེ་ཡི་ཚེ་ན་རྣལ་འབྱོར་ཅན། །མཚན་མེད་གནས་ཤིང་ངལ་ཡང་བསོ། །བྱ་གག་སྣག་ཙས་བསྐུས་པ་ལ། །དེ་ཉིད་ཐི་བར་མི་ཤེས་འཛིན། །མི་ཤེས་པ་ཡི་བྱིས་པ་དག་།ཐེག་པ་གསུམ་ལའང་དེ་བཞིན་ནོ། །འདི་ལ
161b7 ཉན་ཐོས་གང་ཡང་མེད། །རང་རྒྱལ་བ་དག་དེ་བཞིན་ཏེ། །ཉན་ཐོས་དང་ནི་རང་རྒྱལ་བའི། །གང་གཟུགས་འདི་དག་སྣང་བ་ནི། །བྱང་ཆུབ་སེམས་དཔའ་སྙིང་བརྩེ་ཅན། །དེ་དག་སྤྲུལ་པ་སྟོན་པའོ། །སྲིད་པ་གསུམ་ནི་རྣམ་རིག་ཙམ། །རང་བཞིན་གཉིས་ནི་བརྟགས་པ་སྟེ། །ཆོས
iiif viewer powered by OpenSeadragon
