| e-texts navigator |
| Wylie |
160b1 འབྱུང་བ་འཇིག་པ་མཐོང་བ་མེད། །ལྷ་ཡི་ཕོ་བྲང་འོག་མིན་ནོ། །སྡིག་པ་ཐམས་ཅད་རྣམ་སྤངས་པར། །རྟག་ཏུ་རྣམ་པར་མི་རྟོག་ལྡན། །སེམས་དང་སེམས་ལས་བྱུང་བ་སྤངས། །སྟོབས་དང་མངོན་ཤེས་དབང་ཐོབ་པ། །དེ་དག་ཏིང་འཛིན་དབང་རྙེད་ནས། །རྫོགས་པའི་སངས་རྒྱས
160b2 དེར་འཚང་རྒྱ། །སྤྲུལ་པ་རྣམས་ནི་འདིར་འཚང་རྒྱ། །སངས་རྒྱས་རྣམས་ཀྱི་སྤྲུལ་པ་དག་།བྱེ་བ་དཔག་མེད་འབྱུང་བར་འགྱུར། །བྱིས་པ་ཀུན་ནི་དེ་དག་ལས། །བྲག་ཅ་འདྲ་ཆོས་བསམ་ཡས་ཉོན། །ཐོག་མ་དབུས་དང་མཐའ་ལས་གྲོལ། །དངོས་པོ་དང་ནི་དངོས་མེད་སྤངས། །ཁྱབ་པ
160b3 མི་གཡོ་དག་པ་སྟེ། །སྣ་ཚོགས་མེད་ལ་སྣ་ཚོགས་འབྱུང་། །རྣམ་པར་རིག་པའི་རིགས་ཀྱིས་གཡོགས། །ལུས་ཅན་ཀུན་ལ་གནས་པ་སྟེ། །སྒྱུ་མ་ནོར་བ་ཡོད་མོད་ཀྱི། །སྒྱུ་མ་ནོར་བའི་རྒྱུ་མ་ཡིན། །འཇིག་རྟེན་དག་ན་སེམས་སླུ་བ། །ཅུང་ཟད་ཙམ་ནི་གང་ཡོད་པ། །རང་བཞིན་གཉིས
160b4 དང་འབྲེལ་བ་སྟེ། །ཀུན་གཞི་རྣམ་པར་ཤེས་པས་སྤྲུལ། །རྣམ་རིག་ཙམ་གྱི་ལྟ་ཤྭ་དང་། །གང་ཟག་ཆོས་སུ་སྤྱོད་པར་ཡང་། །འཇིག་རྟེན་དེ་ལྟར་རྣམ་བསྒོམས་ནས། །ནམ་ཞིག་ཤིན་ཏུ་གྱུར་པ་ན། །དེ་ཚེ་ང་ཡི་བུ་ཡིན་ཏེ། །རྫོགས་པའི་ཆོས་རྣམས་རབ་སྟོན་པ། །དྲོད་དང
160b5 གཤེར་དང་སྲ་གཡོ་བར། །ཆོས་རྣམས་བྱིས་པས་རྣམ་པར་བརྟགས། །ཡང་དག་མ་ཡིན་སྒྲོ་བཏགས་ཏེ། །མཚན་ཉིད་མེད་ཅིང་མཚན་གཞི་མེད། །རྒྱུན་རྣམས་ཀྱི་ནི་ལུས་འདི་ལ། །འདི་ནི་རྫས་བརྒྱད་གཟུགས་ཡིན་ཏེ། །ལུས་ཀྱི་དབྱིབས་དང་དབང་པོར་ནི། །བྱིས་པ་ནོར་བ
160b6 རྣམས་རྟོག་གོ། །རྒྱུ་དང་རྐྱེན་རྣམས་ཚོགས་པ་ལས། །བྱིས་པ་འབྱུང་བར་རྟོག་པར་བྱེད། །ཚུལ་འདི་དག་ནི་མི་ཤེས་པས། །སྲིད་པ་གསུམ་གྱི་གནས་ན་འཁྱམ། །དངོས་པོ་ཐམས་ཅད་རང་བཞིན་མེད་པ་སྟེ། །རྟོག་པ་མེ་ཡི་ཚིག་ཡིན་དེ་ཡང་མེད། །སྲིད་པ་རྨི་ལམ་སྤྲུལ་བཞིན
160b7 བརྟགས་བྱས་ནས། །འཁོར་བར་མི་བྱ་མྱ་ངན་འདས་མི་བྱ། །སྣ་ཚོགས་ས་བོན་ཞེས་བྱའི་སེམས། །སེམས་ཀྱི་སྤྱོད་ཡུལ་ལ་སྣང་སྟེ། །སྣང་ནས་རྟོག་པ་གཉིས་དག་གི། །བྱིས་པ་རྣམས་ནི་སྐྱེ་བར་རྟོག་།མི་ཤེས་པ་དང་སྲེད་དང་ལས། །སེམས་དང་སེམས་ལས་བྱུང་གནས་ཏེ། །
iiif viewer powered by OpenSeadragon
