| e-texts navigator |
| Wylie |
147b1 གཏམ་བཤད་ན་འཇིག་རྟེན་གྱི་ཕུལ་ལས་འདས་པའི་དཔེ་རིགས་པ་རྣམས་མི་བྱ་སྟེ། ཡིད་ཆེས་པར་མི་རུང་བས་ན་བྱིས་པ་སོ་སོའི་སྐྱེ་བོ་རྣམས་དད་པར་མི་འགྱུར་རོ། །དེ་ཁོ་ན་ཉིད་ནི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་ལས་འདས་པའི་ཕྱིར་བདག་གི་འཕགས་པ་སོ་སོ་རང
147b2 གི་ཡེ་ཤེས་ཀྱི་སྤྱོད་ཡུལ་ལ་ནི་དཔེ་རྣམས་མི་འཇུག་གོ། །དེ་ཁོ་ན་ཉིད་ནི་དེ་བཞིན་གཤེགས་པ་རྣམས་ཡིན་ཏེ། དེའི་ཕྱིར་ན་དེ་དག་ལ་དཔེ་རྣམས་གཞག་པར་མི་བྱ་མོད་ཀྱི། བློ་གྲོས་ཆེན་པོ་འོན་ཀྱང་འདི་ནི་དཔེ་ཙམ་དུ་བྱས་པ་འདི་ལྟ་སྟེ། དེ་བཞིན་གཤེགས་པ་རྣམས་ནི་གང་གཱའི་ཀླུང
147b3 གི་བྱེ་མ་སྙེད་དང་མཉམ་སྟེ། མི་རྟོག་རྣམ་པར་མི་རྟོག་པས་ན་མཉམ་ཞིང་མི་མཉམ་པ་མེད་དོ། །བློ་གྲོས་ཆེན་པོ་འདི་ལྟ་སྟེ། གང་གཱའི་ཀླུང་གི་བྱེ་མ་རྣམས་ནི་ཉ་དང་། རུ་སྦལ་དང་། ཆུ་སྲིན་བྱིས་པ་གསོད་དང་། མི་དང་། མ་ཧེ་དང་། སེང་གེ་དང་། གླང་པོ་དང་། རྟ་ལ
147b4 སོགས་པས་དཀྲུགས་ཀྱང་དཀྲུགས་སོ་ཞེའམ། མ་དཀྲུགས་སོ་ཞེས་མི་རྟོག་རྣམ་པར་མི་རྟོག་ཅིང་དང་ས་ལ་དྲི་མ་དང་བྲལ་ཏེ་རྣམ་པར་རྟོག་པ་མེད་དོ། །དེ་བཞིན་དུ་བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བདག་གི་འཕགས
147b5 པ་སོ་སོ་རང་གི་ཡེ་ཤེས་ནི་གང་གཱའི་ཀླུང་གི་སྟོབས་དང་། དབང་དང་། མངོན་པར་ཤེས་པའི་བྱེ་མ་རྣམས་བྱིས་པ་མུ་སྟེགས་བྱེད་ཕ་རོལ་རྒོལ་བའི་ཉ་ཐམས་ཅད་ཀྱིས་དཀྲུགས་ཀྱང་དེ་བཞིན་གཤེགས་པ་རྣམས་ཀྱིས་སྔོན་གྱི་སྨོན་ལམ་བཏབ་པའི་ཕྱིར་མི་རྟོག་རྣམ་པར་མི་རྟོག་སྟེ། བདེ
147b6 བའི་སྙོམས་པར་འཇུག་པ་ཐམས་ཅད་ཡོངས་སུ་རྫོགས་པས་སེམས་ཅན་རྣམས་ལ་མི་རྟོག་རྣམ་པར་མི་རྟོག་གོ། །དེ་བས་ན་དེ་བཞིན་གཤེགས་པ་དེ་དག་ནི་མཛའ་བ་དང་། ཁོང་ཁྲོ་བ་མེད་པའི་ཕྱིར་གང་གཱའི་ཀླུང་གི་བྱེ་མ་དང་མཉམ་སྟེ། བྱེ་བྲག་མེད་དོ། །འདི་ལྟ་སྟེ། བློ་གྲོས་ཆེན་པོ
147b7 གང་གཱའི་ཀླུང་གི་བྱེ་མ་རྣམས་ནི་སའི་མཚན་ཉིད་ཀྱི་རང་བཞིན་ཡིན་པས་བསྐལ་པ་འཚིག་པ་ནས་ནི་བསྲེགས་ཀྱང་སའི་རང་བཞིན་མི་འདོར་རོ། །བློ་གྲོས་ཆེན་པོ་མེའི་ཁམས་དང་འབྲེལ་པའི་ཕྱིར་ས་ནི་མི་འཚིག་སྟེ། གཞན་དུ་ན་བྱིས་པ་སོ་སོའི་སྐྱེ་བོ་རྣམས་ལོག་པར་ལྟུང་བའི་བློས
iiif viewer powered by OpenSeadragon
