| e-texts navigator |
| Wylie |
140a1 ཞེས་སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་མཚན་ཉིད་འདྲིས་པར་བྱ་བ་ལ་མཁས་པ་དང་། བདག་དང་བདག་གིར་འཛིན་པ་དང་། ཆོས་དང་། གང་ཟག་ལ་བདག་མེད་པ་དང་། འཇུག་པ་དང་། ལྡོག་པ་དང་། རང་དང་། སྤྱིའི
140a2 མཚན་ཉིད་ལ་འདྲིས་པར་བྱ་བ་དང་། སོ་སོ་ཡང་དག་པར་རིག་པ་རྣམ་པར་གདོན་མི་ཟ་བ་ལ་མཁས་པ་དང་། དབང་ལ་ཆགས་པའི་བདེ་བ་དང་། སའི་ལ་རྗེས་སུ་འཇུག་པ་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམ་པར་དབྱེ་བ་ངས་བྱས་སོ། །དེའི་ཕྱིར་སའི
140a3 རྣམ་པར་གཞག་པ་བྱས་ཏེ། བློ་གྲོས་ཆེན་པོ་འདི་ལ་གང་ཡང་འཇུག་པའམ། ལྡོག་པ་མེད་དོ། །གཞན་དུ་ན་འདི་ལྟ་སྟེ། སའི་དང་། མཚམས་སྦྱར་བ་ཁམས་གསུམ་པ་སྣ་ཚོགས་སུ་བཏགས་པ་འདི་ནི་རང་གི་སེམས་སྣང་བ་ཙམ་སྟེ། བྱིས་པ་རྣམས་ཀྱིས་ནི་ཁོང་དུ
140a4 མི་ཆུད་དོ། །བྱིས་པ་རྣམས་ཀྱིས་ཁོང་དུ་མ་ཆུད་པས་ཁམས་གསུམ་པ་སྣ་ཚོགས་སུ་བཏགས་པ་འདི་ནི་སའི་མཚམས་སྦྱར་བ་བསྟན་པ་དང་། ང་དང་སངས་རྒྱས་དེ་དག་གིས་རྣམ་པར་བཞག་གོ། །གཞན་ཡང་བློ་གྲོས་ཆེན་པོ་ཉན་ཐོས་དང་། རང་སངས་རྒྱས་རྣམས
140a5 ནི་བྱང་ཆུབ་སེམས་དཔའི་ས་བརྒྱད་ལ་འགོག་པའི་སྙོམས་པར་འཇུག་པའི་བདེ་བའི་མྱོས་པས་མྱོས་ཏེ། རང་གི་སེམས་སྣང་བ་ཙམ་ལ་མི་མཁས་པས་རང་དང་། སྤྱིའི་མཚན་ཉིད་ཀྱི་སྒྲིབ་པའི་བག་ཆགས་དང་། གང་ཟག་དང་། ཆོས་ལ་བདག་མེད་པར་འཛིན་པའི་ལྟ་བར་ལྷུང་བས
140a6 རྣམ་པར་རྟོག་པ་དེ་ལ་མྱ་ངན་ལས་འདས་པ་མོས་པའི་བློར་འགྱུར་ཏེ། རབ་ཏུ་དབེན་པའི་ཆོས་ལ་མོས་པའི་བློ་ནི་མ་ཡིན་ནོ། །བློ་གྲོས་ཆེན་པོ་བྱང་ཆུབ་སེམས་དཔའ་རྣམས་ནི་འགོག་པའི་ཏིང་ངེ་འཛིན་གྱི་བདེ་བའི་སྒོ་མཐོང་ནས་སྔོན་གྱི་སྨོན་ལམ་དང་། སྙིང་བརྩེ་བ་དང་། སྙིང་རྗེ་དང
140a7 ལྡན་ཞིང་མཐར་ཐུག་པའི་གནས་ཀྱི་འཇུག་པ་རྣམ་པར་དབྱེ་བ་ཤེས་པས་ཡོངས་སུ་མྱ་ངན་ལས་མི་འདའ་སྟེ། དེ་དག་ནི་རྣམ་པར་རྟོག་པ་མི་འཇུག་པས། མྱ་ངན་ལས་འདས་པ་ཡང་ཡིན་ནོ། །དེ་དག་གི་གཟུང་བ་དང་། འཛིན་པའི་རྣམ་པར་རྟོག་པ་ནི་རྣམ་པར་ལོག་གོ། །ཆོས
iiif viewer powered by OpenSeadragon
