| e-texts navigator |
| Wylie |
107b1 རྟོག་པ་ལ་ནི་རྣམ་ཤེས་འཇུག་།སྣང་བ་མེད་དང་བྱེ་བྲག་ལ། །ཤེས་རབ་ཡང་དག་རབ་ཏུ་འཇུག་།ཀུན་བརྟགས་པ་ཡི་རང་བཞིན་ཡོད། །གཞན་གྱི་དབང་ནི་མེད་པ་སྟེ། །ནོར་པ་དག་གིས་བརྟགས་པ་སྣང་། །གཞན་གྱི་དབང་ལ་མི་བརྟག་གོ། །ཡན་ལག་མང་པོས་གྲུབ་པ་ཡི། །
107b2 སྒྱུ་མ་ཇི་ལྟར་མི་གྲུབ་པ། །དེ་བཞིན་མཚན་མ་སྣ་ཚོགས་ཀྱང་། །རབ་ཏུ་བརྟགས་ན་མི་འགྲུབ་བོ། །མཚན་མ་གནས་ངན་ལེན་གྱི་དངོས། །འཆིང་བ་སེམས་ལས་བྱུང་བ་སྟེ། །མི་ཤེས་རྣམས་ཀྱིས་ཀུན་བརྟགས་པ། །གཞན་གྱི་དབང་དུའང་རྣམ་པར་རྟོག་།གང་འདི་བརྟགས
107b3 པའི་དངོས་པོ་འདི། །དེ་ཉིད་གཞན་གྱི་དབང་ཡིན་ཏེ། །བརྟགས་པ་སྣ་ཚོགས་སྣང་བ་ནི། །གཞན་གྱི་དབང་དུ་དེ་བརྗོད་དོ། །ཀུན་རྫོབ་དང་ནི་དོན་དམ་སྟེ། །རྒྱུ་ལས་སྐྱེས་པ་གསུམ་དུ་མེད། །བརྟགས་པ་དང་ནི་ཀུན་རྫོབ་བཤད། །དེ་འཆད་འཕགས་པའི་སྤྱོད་ཡུལ་ལོ། །རྣལ་འབྱོར
107b4 ཅན་གྱི་དངོས་པོ་ལྟར། །སྣ་ཚོགས་གཅིག་ཏུ་རྣམ་མཛེས་ཀྱང་། །དེ་ལ་སྣ་ཚོགས་ཡོད་པ་མིན། །དེ་བཞིན་བརྟགས་པའི་མཚན་ཉིད་དོ། །ཇི་ལྟར་རབ་རིབ་ཅན་དག་གིས། །སྣང་བའི་གཟུགས་ལ་སྣ་ཚོགས་བརྟགས། །རབ་རིབ་གཟུགས་མིན་གཟུགས་མེད་མིན། །དེ་བཞིན
107b5 མཁས་པས་གཞན་གྱི་དབང་། །ཇི་ལྟར་གསེར་རྣམས་དག་པ་དང་། །ཆུ་ཡང་རྙོག་པ་སྤངས་པ་དང་། །ནམ་མཁའ་དག་ནི་སྤྲིན་མེད་ལྟར། །དེ་བཞིན་དག་པ་རབ་ཏུ་བརྟགས། །བརྟགས་པ་ལ་ནི་དངོས་པོ་མེད། །གཞན་གྱི་དབང་ནི་ཡོད་པ་སྟེ། །སྒྲོ་བཏགས་པ་དང་སྐུར་པ་དང་། །རྣམ
107b6 པར་བརྟགས་ན་འཇིག་པར་འགྱུར། །གལ་ཏེ་བརྟགས་པ་དངོས་མེད་ལ། །བདེན་པར་གཞན་གྱི་དབང་ཡོད་ན། །དངོས་པོ་མེད་པར་དངོས་པོ་སྟེ། །དངོས་པོ་མེད་ལས་དངོས་པོ་འབྱུང་། །ཀུན་བརྟགས་པ་ལ་གནས་ནས་ནི། །གཞན་གྱི་དབང་ནི་ཉེ་བར་དམིགས། །མིང་དང་མཚན་མ
107b7 འབྲེལ་པ་ལས། །ཀུན་བརྟགས་པ་ནི་སྐྱེ་བར་འགྱུར། །བརྟགས་པ་ཤིན་ཏུ་མ་གྲུབ་སྟེ། །གཞན་ལས་བྱུང་བ་མ་ཡིན་ནོ། །དེ་ཚེ་དོན་དམ་རང་བཞིན་ནི། །ཤིན་ཏུ་དག་པ་ཤེས་པར་འགྱུར། །ཀུན་བརྟགས་པ་ནི་རྣམ་བཅུ་སྟེ། །གཞན་གྱི་དབང་ནི་རྣམ་པ་དྲུག་།སོ་སོ་རང་རིག་དེ
iiif viewer powered by OpenSeadragon
