| e-texts navigator |
| Wylie |
106b1 རབ་ཏུ་དབྱེ་བའི་ཚུལ་གྱི་མཚན་ཉིད་གང་ཞེ་ན། འདི་ལྟ་སྟེ། བརྗོད་པ་ལ་རྣམ་པར་རྟོག་པ་དང་། སྨྲ་བར་བྱ་བ་ལ་རྣམ་པར་རྟོག་པ་དང་། མཚན་ཉིད་ལ་རྣམ་པར་རྟོག་པ་དང་། ནོར་ལ་རྣམ་པར་རྟོག་པ་དང་། རང་བཞིན་ལ་རྣམ་པར་རྟོག་པ་དང་། རྒྱུ་ལ་རྣམ་པར་རྟོག་པ་དང་། ལྟ་བ་ལ
106b2 རྣམ་པར་རྟོག་པ་དང་། རིག་པ་ལ་རྣམ་པར་རྟོག་པ་དང་། སྐྱེ་བ་ལ་རྣམ་པར་རྟོག་པ་དང་། སྐྱེ་བ་མེད་པ་ལ་རྣམ་པར་རྟོག་པ་དང་། འབྲེལ་པ་ལ་རྣམ་པར་རྟོག་པ་དང་། བཅིངས་པ་དང་མ་བཅིངས་པ་ལ་རྣམ་པར་རྟོག་པ་ཡིན་ཏེ། དེ་ནི་བློ་གྲོས་ཆེན་པོ་བརྗོད་པ་ཡོངས་སུ་བརྟགས་པའི་རང
106b3 བཞིན་རབ་ཏུ་དབྱེ་བའི་ཚུལ་གྱི་མཚན་ཉིད་དོ། །དེ་ལ་བློ་གྲོས་ཆེན་པོ་བརྗོད་པ་ལ་རྣམ་པར་རྟོག་པ་གང་ཞེ་ན། འདི་ལྟ་སྟེ། དབྱངས་དང་གླུ་སྙན་པ་སྣ་ཚོགས་ལ་མངོན་པར་ཆགས་པ་ཡིན་ཏེ། དེ་ནི་བློ་གྲོས་ཆེན་པོ་བརྗོད་པ་ལ་རྣམ་པར་རྟོག་པའོ། །དེ་ལ་བློ་གྲོས་ཆེན་པོ་སྨྲ་བར་བྱ་བ་ལ་རྣམ་པར
106b4 རྟོག་པ་གང་ཞེ་ན། འདི་ལྟ་སྟེ། གང་ཅིའང་རུང་སྨྲ་བར་བྱ་བའི་དངོས་པོའི་རང་བཞིན་འཕགས་པའི་ཡེ་ཤེས་དང་། རྟོགས་པས་ཤེས་པར་བྱ་བ་གང་ལ་གནས་ཏེ། བརྗོད་པ་འཇུག་པར་འགྱུར་བ་ཡོད་དོ། །ཞེས་རྣམ་པར་རྟོག་པའོ། །དེ་ལ་བློ་གྲོས་ཆེན་པོ་མཚན་ཉིད་ལ་རྣམ་པར་རྟོག་པ
106b5 གང་ཞེ་ན། འདི་ལྟ་སྟེ། སྨྲ་བར་བྱ་བའི་སྨིག་རྒྱུ་ལྟ་བུ་ལ་མཚན་ཉིད་སྣ་ཚོགས་སུ་མངོན་པར་ཆགས་པས་མངོན་པར་ཞེན་ཏེ། འདི་ལྟ་སྟེ། དངོས་པོ་ཐམས་ཅད་ལ་ཚ་བ་དང་། གཤེར་བ་དང་། གཡོ་བ་དང་། སྲ་བའི་མཚན་ཉིད་དུ་རྣམ་པར་རྟོག་པའོ། །དེ་ལ་ནོར་ལ་རྣམ་པར་རྟོག་པ་གང
106b6 ཞེ་ན། འདི་ལྟ་སྟེ། གསེར་དང་། དངུལ་དང་། ནོར་རིན་པོ་ཆེ་རྣམ་པ་མང་པོའི་ཡུལ་བརྗོད་པའོ། །དེ་ལ་རང་བཞིན་ལ་རྣམ་པར་རྟོག་པ་གང་ཞེ་ན། འདི་ལྟ་སྟེ། དངོས་པོའི་ངོ་བོ་ཉིད་དུ་འཛིན་ཅིང་། འདི་ལྟ་སྟེ་འདི་ནི་འདི་བཞིན་གྱི་གཞན་དུ་མ་ཡིན་ནོ་ཞེས་ལོག་པར་རྣམ་པར་རྟོག་པའི
106b7 ལྟ་བས་རྣམ་པར་ལྟའོ། །དེ་ལ་རྒྱུ་ལ་རྣམ་པར་རྟོག་པ་གང་ཞེ་ན། འདི་ལྟ་སྟེ། རྒྱུ་དང་རྐྱེན་གང་གིས་རྒྱུའི་མཚན་ཉིད་ལས་སྐྱེ་བ་ཡོད་པ་དང་། མེད་པར་སྣང་བར་བྱེད་པ་དེ་ནི་རྒྱུ་ལ་རྣམ་པར་རྟོག་པའོ། །དེ་ལ་ལྟ་བ་ལ་རྣམ་པར་རྟོག་པ་གང་ཞེ་ན། འདི་ལྟ་སྟེ། ཡོད་པ་དང་། མེད་པ་དང་།
iiif viewer powered by OpenSeadragon
