| e-texts navigator |
| Wylie |
105a1 པ་རྣམས་ལ་ནི་རྒྱུ་འབྱུང་བ་ཆེན་པོ་རྣམས་ཡོད་ཀྱི། འབྱུང་བ་ཆེན་པོ་རྣམས་ནི་མེད་དོ། །དེ་ཅིའི་ཕྱིར་ཞེ་ན། བློ་གྲོས་ཆེན་པོ་འདི་ལྟ་སྟེ། དངོས་པོ་དང་། མཚན་མ་དང་། མཚན་ཉིད་དང་། དབྱིབས་དང་། བྱ་བའི་བདག་ཉིད་དང་། སྦྱོར་བ་མེད་པས་འབྱུང་བ་ཆེན་པོ་རྣམས
105a2 མི་སྐྱེའོ། །དངོས་པོ་དང་། མཚན་མ་དང་། མཚན་ཉིད་དང་། དབྱིབས་དང་། བྱ་བ་དང་སྦྱོར་བར་ལྡན་པ་རྣམས་ཀྱི་བྱ་བ་འདུས་པ་ལས་སྐྱེ་བར་འགྱུར་གྱི། མཚན་མ་དང་མི་ལྡན་པ་ལས་མ་ཡིན་ནོ། །དེ་ལྟ་བས་ན་བློ་གྲོས་ཆེན་པོ་འབྱུང་བ་ཆེན་པོ་དང་། འབྱུང་བ་ལས་གྱུར་པའི་མཚན་ཉིད་ནི
105a3 མུ་སྟེགས་བྱེད་རྣམས་ཀྱིས་རྣམ་པར་བརྟགས་པ་ཡིན་ཏེ། ངས་ནི་མ་ཡིན་ནོ། །གཞན་ཡང་བློ་གྲོས་ཆེན་པོ་ཕུང་པོ་རྣམས་ཀྱི་ཕུང་པོའི་རང་བཞིན་དང་། མཚན་ཉིད་རབ་ཏུ་བསྟན་ཏོ། །དེ་ལ་བློ་གྲོས་ཆེན་པོ་ཕུང་པོ་ལྔ་རྣམས་ཏེ། ལྔ་གང་ཞེ་ན། འདི་ལྟ་སྟེ། གཟུགས་དང་། ཚོར་བ་དང་།
105a4 འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྣམས་སོ། །དེ་ལ་བློ་གྲོས་ཆེན་པོ་ཕུང་པོ་བཞི་རྣམས་ནི་གཟུགས་མེད་དེ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྣམས་སོ། །བློ་གྲོས་ཆེན་པོ་གཟུགས་ནི་འབྱུང་བ་ཆེན་པོ་བཞི་ལས་གྱུར་པ་དང་། ཕན
105a5 ཚུན་དུ་མཚན་ཉིད་མི་འཐུན་པའི་འབྱུང་བ་རྣམས་སོ། །བློ་གྲོས་ཆེན་པོ་གཟུགས་མེད་པ་བཞིར་བགྲང་བ་མེད་དེ། ནམ་མཁའ་བཞིན་ནོ། །འདི་ལྟ་སྟེ། བློ་གྲོས་ཆེན་པོ་ནམ་མཁའ་ནི་གྲངས་ཀྱི་མཚན་ཉིད་ལས་འདས་མོད་ཀྱི། འོན་ཀྱང་གཅིག་ནི་ནམ་མཁའོ་ཞེས་རྣམ་པར་རྟོག་པ་དེ་བཞིན་དུ
105a6 བློ་གྲོས་ཆེན་པོ་ཕུང་པོ་རྣམས་ཀྱང་གྲངས་ཀྱི་མཚན་ཉིད་དང་། བགྲང་བ་ལས་འདས་ཏེ། དངོས་པོ་དང་། དངོས་པོ་མེད་པའི་རྣམ་པར་སྤངས་པ་མཐའ་བཞི་དང་བྲལ་བ་ཡང་བྱིས་པ་རྣམས་ཀྱིས་གྲངས་དང་། བགྲང་བར་བརྗོད་པས་རབ་ཏུ་བརྗོད་དེ། འཕགས་པ་རྣམས་ཀྱིས་ནི་མ་ཡིན་ནོ། །བློ
105a7 གྲོས་ཆེན་པོ་འཕགས་པ་རྣམས་ཀྱིས་ནི་སྒྱུ་མའི་གཟུགས་སྣ་ཚོགས་ལྟ་བུར་གཅིག་དང་། ཐ་དད་པ་སྤངས་པར་འདོགས་ཏེ། རྨི་ལམ་དང་། གཟུགས་བརྙན་གྱི་སྐྱེས་བུ་ལྟ་བུར་གནས་གཞན་མ་ཡིན་པ་དང་། འཕགས་པའི་ཡེ་ཤེས་རྟོགས་པ་ལ་ཤིན་ཏུ་རྨོངས་པའི་ཕྱིར། ཕུང་པོར་རྣམ
iiif viewer powered by OpenSeadragon
