| e-texts navigator |
| Wylie |
225a1 རྣམས་ཀྱི་ཚེ་ཚད་ཤེས། །ཉན་ཐོས་རྣམས་ཀྱང་རབ་ཏུ་ཤེས། །གང་དག་སྐྱོབ་པས་འཆད་འགྱུར་བ། །དེ་དག་རྣམས་ཀྱི་མདོ་སྡེའང་ཤེས། །དེ་ཡི་སངས་རྒྱས་ཞིང་ཅི་འདྲ། །དེ་དག་གི་ནི་བཀོད་ཅི་འདྲ། །སངས་རྒྱས་མྱ་ངན་འདས་རྣམས་ཀྱི། །ཆོས་ནི་ཇི་སྲིད་གནས་འགྱུར་བ། །ཏིང་ངེ་འཛིན་ལ་གནས་ནས
225a2 སུ། །དེ་དག་ཐམས་ཅད་དེ་ཡིས་ཤེས། །དེ་ལྟ་བས་ན་སུ་གང་ཞིག་།མང་ཐོས་འདོད་པས་དེ་བསྟེན་བྱ། །ཏིང་འཛིན་དེ་ནི་བསྟེན་པ་ཡིས། །དེ་ཡི་དོན་ཀྱང་ཤེས་པར་འགྱུར། །སངས་རྒྱས་ཡེ་ཤེས་འཇུག་པ་ཡི། །སྒོ་དེ་ཡིན་ཞིང་བློ་གྲོས་བརྟན། །དེ་ལས་དོན་ནི་འབྱུང་བར་འགྱུར། །སངས་རྒྱས་ཡེ་ཤེས་འཇུག་པར་འགྱུར། །
225a3 གང་གི་མཐའ་ནི་ཡོད་མིན་པའི། །བསོད་ནམས་དེ་ལས་ཐོབ་པར་འགྱུར། །དེ་ཚེ་སངས་རྒྱས་གང་འབྱུང་བ། །འཇིག་རྟེན་མགོན་པོ་མི་ཡི་མཆོག་།རྫོགས་པའི་སངས་རྒྱས་ཇི་སྙེད་པ། །དེ་སྙེད་དེ་ཡིས་རབ་ཏུ་ཤེས། །མི་གང་བྱང་ཆུབ་རབ་ཞུགས་ནས། །སངས་རྒྱས་རེ་རེ་རེ་རེའི་ཡང་། །ཉན་ཐོས་དག་ནི་དེ་སྙེད་པ། །དེ་དག་རྣམས་ལ
225a4 མཆོད་པར་བྱེད། །སངས་རྒྱས་རེ་རེ་རེ་རེ་ལའང་། །མཆོད་པའི་དོན་ཕྱིར་ནོར་བསགས་པ། །སྟོང་གསུམ་ལས་ནི་མི་ཉུང་བའི། །འཇིག་རྟེན་ཁམས་ནི་ཡོངས་སུ་བཀང་། །རྗེས་སུ་དཔག་པ་དེ་ཡིས་སུ། །ཉན་ཐོས་དང་ནི་རྒྱལ་བར་བཅས། །དེ་ལ་བསྐལ་པ་རྫོགས་ཚང་བར། །སངས་རྒྱས་ཀུན་ལ་རིམ་གྲོ་བྱེད། །འཇིག་རྟེན་མགོན་པོ
225a5 གྲགས་ཆེན་པོ། །གང་དག་མ་བྱོན་སངས་རྒྱས་རྣམས། །དེ་དག་ལ་ཡང་འདུ་བྱེད་འགྱུར། །དེ་འདྲ་བ་ཡི་མཆོད་པའང་བྱེད། །བསོད་ནམས་ཕུང་པོ་ཇི་སྙེད་པའང་། །བློ་གྲོས་བརྟན་པ་དེ་འཛིན་བྱེད། །སངས་རྒྱས་ཡེ་ཤེས་བསམ་མི་ཁྱབ། །ཡེ་ཤེས་དམ་པ་ཚོལ་བར་བྱེད། །གང་དག་བྱང་ཆུབ་དོན་གཉེར་བས། །ཏིང་ངེ་འཛིན་འདི
225a6 བསྒོམ་པར་བྱ། །གང་གིས་ཏིང་འཛིན་འདི་བསྒོམས་པས། །དེ་ནི་ཐོས་པས་འཕགས་པར་འགྱུར། །གང་གིས་ཏིང་འཛིན་འདི་བསྒོམས་དང་། །གང་དག་བསྒོམ་པར་འགྱུར་རྣམས་ཀྱི། །བསོད་ནམས་ཕུང་པོ་དེ་ལ་ནི། །ཚད་ཡོད་དོ་ཞེས་ང་མི་སྨྲ། །ཏིང་ངེ་འཛིན་འདི་བསྒོམས་པ་ཡི། །བསོད་ནམས་དེ་ནི་རབ་ཏུ་མང་། །ཤེས་པ་དེ་ནི་རྣམ
225a7 པར་འཕེལ། །སངས་རྒྱས་མཆོད་པས་དེ་ལྟ་མིན། །མེ་ཏོག་སྤོས་དང་ཕྲེང་བ་དང་། །བཟའ་བ་དག་དང་བཏུང་བ་དང་། །ཡོ་བྱད་རྣམས་ཀྱིས་བསྙེན་བཀུར་བ། །དེ་ནི་སངས་རྒྱས་བསྙེན་བཀུར་མིན། །བརྟན་པའི་བློ་གྲོས་ང་ཡིས་སུ། །བྱང་ཆུབ་སྙིང་པོར་ཆོས་གང་རྟོགས། །ཆོས་དེར་གང་དག་སྦྱོར་བྱེད་པ། །དེ་ཡིས་སངས་རྒྱས་བསྟི་སྟང་བྱས། །
iiif viewer powered by OpenSeadragon
