| e-texts navigator |
| Wylie |
270b1 པར་བྱའོ། །ཁ་ཟས་དུ་མ་ཐོབ་པ་དང་། །རང་གི་ཡུལ་དུ་ཉེ་བར་གནས། །མང་པོ་རྣམས་ནི་འཚོ་བ་ནི། །གང་གིས་བྱམས་པ་མ་སྤངས་ནའོ། །གྲོང་རྡལ་གང་གང་འགྲོ་བ་དང་། །གྲོང་ཁྱེར་རྒྱལ་པོའི་ཕོ་བྲང་དང་། །ཐམས་ཅད་དུ་ནི་མཆོད་པར་འགྱུར། །གང་གིས་བྱམས
270b2 པ་མ་སྤངས་ནའོ། །དེ་ལ་ཆོམ་རྐུན་མི་འབྱུང་ཞིང་། །དེ་ལ་རྒྱལ་པོ་གནོད་མི་བྱེད། །སེམས་ཅན་ཐམས་ཅད་བཤེས་སུ་འགྱུར། །གང་གིས་བྱམས་པ་མ་སྤངས་ནའོ། །ཁྲོ་མེད་རང་ཡུལ་བདེ་བར་གནས། །སྐྱེ་བའི་འདུན་སར་སྨོད་མེད་དགའ། །མཆོག་གི་གཉེན་དང་ལྡན
270b3 པར་འགྱུར། །གང་གིས་བྱམས་པ་མ་སྤངས་ནའོ། །མཆོད་ན་མཆོད་པ་ཐོབ་པར་འགྱུར། །འདུད་ན་སོ་སོར་འདུད་པར་བྱེད། །སྙན་དང་གྲགས་པ་ཐོབ་པར་འགྱུར། །གང་གིས་བྱམས་པ་མ་སྤངས་ནའོ། །བཀུར་སྟི་བྱས་ན་བཀུར་སྟི་ཐོབ། །གུས་པར་བྱས་ན་གུས་པ་ཐོབ། །ཁ
270b4 དོག་གཟི་བརྗིད་ལྡན་པར་འགྱུར། །གང་གིས་བྱམས་པ་མ་སྤངས་ནའོ། །མེ་ལྟར་རབ་ཏུ་འབར་བ་ཡི། །ལྷ་ཡི་ལུས་དང་འདྲ་བར་འགྱུར། །དཔལ་དང་བྲལ་བར་མི་འགྱུར་རོ། །གང་གིས་བྱམས་པ་མ་སྤངས་ནའོ། །ཕྱུགས་རྣམས་མང་པོ་ཐོབ་པ་དང་། །ཞིང་ལ་འབྲུ་མང་སྐྱེ་བ་དང་། །
270b5 བུ་དང་བུ་མོ་མང་བར་འགྱུར། །གང་གིས་བྱམས་པ་མ་སྤངས་ནའོ། །རི་ལས་ཐུར་དུ་ལྷུང་བ་དང་། །ཤིང་ལས་འོག་ཏུ་ལྷུང་བ་ན། །ལྟུང་བར་མི་འགྱུར་གནས་ས་ཐོབ། །གང་གིས་བྱམས་པ་མ་སྤངས་ནའོ། །བ་ཊའི་ཤིང་སྟེང་འཛེགས་གྱུར་ན། །རླུང་གིས་བསྐྱོད་པར་མི་ནུས་བཞིན། །
270b6 དགྲ་བོས་ཅུང་ཟད་བྱ་མི་ནུས། །གང་གིས་བྱམས་པ་མ་སྤངས་ནའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།བྱམས་པ་བསྒོམ་པའི་མདོ་རྫོགས་།། །།པཎྜི་ཏ་ཆེན་པོ་ཨཱ་ནནྡ་ཤྲཱིའི་ཞལ
270b7 སྔ་ནས། མང་དུ་ཐོས་པའི་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས། གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།སའི་སྟེང་དུ་ཉི་མ་དང་ཟླ་བ་ལྟར་གྱུར་ཅིག། །།
iiif viewer powered by OpenSeadragon
