| e-texts navigator |
| Wylie |
99b1 གཞིར་མི་འབབ་ལ་དེ་ལ་འགའ་ཡང་སྒྲ་ཡིད་དུ་མི་འོང་བ་འབྱིན་པར་མི་བྱེད་དོ། ། ཁྱིམ་དེ་ཡང་ནོར་དང་། འབྲུ་དང་། དབྱིག་དང་། གསེར་དང་། མཛོད་དང་། བང་བ་དང་། བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། རྐང་གཉིས་པ
99b2 དང་། རྐང་བཞི་པ་ལ་སོགས་པ་དག་གིས་རྒྱས་ཤིང་འཕེལ་བར་གྱུར་ཏེ། ཇི་ལྟར་རྒྱ་མཚོ་ཆེན་པོ་ཆུ་ཀླུང་ལྔ་བརྒྱ་དག་གིས་ཉིན་གཅིག་བཞིན་འགེངས་པར་བྱེད་པ་དེ་བཞིན་དུ་ཁྱིམ་དེ་ཡང་རྒྱས་པར་གྱུར་ཏོ།། རེ་ཞིག་ན་གྱད་ཀྱི་སྣ་ཆེན་པོ་ལ་གཏོགས་པའི་བློན་པོ་ལྔ་བརྒྱ
99b3 རྣམས་ཀྱི་ཆུང་མ་ལ་ཡང་སེམས་ཅན་ཞུགས་པར་གྱུར་ཏོ། ། དེ་ནས་དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པད་མའི་རྩ་བའི་མདོག་ལྟར་དཀར་བ། མགོ་གདུགས་ལྟ་བུ། ལག་པ་རིང་བ། འཕྲལ
99b4 བའི་དབྱེས་ཆེ་བ། སྨིན་ཚུགས་ཀྱི་རྒྱུན་མ་ཆད་པ། སྣའི་གཟངས་མཐོ་བ། ཐོང་ཀ་སེང་གེའི་འདྲ་བ། རོ་སྟོད་སེང་གེའི་ལྟ་བུ་དཔུང་པ་རིང་བ་ཞིག་བཙས་སོ།། ཉི་མ་དེ་ཉིད་ལ་གྱད་ཀྱི་སྣ་ཆེན་པོ་ལ་གཏོགས་པའི་བློན་པོ་ཆེན་པོ་ལྔ་བརྒྱའི་བུ་རྣམས་ཀྱང་བཙས་སོ།།
99b5 རྒོད་མ་ལྔ་བརྒྱ་ཡང་རྟེའུ་འབྲངས་སོ།། དེ་བཞིན་དུ་རྫས་ཞེས་བྱ་བའི་བར་དུ་ཡང་རྒྱས་པར་བརྗོད་པར་བྱའོ།། དེའི་ཉེ་དུ་རྣམས་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་ཞེས་བྱ་བ་ནས། གྲོང་ཁྱེར་དུ་བཙས་སྟོན་བྱས་ཏེ་ཞེས་བྱ་བའི་བར་དང་། ཁྱེའུའི
99b6 མིང་ཅིར་གདགས་ཞེས་བྱ་བའི་བར་དུ་བརྗོད་པར་བྱའོ། ། དེ་དག་ལས་ཁ་ཅིག་ན་རེ་ནོར་རྣམས་དང་ལྷན་ཅིག་སྐྱེས་ལ། གྱད་ཀྱི་སྣ་ཆེན་པོ་ལ་གཏོགས་པའི་བུ་ཡང་ཡིན་པས་དེའི་ཕྱིར་མིང་གྱད་བུ་ནོར་དུ་གདགས་སོ་ཞེས་ཟེར་རོ།། གཞན་དག་ན་རེ་འདི་ནོར་དང་འདྲ་བར
99b7 སྐྱེས་ལ། འདིའི་ཕ་ཡང་གྱད་ཀྱི་སྣ་ཆེན་པོ་ལ་གཏོགས་པ་ཡིན་པས་ཁྱེའུའི་མིང་གྱད་བུ་ནོར་ཞེས་མིང་དུ་གདགས་སོ་ཞེས་ཟེར་ནས། མིང་གྱད་བུ་ནོར་དུ་བཏགས་ཏེ་ཞེས་བྱ་བ་ནས། མ་མ་བརྒྱད་ལ་གཏད་དོ་ཞེས་བྱ་བའི་བར་དང་། འོ་མ་དང་། ཞོ་དང་། མར་སར
iiif viewer powered by OpenSeadragon
