| e-texts navigator |
| Wylie |
316a1 ཡོད་ནའོ། ། དེ་ནས་ཤ་སློང་བ་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཤ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ
316a2 འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ། ། ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ།། ཡང་གང་ཞེས་བྱ་བ་ནི་སྦོམ་དགའ་མོའོ།། ཞེས་བྱ་བ་ནས་ཤ་ཞེས
316a3 བྱ་བ་ནི་ཕྱུགས་ལ་སོགས་པའི་འོ་ཞེས་བྱ་བའི་བར་རོ། ། ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་མཐུན་པར་བྱའོ།། སོ་སོར་བཤགས་པར་བྱ་བ་དགུ་པའོ།། །། གླེང་གཞི་ནི་མཉན་ཡོད་ནའོ།། དེ་ནས་ཤ་སྐམ་སློང་བ་དང་ཞེས་བྱ་བ་ནས་བསླབ་པ་བཅའ་བའི
316a4 བར་དུ་མཛད་དེ། ཡང་དགེ་སློང་མ་གང་མི་ན་བར་རང་གི་དོན་དུ་ཁྱིམ་དག་ཏུ་ཤ་སྐམ་བསླངས་ནས་འཆའ་འམ་ཟ་ན་དགེ་སློང་མ་དེས་དབྱར་ཁང་དུ་སོང་ནས་དགེ་སློང་མ་རྣམས་ལ་འཕགས་མ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས
316a5 སོ། ། ཞེས་སོ་སོར་བཤགས་པར་བྱ་སྟེ། འདི་ནི་སོ་སོར་བཤགས་པར་བྱ་བའི་ཆོས་ཡིན་ནོ།། ཡང་གང་ཞེས་བྱ་བ་ནི་སྦོམ་དགའ་མོའོ།། ཞེས་བྱ་བ་ནས་ཤ་སྐམ་ཞེས་བྱ་བ་ནི་ཤ་སྐམ་པོའོ་ཞེས་བྱ་བའི་བར་རོ།། ལྟུང་བའི་རིམ་པ་གཞན་ནི་གོང་མ་ཇི་ལྟ་བ་བཞིན་དུ་རྗེས་སུ་མཐུན
316a6 པར་བྱ་བའོ། ། སོ་སོར་བཤགས་པར་བྱ་བ་བཅུ་པའོ།། །། གླེང་གཞི་ནི་མཉན་ཡོད་ནའོ།། གང་གི་ཚེ་སྡེ་དཔོན་སེང་གེས་བདེན་པ་རྣམས་མཐོང་བ་དང་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་ནས། དགེ་འདུན་གྱིས་བསླབ་པའི་སྡོམ་པ་བྱིན་པ་དང་ཞེས་བྱ་བའི
316a7 བར་རོ། ། དེ་ནས་བཅུ་གཉིས་སྡེ་དག་ཁྱིམ་དེར་ཞུགས་ནས་བསོད་སྙོམས་བླངས་པ་དང་། དེ་ནས་དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས་ཁྱིམ་དེར་བསླབ་པའི་སྡོམ་པ་མ་བྱིན་ནམ། དེ་དག་གིས་འདི་སྐད་ཅེས་དགེ་སློང་རྣམས་ལ་བྱིན
iiif viewer powered by OpenSeadragon
