| e-texts navigator |
| Wylie |
309b1 འཕགས་མ་འདི་ཅི་མཛད། དེས་འདི་སྐད་ཅེས་སྨྲས་སོ།། ཁོ་མོའི་ལུས་རྒྱན་གྱིས་མཛེས་སམ་ཅི་བལྟ་མོད། དེ་དག་གིས་སྨྲས་པ། མགོ་རེག་ཚུལ་གཞན་དུ་ཁས་བླངས་པ་ཁྱོད་ལ་མཛེས་སུ་ཅི་ཡོད་ཅེས་བུད་མེད་དེ་དག་དེ་ལྟར་ཁ་ཟེར་བར་བྱེད་པའི་སྐབས་དེ་དགེ་སློང
309b2 མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པའི་རྒྱན་ཐོགས་ན་ལྟུང་བྱེད་དོ།། ཡང་གང་ཞེས་བྱ་བ་ནི་སྦོམ་དགའ་མོའོ།། ཁྱིམ
309b3 པའི་རྒྱན་ཅེས་བྱ་བ་ནི་མགུལ་གདུབ་དང་། གདུ་བུ་རྒྱན་ཅན་དང་། དཔུང་རྒྱན་ལ་སོགས་པའོ།། ཐོགས་ན་ཞེས་བྱ་བ་ནི་བརྒྱན་པར་བྱེད་ནའོ།། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ
309b4 པའི་རྒྱན་ཐོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། ། ལྟུང་བྱེད་ཉི་ཤུ་བདུན་པའི་གཉིས་པ་རྫོགས་།། །། གླེང་གཞི་ནི་མཉན་ཡོད་ནའོ།། དེ་ནས་བཅུ་གཉིས་སྡེ་དག་མཉན་ཡོད་ཀྱི་བྲམ་ཟེ་དང་། ཁྱིམ་བདག་གི་ཆུང་མ་རབ་ཏུ་མང་པོ་དང་ལག་པ་སྦྲེལ་ནས
309b5 འབབ་ཆུ་ཨ་ཛི་ར་བ་ཏིར་ལུས་ཁྲུས་བྱེད་པ་ན་དེ་དག་གཅིག་ལ་གཅིག་མཛུབ་མོ་འཛུགས་ཤིང་དེ་དག་དགའ་བར་བྱེད་དགའ་བར་བྱེད་དུ་འཇུག། རྩེ་བར་བྱེད། རྩེར་འཇུག་པར་བྱེད་ཅིང་དགོད་པ་དང་། འཕྱར་གཡེང་དང་། ལུས་ཀྱི་རྩབ་ཧྲལ་བྱེད་པ་ཉེ་བར་སྟོན་པར་བྱེད་པ་ན
309b6 དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལག་པ་སྦྲེལ་ནས་ཁྲུས་བྱེད་ན་ལྟུང་བྱེད་དོ།། ཡང
309b7 གང་ཞེས་བྱ་བ་ནི་བཅུ་གཉིས་སྡེ་དག་གོ། ། ལག་པ་སྦྲེལ་ནས་ཞེས་བྱ་བ་ནི་ལག་པ་སྦྲེལ་ཏེའོ།། ཁྲུས་བྱེད་ན་ཞེས་བྱ་བ་ལ་ཁྲུས་ནི་གཉིས་ཏེ། དབང་བསྐུར་བའི་ཁྲུས་དང་། འཇུག་པའི་ཁྲུས་ལས་དོན་འདི་ལ་ནི་འཇུག་པའི་ཁྲུས་ལ་བྱ་བར་དགོངས་སོ།། ལྟུང་བྱེད་དོ་ཞེས་བྱ
iiif viewer powered by OpenSeadragon
