| e-texts navigator |
| Wylie |
300b1 སྨེ་གབ་རྗེས་སུ་གནང་ངོ་། ། དེ་ནས་བཙུན་མོ་ཕྲེང་ལྡན་མས་ནང་མི་ལ་བསྒོ་བ་དང་། དེ་དག་གིས་གོས་སྣ་ཚོགས་ཀྱིས་སྒྲོམ་དག་མདུན་དུ་བཞག་གོ།། དེ་ནས་བཙུན་མོ་ཕྲེང་ལྡན་མས་སྦོམ་དགའ་མོ་ལ་འདི་སྐད་ཅེས་སྨྲས་སོ།། འཕགས་མ་གོས་འདི་དགེ་སློང་མའི
300b2 ཚོགས་ཐམས་ཅད་ལ་སྨེ་གབ་དུ་བྲིམས་ཤིག། དེ་ནས་སྦོམ་དགའ་མོས་གོས་དེ་དག་ཐམས་ཅད་རང་གིར་བྱས་པ་དང་། དགེ་སློང་མ་གཞན་ཞིག་བཙུན་མོ་ཕྲེང་ལྡན་མ་གང་ན་བ་དེར་སོང་སྟེ་ཕྱིན་ནས་བཙུན་མོ་ཕྲེང་ལྡན་མ་ལ་འདི་སྐད་ཅེས་སྨྲས་སོ་བཙུན་མོ་བདག་ལ་ཡང
300b3 སྨེ་གབ་སྩོལ་ཅིག། དེ་ནས་བཙུན་མོ་ཕྲེང་ལྡན་མས་དགེ་སློང་མ་དེ་ལ་འདི་སྐད་ཅེས་སྨྲས་སོ།། འཕགས་མ་བདག་གིས་དགེ་སློང་མའི་ཚོགས་ཐམས་ཅད་ཀྱི་སྨེ་གབ་སྦོམ་དགའ་མོའི་ལག་ཏུ་གཏད་ལགས་སོ།། ཇི་ཙམ་ན་སྦོམ་དགའ་མོ་ལ་བསླངས་པ་ལས་མ་བྱིན
300b4 པ་དང་། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ།། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྨེ་གབ་ཅན་གྱི་ཚོགས་ཀྱི་སྨེ་གབ
300b5 གང་ཟག་རང་གིར་བྱེད་ན་ལྟུང་བྱེད་དོ། ། ཡང་གང་ཞིག་ཅེས་བྱ་བ་ནི་སྦོམ་དགའ་མོའོ།། སྨེ་གབ་ཅན་ཞེས་བྱ་བ་ནི་བུད་མེད་ན་བའོ།། ཚོགས་ཀྱི་སྨེ་གབ་ཅེས་བྱ་བ་ནི་དགེ་སློང་མའི་དགེ་འདུན་དང་ཐུན་མོང་པའོ།། གང་ཟག་ཅེས་བྱ་བ་ནི་གཅིག་པུའོ།། རང་གིར
300b6 བྱེད་ན་ཞེས་བྱ་བ་ནི་བདག་གིར་རྣོན་པའོ། ། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ།། དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མས་ཇི་ཙམ་ཅུང་ཟད་སྨེ་གབ་ཅན་གྱི་ཚོགས་ཀྱི་སྨེ་གབ་གང་ཟག་རང་གིར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ།། ལྟུང་བྱེད་ཉི་ཤུ་གཉིས
300b7 པའི་གཉིས་པ་རྫོགས་། ། །། གླེང་གཞི་ནི་མཉན་ཡོད་ནའོ།། དེའི་ཚེ་ཁྱིམ་བདག་ནད་པ་སྦྱོར་མི་བཟོད་པ་ཞིག་ཡོད་དོ།། དེ་ནས་སྦོམ་དགའ་མོ་ཁྱིམ་བདག་དེ་གང་ན་བ་དེར་སོང་སྟེ་ཕྱིན་ནས་ཁྱིམ་བདག་ལ་འདི་སྐད་ཅེས་སྨྲས་སོ།། བཞིན་སྲ་བརྐྱང་གི
iiif viewer powered by OpenSeadragon
